ဇွန်-၁၇၊၂၀၂၆။စိုင်းနောင်/People’s Spring
စစ်မှုထမ်းဖို့အတွက် စစ်တပ်က ပေါ်တာဆွဲဖမ်းဆီးထားသူ ၇ဦး ထွက်ပြေးလွတ်မြောက်လာတဲ့အတွက် ကူညီစောင့်ရှောက်ထားတယ်လို့ ရေဦးမြို့နယ်ပြည်သူ့ကာကွယ်ရေးအဖွဲ့(ပကဖ)က သတင်းထုတ်ပြန်ပါတယ်။
စစ်မြေပြင်ကို လိုက်ဖူးတဲ့သူတချို့အပါအဝင် သက်လတ်ပိုင်းအမျိုးသား ၇ဦးဟာ တော်လှန်ရေးတပ်တွေထံ ချိတ်ဆက်ပြီး ထွက်ပြေးလာတာလို့ သိရပါတယ်။
” ၆ယောက်က ၁စု၊ ၁ယောက်က ၁စု ထွက်ပြေးလာတာပါ။ အိမ်ထောင်ရှိသူတချို့လည်း ပါတယ်။ သူတို့က သူတို့ဒေသကို ပြန်သွားလို့ မရတော့ဘူးဆိုတော့ လောလောဆယ် ကျတော်တို့ ထိန်းချုပ်ဒေသမှာပဲ အလုပ်အကိုင်ရှာပေးရမှာပေါ့”လို့ ရေဦးမြို့နယ်ပြည်သူ့ကာကွယ်ရေးအဖွဲ့က တာဝန်ရှိသူတစ်ဦးကပြောပါတယ်။။
Public Service Announcement
ထွက်ပြေးလာသူတွေဟာ အသက် ၃၀ခန့်အရွယ်အမျိုးသားတွေဖြစ်ပါတယ်။ သူတို့ထဲမှာ စစ်ကိုင်းတိုင်းအတွင်း စစ်ကောင်စီရဲ့လဝကရုံးမှာ မှတ်ပုံတင်သွားလုပ်ရင်းစစ်မှုထမ်းစုဆောင်းခံရသူ၊ အိမ်မှာနေရင်းညဘက် ဝင်ဖမ်းပြီးစစ်သားစုဆောင်းခံရသူတွေပါတယ်လို့ သိရပါတယ်။
စစ်တပ်က စစ်မှုထမ်းဥပဒေကိုအသုံးပြုပြီး ဒေသပေါင်းစုံမှာ အတင်းအကျပ်စစ်သားစုဆောင်းတာတွေပြုလုပ်နေပါတယ်။ တော်လှန်ရေးတပ်ဖွဲ့တွေထိန်းချုပ်ထားတဲ့မြို့နယ်တွေကို စစ်တပ်က စစ်မှုထမ်းသင်တန်းဆင်းအင်အားတွေအများအပြားသုံးပြီး စစ်ကြောင်းထိုးနေပါတယ်။
စစ်တပ်ဟာ စစ်မှုထမ်း အပတ်စဥ် (၂၆)ကို စတင်နေပြီဖြစ်ကြောင်း သိရပါတယ်။
