မတ် – ၂၂ ၊၂၀၂၆ ၊ နိုင်ပကောင်း/People’s Spring
ကရင်ပြည်နယ်၊ မြ၀တီမြို့တောင်ဘက် ဖလူးဒေသမှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော်(KNLA)တို့အကြား မတ်လ ၂၁ ရက် မနက်ပိုင်းက တိုက်ပွဲတွေပြင်းထန်ခဲ့ပြီး စစ်ကောင်စီလေတပ်က ဗုံးကြဲတိုက်ခိုက်ခဲ့တယ်လို့ ကရင်သတင်းရင်းမြစ်က ပြောပါတယ်။
မနေ့ (မတ်လ ၂၁ရက် ) မနက်အစောပိုင်းကနေ နေ့လယ်ပိုင်းအထိ စစ်ကြောင်းထိုးလာတဲ့ စစ်ကောင်စီတပ်စစ်ကြောင်းတွေနဲ့ KNU ပူးပေါင်းတပ်တို့အကြား ဖလူးကြီးကျေးရွာအနီးမှာ တိုက်ပွဲအပြင်းအထန်ဖြစ်ဖြစ်ခဲ့ပြီး အဲဒီနောက်မှာ စစ်ကောင်စီလေတပ်က ဗုံးနှစ်လုံး ကြဲချခဲ့တာလို့ကရင်သတင်းရင်းမြစ်ကဆိုပါတယ်။
မြဝတီတောင်ဘက်ခြမ်းကို သိမ်းယူဖို့အတွက် စစ်ကောင်စီတပ်က မြ၀တီမြို့ပေါ်ကနေ အင်အားအများအပြား ထပ်မံဖြည့်ဆည်းနေပြီး ထိုင်းနယ်စပ်နားမှာရှိတဲ့ ဖလူးကြီး၊ ဖလူးလေးကျေးရွာတွေအပြင် မင်းလက်ပံကျေးရွာတွေဆီ အပြင်းအထန်ထိုးစစ်ဆင်နေတာပါ။
Public Service Announcement
မနေ့က ဆိုရင် အင်ကြင်းမြိုင်ရွာဘက်ကနေ တက်လာတဲ့ စစ်ကောင်စီတပ်စစ်ကြောင်းဟာ မင်းလက်ပံကျေးရွာအဝင် ဆိုင်းဘုတ်နားထိ ရောက်ရှိလာပြီလို့ မင်းလက်ပံဒေသခံတွေက ပြောပါတယ်။
တဖက်မှာလည်း စစ်ကောင်စီတပ်က မင်းလက်ပံရွာနဲ့ ဖလူးကြီးရွာကြားက သူတို့ရဲ့ စခန်းဟောင်းထဲကို ပြန်သိမ်းယူနိုင်ဖို့နဲ့ ဖလူးလေးတောင်ကုန်း (ဒေသခံတွေအခေါ် တာကော်ကျိုး)ကို စိုးမိုးထိန်းချုပ်နိုင်ဖို့ ထိုးစစ်ဆင်နေပြီး KNU ပူးပေါင်းတပ်ဖွဲ့တွေဘက်က ခုခံတိုက်ခိုက်နေတယ်လို့ ကရင်သတင်းရင်းမြစ်က ပြောပါတယ်။
စစ်ကောင်စီတပ်ဟာ မြဝတီမြို့တောင်ဘက်ခြမ်းက ဒေသတွေကို စိုးမိုးနိုင်ဖို့အတွက် မင်းလက်ပံ၊ ဖလူးကြီး၊ ဖလူးလေး ကျေးရွာတွေကို ပြန်သိမ်းဖို့ ပြီးခဲ့တဲ့ နှစ် အောက်တိုဘာလအတွင်းက စစ်ကြောင်း သုံး ကြောင်းနဲ့ ထိုးစစ်ဆင်ပေမယ့် ဒီနေ့ အထိ အဲဒီကျေးရွာတွေကို သိမ်းပိုက်နိုင်တာမရှိပါဘူး။
