မတ်-၁၉၊ ၂၀၂၆။ဟာနာဆန်/People’s Spring
ပဲခူးတိုင်းအတွင်း စစ်ကောင်စီရဲ့ အစုလိုက်၊အပြုံလိုက် သတ်ဖြတ်မှုကြောင့် ကိုယ်ဝန်ဆောင် မိခင်နဲ့ ကလေးငယ်တွေအပါအဝင် အရပ်သား ၃၀နီးပါး သေဆုံးခဲ့ရတဲ့ ညောင်လေးပင်က ပူဆွေးမှုတွေ၊ မျက်ရည်တွေ မခြောက်သေးခင်မှာပဲ စစ်ကောင်စီက ပဲခူးမြို့ပေါ်မှာ နာမည်ကြီးဇာတ်အဖွဲ့ ၅ဖွဲ့နဲ့ ရွှေမော်ဓော ဘုရားပွဲတော်ကို စည်ကားသိုက်မြိုက်စွာ ကျင်းပဖို့ ပြင်ဆင်နေပါတယ်။
ပြီးခဲ့တဲ့ မတ်လ ၅ရက်က ပဲခူးမြို့ကနေ ကားနဲ့ ၂ နာရီခွဲခန့်သာသွားရတဲ့ ညောင်လေးပင်မြို့နယ်အတွင်းရှိ ရေတွင်းကုန်း၊ ခရုကုန်းနဲ့ ကျောင်းကုန်းကျေးရွာတွေကို စစ်ကောင်စီက လေကြောင်း၊ ဒရုန်းနဲ့ လက်နက်ကြီးတွေနဲ့ ပစ်ခတ်ဝင်ရောက်ခဲ့ရာ အရပ်သား ၂၈ ဦး သေဆုံးခဲ့ရပါတယ်။ သေဆုံးသူတွေထဲမှာ ကလေးငယ် အပါအဝင် ၃ဦးကို စစ်တပ်က ပစ်ခတ်သတ်ဖြတ်ခဲ့တာဖြစ်ပြီး ၂၅ ဦးဟာ လေကြောင်းဗုံးကြဲမှုကြောင့် သေဆုံးခဲ့ခြင်းဖြစ်ကြောင်း ဒေသခံများနဲ့ NUG လူ့အခွင့်အရေးဆိုင်ရာဝန်ကြီးဌာနက အတည်ပြုထားပါတယ်။
အဆိုပါ အစုလိုက်၊ အပြုံလိုက် သတ်ဖြတ်မှုဖြစ်ရပ် ဖြစ်ပွားပြီး တပတ်အကြာတွင်မူ ပဲခူးမြို့ပေါ် ရွှေမော်ဓောဘုရားပွဲမှာ ကပြမယ့် ဇာတ်အဖွဲ့စာရင်းကို ပွဲတော်ကျင်းပရေးကော်မတီက အတည်ပြုထုတ်ပြန်ခဲ့ပါတယ်။ ယင်းစာရင်းမှာ သဘင်အစည်းအရုံးဥက္ကဋ္ဌ ဖိုးချစ်၊ အောင်ဇမ္ဗူ၊ စမ်းရေမိုး၊ စွမ်းဇာနည်နဲ့ သူရဝင်းထွဋ်စတဲ့ ထိပ်တန်းဇာတ်အဖွဲ့ ၅ဖွဲ့ ပါဝင်နေခဲ့ပါတယ်။
Public Service Announcement
စစ်ကောင်စီဟာ ပွဲလမ်းသဘင်၊ ရုပ်ရှင်၊ ဂီတပွဲတွေကို လွတ်လပ်စွာ လုပ်ခွင့်ပေးထားတာဟာ ပုံမှန်ဘဝ ပြန်ရပြီလို့ အထင်မှားစေဖို့အတွက်ဖြစ်ပြီး ၎င်းတို့ရဲ့အကြမ်းဖက်မှုတွေကို မမြင်အောင် လှည့်စားခြင်းသာဖြစ်ကြောင်း၊ ပြည်သူတွေရဲ့စိတ်ကို တွေဝေမိန်းမောသွားစေဖို့နဲ့ တော်လှန်ရေးကို အားအင်ချိနဲ့သွားအောင် လုပ်ခြင်းဖြစ်ပြီး အာဏာရှင်ရဲ့ စိတ်ပိုင်းဆိုင်ရာ စစ်ပွဲ (psy-war) တစ်ရပ်ဖြစ်ကြောင်း ဇာတ်မင်းသားမိုးမင်းက ပြီးခဲ့တဲ့ ဖေဖော်ဝါရီလအတွင်းကပဲ သူ့Facebook လူမှုကွန်ရက်ကနေ သတိပေးခဲ့ပါသေးတယ်။
“အနုပညာသမားကို အပြစ်တင်ဖို့ မဟုတ်ပါ။ ဝမ်းစာရှာနေရတာကိုလည်း မလေးစားဖို့ မဟုတ်ပါဘူး။အာဏာရှင်ရဲ့ ဗျူဟာကို မပါဝင်ဘဲနေဖို့ပါပဲ။”လို့ ဇာတ်မင်းသားမိုးမင်းက ပြောခဲ့ပါတယ်။
ဒါပေမဲ့ ဇာတ်သမားတွေအတွက် ဂုဏ်တစ်ခုဖြစ်တဲ့ ပဲခူးရွှေမော်ဓောပွဲမှာ ကပြခွင့်ရဖို့ ဇာတ်အဖွဲ့ကြီးတွေ အပြိုင်အဆိုင် ကြိုးပမ်းခဲ့ကြပါတယ်။
မတ်လ ၂၇ ရက်မှ ဧပြီ ၈ရက်အထိ ၁၃ ညတိုင်တိုင် နှစ်ပတ်နီးပါး ကကြမှာဖြစ်ပါတယ်။ ဖိုးချစ်၊ စမ်းရေမိုး၊ စွမ်းဇာနည်နဲ့ သူရဝင်းထွဋ်တို့က ဇာတ်ရုံတစ်ရုံတည်းမှာ ရက်ခွဲပြီး ကပြမှာဖြစ်ပြီး အောင်ဇမ္ဗူဇာတ်အဖွဲ့ကတော့ သီးသန့်ရုံနဲ့ ၁၀ ညတိုင်တိုင် အပြိုင်ကပြဖို့ ပြင်ဆင်ထားကြောင်း မြို့ခံတွေဆီက သိရပါတယ်။
ညောင်လေးပင်မြို့နယ်အတွင်း အရပ်သား ၂၈ ဦး အကြမ်းဖက်သတ်ဖြတ်ခံခဲ့ရပေမဲ့ ပဲခူးမြို့ပေါ်မှာတော့ စစ်ကောင်စီက ဇာတ်အဖွဲ့တွေနဲ့ ပျော်ပွဲရွှင်ပွဲတွေကို ဟန်ပြကျင်းပဖို့ ပြင်ဆင်နေတာဖြစ်ပါတယ်။
စစ်ကောင်စီဟာ ရန်ကုန်၊ မန္တလေးအပါအဝင် မြို့ကြီးတွေမှာ ဘုရားပွဲတော်တွေကို ထပ်ခါထပ်ခါကျင်းပစေပြီး ဇာတ်သဘင်ဖျော်ဖြေပွဲတွေနဲ့ စည်ကားအောင် ပြုလုပ်စေခဲ့ပါတယ်။
