မတ်-၂၆၊၂၀၂၆။ရောင်နီ/People’s Spring
ရန်ကုန်မြို့ မင်္ဂလာဒုံမြို့နယ် စက်မှုဇုန်ထဲက Myanmar Asia Optical စက်ရုံမှာ မီးလောင်မှုဖြစ်နေပြီး မီးလောင်ချိန် နှစ်နာရီကြာသည်အထိ ငြှိမ်းသတ်နေရဆဲဖြစ်ပါတယ်။
“ဂိုဒေါင်ထဲမှာလှိုက်လောင်နေတာ ။ Optical ဆိုတော့ မှန်ဘီလူးစက်ရုံပေါ့”လို့ မီးလောင်ပြင်ကိုရောက်ရှိနေသူတစ်ဦးကပြောပါတယ်။
ဒီနေ့ည ၁၂ နာရီကျော်မှာ မီးလောင်မှုစတင်ခဲ့တာဖြစ်ပြီး တစ်နာရီနီးပါးကြာသည်အထိ မီးမထိန်းနိုင်သေးတာကြောင့် Level 2 ယာဉ်အုပ်စုတွေနဲ့ မီးငြှိမ်းသတ်နေရတာဖြစ်ပါတယ်။
Public Service Announcement
Level 2 ယာဉ်အုပ်စုတွေနဲ့ ငြှိမ်းသတ်တာလည်း တစ်နာရီကျော်ကြာပေမယ့် မီးလောင်မှုနဲ့ အခြေအနေနဲ့ပတ်သက်ပြီး နံနက် ၂ နာရီအချိန်အထိ မီးသတ်တပ်ဖွဲ့က သတင်းထပ်မံထုတ်ပြန်ထားတာတော့မရှိသေးပါဘူး။
“စစကြားချင်းကနေ ခဏဥဩသံပြတ်သွားသေး ။ဒုတိယတစ်ဖြတ်ထပ်ကြားတော့ ဥဩအသံတန်းက ပထမတစ်ခါထပ်ပိုကြာတယ်ရော မီးပြင်းတယ်ထင်ပါ့။” လို့ ဒေသခံတစ်ဦးကပြောပါတယ်။
Level 2 အဆင့် မီးငြှိမ်းသတ်ယာဉ်တွေနဲ့ ငြှိမ်းသတ်နေတာဖြစ်လို့ ရန်ကုန်မြို့ရဲ့ မြို့နယ်တော်တော်များများက မီးသတ်ကားတွေသွားနေကြောင်း ဒေသခံတွေကပြောပါတယ်။
ညပိုင်းမှာ စက်ရုံပိတ်ထားခြင်းရှိမရှိ လူထုနွေဦးအနေနဲ့ သီးသန့် အတည်မပြုနိုင်ပေမယ့် မီးလောင်မှုကိုလာကြည့်သူတွေထဲမှာ တူညီဝတ်စုံ ဝတ်ထားသူတွေကိုတွေ့ရပါတယ်။
ဂိုဒေါင်တွေထဲမှာ မီးခိုးတွေလုံးနေတာကြောင့် မီးခိုးတွေအပြင်ထွက်ဖို့ အပေါက်တွေဖောက်ပြီးမှ မီးငြှိမ်းသတ်ဖို့ လုပ်ဆောင်နေရတယ်လို့ မီးသတ်တပ်ဖွဲ့ဝင်တစ်ဦးကပြောပါတယ်။
