ပဲခူးမြို့အနီးငလျင်လှုပ် ၊ပဲခူးနဲ့ ရန်ကုန်ကပြည်သူ​တွေသိရှိခံစားရ

သြဂုတ်-၂၃၊၂၀၂၆။မိထက်၊သုည/People’s Spring

ပဲခူးမြို့အနီးမှာ ဒီနေ့ နေ့မနက်ပိုင်း လှုပ်ရှားသခဲ့တဲ့ရစ်ခ်တာစကေး ၄.၆ အဆင့်ငလျင်ကို ရန်ကုန်မြို့မှာလည်း သိရှိခံစားခဲ့ပါတယ်။

ငလျင်က သြဂုတ်လ ၂၃ ရက်မနက် ၁၀ နာရီ ၁၅ မိနစ်ခန့်မှာမြေအောက်အနက် ၁၀ ကီလိုမီတာခန့် (၆ မိုင်​ကျော်) ကိုဗဟိုပြုပြီး လှုပ်ရှားသွားတာလို့ အမျိုးသားညီညွတ်ရေးအစိုးရ၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန (MoSLHA)က သတင်းထုတ်ပြန်ပါတယ်။

“ငလျင်လှုပ်တာကိုတော့ သိလိုက်တယ်။ အိမ်အပေါ်ဆုံးထပ် ၃ လွှာမှာ ရောက်နေတဲ့အချိန်ဆိုတော့ ငလျင်လှုပ်တာကို ခံစားလိုက်ရတာပါ။ ပဲခူးမှာ တိုက်အမြင့်တွေ အရမ်းမရှိတော့ သိပ်တော့မသိသာဘူး”လို့ ပဲခူးမြို့နေပြည်သူတစ်ဦးက ​ပြောပါတယ်။

Public Service Announcement

ဒီငလျင်ကိုပဲခူးမြို့နဲ့ပတ်ဝန်းကျင်အပြင် ရန်ကုန်မြို့က သု၀ဏ္ဏ၊ မြောက်ဒဂုံ၊ ‌တောင်ဥက္ကလာစတဲ့မြို့နယ်တွေမှာလည်း သိသိသာသာခံစားခဲ့ရတယ်လို့ဒေသခံတွေကပြောပါတယ်။

“အိမ်မှာကရေဗူးကိုထောင်ထားတာ။ ငလျင်လှုပ်တာနဲ့ သိအောင်။ ဒီမနက်ပိုင်းမှာတိုက်ကယိမ်းသွားတယ်လို့ခံစားရလို့ရေဗူးကိုကြည့်တော့ တော်တော်လန့်သွားတာ။ ၅ စက္ကန့်လောက်ကြာတယ် လှုပ်တာ”လို့ မြောက်ဒဂုံမှာ နေထိုင်သူတစ်ဦးကပြောပါတယ်။

မရမ်းကုန်းမြို့နယ်နေ ပြည်သူတဦးကလည်း “ငလျင်က အရမ်းမကြာဘူး။ ဒါပေမယ့် ၇ လွှာမှာဆိုတော့ လှုပ်တာကို သိလိုက်တယ်။ ​ဘုရားမီးသီးတွေတောင် ရမ်းသွားတယ်။ လူကတော့ ခေါင်းနည်းနည်းမူးသွားတာပဲ ရှိတာပါ” လို့ ပြောပါတယ်။

ဧရာဝတီတိုင်းနဲ့ပဲခူးတိုင်းမှာလှုပ်ရှားတဲ့ငလျင်တွေကရန်ကုန်မြို့အထိသက်ရောက်တာ​ကြောင့် မြို့ခံတွေအကြား စိုးရိမ်မှုတွေရှိနေပါတယ်။ဒါ့အပြင်​မြေငလျင်အဖြစ်သတင်းမထုတ်တဲ့ မြေကျွံမှုအချို့ကြောင့်လည်း စိုးရိမ်နေကြပါတယ်။

ရန်ကုန်မြို့ဟာဒေးဒရဲပြတ်ရွှေ့ကြောင့်ငလျင်လှုပ်ရှားနိုင်သလို ရန်ကုန်မြစ်ဝအနီးရှိ ပြတ်ရွေ့တွေနဲ့ ထိုးစိုက်ဇုန်ကြောင့်လည်း ငလျင်လှုပ်နိုင်တယ်လို့ ပညာရှင်တွေက သတိပေးထားပါတယ်။

ရန်ကုန်နဲ့ မိုင်၃၀ကျော်ဝေးတဲ့ ပဲခူးမြို့အနီးကစစ်ကိုင်းပြတ်ရွေ့ရဲ့တောင်ဘက်စွန်းပိုင်းလှုပ်ရှားပါကလည်း ရန်ကုန်မြို့မှာ ငလျင် လှုပ်စေပါတယ်။​မြေငလျင်ပညာရှင်​တွေက စစ်ကိုင်းပြတ်​ရွေ့က​​​နေ ပဲခူးငလျင်ကြီး လှုပ်ခဲ့ပြီး​​​​​နောက် ပြန်လှုပ်​ခြေရှိတာ​ကြောင့် လူ​နေထုထပ်ပြီး အ​ဆောက်အအုံများတဲ့ ရန်ကုန် ၊ပဲခူးမြို့​တွေအတွက် အထူးသတိပြုကြဖို့ မကြာခဏသတိ​ပေးထားပါတယ်။