ဇွန်-၂၄၊၂၀၂၆။ဇော်ရန်း/People’s Spring
ရန်ကုန်မြို့မှာဇွန်လ၂၄ရက်မနက် ၁၀နာရီ ၄ဝမိနစ်ခန့်နဲ့ ၁၀နာရီ ၅၅မိနစ်ခန့်မှာ ငလျင်လှုပ်သလို မြေလွှာလှုပ်ရှားမှုဖြစ်ပေါ်ခဲ့တယ်လို့ မြို့ခံတွေကပြောပါတယ်။
သာကေတ၊ သုဝဏ္ဏ၊ တာမွေနဲ့ မင်္ဂလာဒုံမြို့နယ်ကအထက်မြင့်အဆောက်အအုံတွေကနေ မြေလွှာလှုပ်ရှားမှုကိုခံစားလိုက်ရတယ်လို့ ဒေသခံတွေကပြောပါတယ်။
” ခြောက်ထပ်ရဲ့အပေါ် ဆုံးထပ်ကနေသိလိုက်တာ။တချက်တည်းပဲ။ငလျင်သတင်းလည်း အခုထိမတွေ့ရသေးဘူး”လို့ ဇွန် ၂၄ရက်မနက် ၁၀နာရီ ၄ဝမိနစ်ခန့်မှာ ခံစားလိုက်ရတဲ့ မြေလွှာလှုပ်ရှားမှုအပေါ်တာမွေမြို့နယ်မှာ နေထိုင်သူတဦးကပြောပါတယ်။
Public Service Announcement
အဲဒီလိုမြေလွှာလှုပ်ရှားပြီး ၁၅ မိနစ်ခန့်အကြာ မနက် ၁၀နာရီ ၅၅မိနစ်ခန့်မှာ နောက်တကြိမ်ထပ်မံလှုပ်ရှားခဲ့တယ်လို့ တာမွေမြို့နယ်မှာနေသူတစ်ဦးကပြောပါတယ်။
ငလျင်သတင်းတွေ ထုတ်ပြန်ပေးနေတဲ့ အမေရိကန်ဘူမိလေ့လာရေး အသင်း(USGS)၊ထိုင်းမိုးဇလဌာန(TMD)၊အမျိုးသားညီညွတ်ရေးအစိုးရ၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA) နဲ့ စစ်ကောင်စီရဲ့ မိုးဇလဌာနကလည်း ဒီနေ့မနက်ပိုင်းမှာ ရန်ကုန်မြို့နဲ့ ပတ်သက်တဲ့ ငလျင်သတင်း ထုတ်ပြန်ထားခြင်းမရှိပါဘူး။
ပြီးခဲ့တဲ့ဇွန်လ၆ရက်မနက်ပိုင်းကလည်း လှိုင်မြို့နယ်မှာ ငလျင်လှုပ်သလို မြေလွှာလှုပ်ရှားမှုကြောင့် မြေကျွံသလို ကျယ်လောင်တဲ့အသံကြီးထွက်ပြီး ၊မြေလွှာလှုပ်ရှားတာကိုခံစားလိုက်ရတယ်လို့ ဒေသခံတွေကပြောပါတယ်။ဒါပေမယ့် မြေကျွံကြတာမျိုး မတွေ့ရသလို ၊မြေငလျင်လှုပ်တယ်လို့လည်းသတင်းမထုတ်ပြန်တဲ့အတွက်ဒေသခံတွေကြ စိုးရိမ်ခဲ့ကြရပါတယ်။အကြောင်းရင်းမသိရဘဲ မြေလွှားလှုပ်ရှားမှုဖြစ်နေတဲ့အပေါ် ရန်ကုန်မြို့ခံတွေအကြား စိုးရိမ်မှုတွေရှိနေပါတယ်။
ရန်ကုန်မြို့လို မြို့ပြဧရိယာ (Urban Areas) တွေမှာလူဦးရေထူထပ်လာခြင်း၊ စက်မှုလက်မှုလုပ်ငန်းများပြားလာခြင်းနဲ့ အများပြည်သူသုံး ရေပေးဝေမှု မလုံလောက်ခြင်းတို့ကြောင့် မြေအောက်ရေ (Groundwater) ကို အလွန်အမင်း ထုတ်ယူသုံးစွဲတဲ့အခါ မြေကျွံစေတဲ့အခြေအနေတွေ သတိထားဖို့လိုတယ်လို့ မြေအောက်ရေ ၊ဘူမိဗေဒနဲ့ပတ်သက်ပြီး ကျွမ်းကျင်သူတွေက အရင်ကတည်းကသတိပေးခဲ့ဖူးပါတယ်။
ရန်ကုန်မြို့ဟာ ဒေးဒရဲ ပြတ်ရွှေ့ကြောင့်ငလျင်လှုပ်ရှားနိုင်သလို ရန်ကုန်မြစ်ဝအနီးရှိ ပြတ်ရွေ့တွေနဲ့ ထိုးစိုက်ဇုန်ကြောင့်လည်း ငလျင်လှုပ်နိုင်တယ်လို့ပညာရှင်တွေက ပြောပါတယ်။ပဲခူးမြို့အနီးက စစ်ကိုင်းပြတ်ရွေ့ရဲ့တောင်ဘက်စွန်းပိုင်းလှုပ်ရှားပါကလည်း ရန်ကုန်မြို့မှာ ငလျင် လှုပ်စေပါတယ်။
ရန်ကုန်တိုင်းနဲ့ဆက်စပ်နေတဲ့ကမ်းရိုးတန်းဒေသတွေမှာမေလအတွင်းငလျင်မကြာခဏလှုပ်ရှားခဲ့ပါတယ်။ကွမ်းခြံကုန်းမြို့အနီး မြန်မာ့ကမ်းရိုးတန်းအနီးမှာ မေလ ၂၂ရက်ကရစ်ခ်တာစကေး ၄.၂ အဆင့်ရှိတဲ့ ငလျင်၊ မေလ ၁၈ရက် မနက်ကကျောက်တန်းမြို့အနီးမြန်မာ့ကမ်းရိုးတန်းမှာ မြေအောက်အနက် ၁၀ ကီလိုမီတာခန့်ကိုဗဟိုပြုပြီး ရစ်ခ်တာစကေး ၅ဒဿမ၃အဆင့်ငလျင်၊ လှုပ်ခဲ့လို့ ရန်ကုန်မြို့မှာသိသိသာသာခံစားခဲ့ရပါတယ်။ဇွန်လ ၁၄ ရက် ည နေကလည်း ရန်ကုန်တိုင်း၊ သန်လျင်မြို့နယ်အတွင်း၊ မြေအောက်အနက် ၁၀ ကီလိုမီတာခန့်ကိုဗဟိုပြုပြီး ရစ်ခ်တာစကေး ၄ဒဿမ၁အဆင့် ငလျင်လှုပ်ခဲ့ပါတယ်။
