လေကြောင်းအန္တရာယ်ကာကွယ်ရေးနဲ့ စစ်အာဏာရှင်ဆန့်ကျင်ရေး လှုပ်ရှားမှုတွေ စစ်ကိုင်းမှာ ပြုလုပ်

မတ်-၂၄၊၂၀၂၆။ သုည/People’s Spring

စစ်ကိုင်းတိုင်းက သပိတ်အဖွဲ့တွေ၊ ဒေသခံပြည်သူတွေဟာ စစ်တပ်ရဲ့ လေကြောင်းအန္တရာယ်ကာကွယ်ရေးနဲ့ စစ်အာဏာရှင်ဆန့်ကျင်ရေး လူထုလှုပ်ရှားမှုတွေကို ဒီကနေ့ (မတ်လ ၂၄) မှာ ပြုလုပ်ခဲ့ပါတယ်။

ယင်းမာပင်မြို့နယ်မှာ အောင်လံလွှင့်မည် ရွှေရေကြည် သပိတ်စစ်ကြောင်းက ဒေသခံပြည်သူတွေနဲ့ ပူးပေါင်းပြီး စစ်အာဏာရှင်ဆန့်ကျင်ရေး ပြုလုပ်ခဲ့ပါတယ်။

ဆန္ဒပြတော်လှန်ပြည်သူတွေက “အောင်လံလွှင့်မည် ရွှေရေကြည် လူထုသပိတ်” စာသား ကိုင်ဆွဲပြီးတော့ စစ်အာဏာရှင်ဆန့်ကျင်ရေး ကြွေးကြော်သံတွေ ဟစ်ကြွေးခဲ့ပါတယ်။

Public Service Announcement

ရွှေဘိုမြို့နယ်မှာလည်း သပိတ်အင်အားစုကော်မတီဝင်တွေက စစ်ဘေးရှောင်ပြည်သူတွေကို သွားရောက်ကူညီထောက်ပံ့ခဲ့တယ်လို့ သိရပါတယ်။

ရွှေဘိုမြို့နယ်အတွင်းကနေ စစ်ဘေးရှောင်ရင်း မန္တလေးဒေသကို ရောက်ရှိကာ ရွှေပြောင်းကျပန်း လုပ်ကိုင်စားသောက်နေရာမှာ ထပ်မံပြီးစစ်ဘေးရှောင်နေရတဲ့ အခက်အခဲကြုံတွေနေရသူတွေကို သွားရောက်ကူညီခဲ့တာ ဖြစ်ပါတယ်။

ဒီပဲယင်းမြို့နယ်မှာလည်း လူငယ်အဖွဲ့အစည်း-DYC မှ “စာအုပ်စာပေ လူ့မိတ်ဆွေ” ခေါင်းစဥ်နဲ့ မြို့နယ်အတွင်းရှိ ကျောင်းသား၊လူငယ်တွေ စာဖတ်စွမ်းရည်များတိုးပွားလာစေဖို့၊ အသိပညာဗဟုသုတတိုးတက်စေဖို့ ရည်ရွယ်ချက်နဲ့ ရွေ့လျားစာကြည့်တိုက်တွေ လုပ်ဆောင်ခဲ့ပါတယ်။

စစ်ကိုင်းတိုင်းအတွင်း ဒေသခံတော်လှန်ပြည်သူတွေဟာ နယ်မြေမတည်ငြိမ်တဲ့ကြားထဲကနေပဲ စစ်အာဏာရှင်ဆန့်ကျင်​ရေး လှုပ်ရှားမှုတွေကို နေ့စဉ်ပြုလုပ်နေကြပါတယ်။

ဓာတ်ပုံ – စစ်ကိုင်းဒေသသပိတ်အင်အားစု၊ ရွှေဘိုလူထုသပိတ်၊ DYC