ဧပြီ-၂၀၊၂၀၂၆။မိုမို/People’s Spring
မွန်ပြည်နယ်၊ရေးမြို့အခြေစိုက် အမှတ်(၁၉) စစ်ဆင်ရေးကွပ်ကဲမှုဌာနချုပ် (စကခ-၁၉)အတွင်း မနေ့က လက်နက်တိုက်မီးလောင်ပေါက်ကွဲမှုဖြစ်ခဲ့တယ်လို့သတင်းရင်းမြစ်တွေကပြောပါတယ်။
ဧပြီ ၁၉ ရက်နေ့လယ် ၃နာရီဝန်းကျင်ကစပြီး ရေးမြို့အဏ္ဏဝါရပ်ကွက်အနီးမှာရှိတဲ့ စကခ(၁၉ )ရဲ့ လက်နက်တိုက်ဟာ ၂ နာရီကျော်ကြာ မီးလောင်ပေါက်ကွဲမှုဖြစ်ခဲ့တာလို့ ဒေသခံစစ်ရေးသတင်းရင်းမြစ်က ပြောပါတယ်။
“ တိုင်းစစ်ဌာနချုပ်ဖြစ်တဲ့ အရှေ့တောင်တိုင်းစစ်ဌာနချုပ်ကနေ ရောက်လာတယ်။ ဒီကနေ့(ဧပြီ ၂၀ ရက်) သူတို့စစ်ဆေးမှုအကြီးအကျယ်လုပ်မယ်။တပ်တွင်း မပြေလည်မှုနဲ့၊နားလည်မှုလွဲတာတွေလည်းရှိတယ်လို့လည်းကြားတယ်” လို့ သူက ပြောပါတယ်။
Public Service Announcement
မီးလောင်မှုဖြစ်စဥ်အသေးစိတ်နဲ့ ထိခိုက်သေဆုံးသူ ရှိ၊မရှိကို အသေးစိတ်စိစစ်နေဆဲလို့ ဒေသတွင်း တော်လှန်ရေးတပ်ဖွဲ့တချို့က အသိပေးပါတယ်။
“ မနေ့က ဖြစ်သွားတဲ့ပေါက်ကွဲမှုက နည်းနည်း နောနောမဟုတ်ဘူး။စဖြစ်တာနဲ့ သေဆုံးထိခိုက်မှုတွေကို ကျွန်တော်တို့ အတည်ပြုမရသေးဘူး” လို့ ရေးဘီလူးတပ်ဖွဲ့ခေါင်းဆောင်က ပြောပါတယ်။
ရေးမြို့နယ်မှာစစ်ကောင်စီရဲ့အမှတ်(၁၉)စစ်ဆင်ရေးကွပ်ကဲမှုဌာနချုပ်(စကခ-၁၉)နဲ့ လက်အောက်ခံတပ်ရင်းတွေဖြစ်တဲ့ ခလရ(၆၁)၊ ခလရ (၂၉၉)၊ ခမရ(၃၄၃)၊ ခမရ -၅၈၆၊ ခမရ(၂၈၇)နဲ့အမှတ်(၃၁၆)အမြောက်တပ်ရင်း (အမတ-၃၁၆)တွေရှိပါတယ်။
လက်ရှိမှာ စစ်တပ်က ရေးမြို့နယ်အပါအဝင် ရန်ကုန်-ထားဝယ် အမှတ်(၈) ပြည်ထောင်စုလမ်းပိုင်းကို ထိန်းချုပ်ဖို့ ကြိုးစားနေတာကြောင့် ဒေသတွင်း တော်လှန်ရေးတပ်ဖွဲ့တွေနဲ့ မကြာခဏ တိုက်ပွဲတွေ ဖြစ်နေပါတယ်။
