ဧပြီ ၁၈၊၂၀၂၆။ဇေအောင်/People’s Spring
၂၀၂၁ နွေဦးတော်လှန်ရေးကာလအတွင်း စစ်တပ်ရဲ့မတရားဖမ်းဆီးထိန်းသိမ်းခံခဲ့ရတဲ့ နိုင်ငံရေးအကျဉ်းသားဟောင်းတွေစုပေါင်းပြီး “နွေဦးနိုင်ငံရေးအကျဉ်းသားများ အစည်းအရုံး” ကို ဧပြီ ၁၇ ရက်မှာ အသစ်စတင်ဖွဲ့စည်းလိုက်ကြောင်း အဆိုပါအသင်းက သတင်းထုတ်ပြန်ပါတယ်။
အဆိုပါ အစည်းအရုံးကို ၂၀၂၁ မြန်မာ့နွေဦးတော်လှန်ရေးမှာ အာဏာသိမ်းစစ်အုပ်စုရဲ့ မတရားဖမ်းဆီးထိန်းသိမ်းတာကို ခံခဲ့ရတဲ့ နိုင်ငံရေးအကျဉ်းသားဟောင်းတွေ ဦးဆောင်ပြီး ဖွဲ့စည်းခဲ့တာဖြစ်ပြီး အကျဉ်းထောင်တွေထဲက နိုင်ငံရေးအကျဉ်းသားတွေရဲ့ အခွင့်အရေးကို ကာကွယ်ဖို့နဲ့ မတရားဖမ်းဆီးခံထားရသူတွေ လွတ်မြောက်ရေးအတွက် ရည်ရွယ်ကြောင်း နွေဦးနိုင်ငံရေးအကျဉ်းသားများ အစည်းအရုံးက အသိပေးပါတယ်။
နွေဦးနိုင်ငံရေးအကျဉ်းသားများ အစည်းအရုံးဟာ ထောင်တွင်း ဖိနှိပ်မှုတွေကနေ ကာကွယ်ဖို့နဲ့ အခြေခံကျန်းမာရေး၊ စားဝတ်နေရေးတို့ ပြေလည်စေဖို့ ဆောင်ရွက်ခြင်း၊ တရားဖမ်းဆီးခံထားရသူတွေ အမြန်ဆုံး လွတ်မြောက်နိုင်ဖို့ ကုလသမဂ္ဂအပါအဝင် နိုင်ငံတကာ အဖွဲ့အစည်းတွေနဲ့ လက်တွဲဆောင်ရွက်ခြင်း၊ လွတ်မြောက်လာတဲ့ နိုင်ငံရေးအကျဉ်းသားဟောင်းတွေရဲ့ ရုပ်ပိုင်းနဲ့ စိတ်ပိုင်းဆိုင်ရာ နစ်နာမှုတွေကို ကူညီစောင့်ရှောက်ခြင်း၊ အသွင်ကူးပြောင်းရေးကာလ တရားမျှတမှု လုပ်ငန်းစဉ်တွေမှာ ပါဝင်ဆောင်ရွက်ခြင်းနဲ့ အခွင့်အရေး ချိုးဖောက်သူတွေကို မှတ်တမ်းတင်ထားခြင်း စတဲ့ ရည်ရွယ်ချက်တွေနဲ့ လုပ်ငန်းစဥ်တွေကို အကောင်အထည်ဖော်သွားမယ်လို့ အသိပေးပါတယ်။
Public Service Announcement
“မတရားဖမ်းဆီးခံထားရတဲ့ နိုင်ငံရေးအကျဥ်းသားတွေရဲ့ အခြေအနေတွေကို လူထုအနေနဲ့ရော တခြားသောအင်အားစုတွေအနေနဲ့ကော ပိုပြီးတော့ သိရှိလာနိုင်မယ်လို့ မျှော်လင့်တယ်။ ပြီးရင် ကျနော်တို့ရဲ့ရဲဘော်တွေ၊ ထောင်ထဲမှာရှိတဲ့ရဲဘော်တွေကော ပြန်ပြီးတော့ လွတ်မြောက်လာတဲ့ ရဲဘော်တွေကော သူတို့ရဲ့ရုပ်ပိုင်းဆိုင်ရာ စိတ်ပိုင်းဆိုင်ရာကို ပိုပြီးတော့ အားဖြည့်ပေးနိုင်မယ်လို့ ယူဆတယ်။ နောက်တချက်က နိုင်ငံရေးအကျဥ်းသားတွေအားလုံး လွတ်မြောက်ဖို့အတွက် ကြိုးစားတဲ့နေရာမှာ ပိုပြီးတော့ အားအင်တခုဖြစ်လာနိုင်မယ်လို့ ယူဆပါတယ်။”လို့ နွေဦးနိုင်ငံရေးအကျဉ်းသားများ အစည်းအရုံးရဲ့ ဦးဆောင်ကော်မတီဝင် ကိုရှင်းသန့်က ပြောပါတယ်။
အစည်းအရုံးရဲ့ ဦးဆောင်ကော်မတီဟာ အကျဉ်းထောင်တွင်း အနိုင်ကျင့်မှုတွေကို ပြည်သူလူထု သိရှိစေဖို့ သတင်းမီဒီယာတွေကနေတဆင့် အချိန်နဲ့တပြေးညီ ထုတ်ပြန်သွားမယ်လို့ သိရပါတယ်။
