ဧပြီ ၂၇၊ ၂၀၂၆။ထားမြတ်/People’s Spring
ကချင်ပြည်နယ်၊ မိုးညှင်းမြို့နယ် အုန်းစံဆိုင်ကျေးရွာရှိ စစ်ကောင်စီလက်အောက်ခံ SNA တပ်စခန်း ၂ခုကို ကချင်လွတ်လပ်ရေးတပ်မတော်(KIA)နဲ့ ရှမ်းနီတော်လှန်ရေးတပ်(SSIA)တို့ ပူးပေါင်းတိုက်ခိုက်သိမ်းပိုက်ခဲ့ကြောင်း ကချင်စစ်ရေး သတင်းရင်းမြစ်က ပြောပါတယ်။
အုန်းစံဆိုင်ကျေးရွာရှိ SNA စခန်း ၃ခု အနက် ၂ခုကို KIAနဲ့ SSIA(Shan Shanni Independence Army)က ဧပြီ ၂၃ရက်မှာ သိမ်းပိုက်နိုင်ခဲ့တယ်လို့ဆိုပါတယ်။
“လက်နက်ရ တိုက်ပွဲဆက်ဖြစ်တာမရှိ” လို့ ကချင်စစ်ရေးသတင်းရင်းမြစ်က ပြောပါတယ်။
Public Service Announcement
KIAနဲ့ အတူတိုက်ပွဲဝင်ခဲ့တဲ့ SSIA တပ်ဟာ နွေဦးတော်လှန်ရေးမှာ ပေါ်လာတဲ့ ရှမ်းနီတပ်ဖွဲ့ဖြစ်တယ်လို့လည်း ပြောပြပါတယ်။
” စခန်းသိမ်းတဲ့နေ့က တိုက်ပွဲဆူညံနေတာပဲ။ လူတွေက အကုန်အထုပ်တွေပြင်ထားကြတာ။ အခုတော့ ပြန်ငြိမ်သွားပြီ”လို့ မိုးညှင်မြို့ခံတစ်ဦးက ပြောပါတယ်။
စခန်းသိမ်းနိုင်မှု အခြေအနေအပါအဝင် မိုးညှင်းဒေသ စစ်ရေးအခြေအနေတွေမေးမြန်းဖို့ KIO/KIA သတင်းပြန်ကြားရေး တာဝန်ခံ ဗိုလ်မှူးကြီးနော်ဘူထံ ဆက်သွယ်ထားဆဲဖြစ်ပြီး အဆက်အသွယ်မရသေးပါဘူး။
KIAဟာ ဧပြီ ၂၃ရက်မှာပဲ ကချင်ပြည်နယ် ရွှေကူမြို့ ၅လမ်းဆုံ က စစ်ကောင်စီ စခန်းကို သိမ်းပိုက်ခဲ့ပါတယ်။ဧပြီလဆန်းပိုင်းကလည်း ဖားကန့်ဒေသရှိ စစ်ကောင်စီ စခန်းနေရာအချို့ကို သိမ်းပိုက်နိုင်ခဲ့ပါသေးတယ်။
(ကချင်လွတ်လပ်ရေးတပ်မတော်(KIA)က ရဲဘော်တစ်ဦးကို တွေ့ရစဉ်။ ဓာတ်ပုံ – Getty Images)
