ဇွန်-၂၉၊၂၀၂၆။သတိုး/People’s Spring
လူထုခေါင်းဆောင်ဒေါ်အောင်ဆန်းစုကြည် အသက်ရှင်ကြောင်း သက်သေပြဖို့တောင်းဆိုတဲ့ Proof Of Life ကမ်ပိန်း ရက် ၇၀ ပြည့်သည်အထိ စစ်တပ်ဘက်က တုံ့ပြန်မှုမရှိတာကြောင့် ကမ်ပိန်းအရှိန် မြှင့်မယ်လို့ All In One Piece Movement က အသိပေးထားပါတယ်။
“ယခုထက်ပိုမိုပြင်းထန်ထိရောက်သော အစီအစဉ်များဖြင့် ဆက်လက်တောင်းဆိုရန် စီစဉ်လျက်ရှိပါသည်။ပြည်သူများအနေဖြင့် ကျွန်ုပ်တို့နှင့် ပူးပေါင်းပါဝင်နိုင်ကြဖို့အတွက် အစီအစဉ်များကိုလည်း ဆက်လက်ထုတ်ပြန်သွားမည်” လို့ ကြေညာထားပါတယ်။
အဲဒီကမ်ပိန်းကို ဒေါ်အောင်ဆန်းစုကြည်ရဲ့ သားငယ်ကိုထိန်လင်း(ခ)ကင်မ်အဲရစ်က ဦးဆောင်တောင်းဆိုနေတာဖြစ်ပြီး ပြည်တွင်း၊ပြည်ပက ပြည်သူတွေက တခဲနက်တောင်းဆို ပါဝင်နေကြတာပါ။
Public Service Announcement
ဒါပေမယ့်လည်း စစ်တပ်ဘက်က လက်ရှိအချိန်အထိ ဒေါ်အောင်ဆန်းစုကြည် သက်ရှိထင်ရှားရှိကြောင်း သက်ပေပြဖို့ တစ်စုံတစ်ရာ ထုတ်ပြန်တာမျိုးမရှိသေးတာပါ။
ပြီးခဲ့တဲ့ မေလ ၁ ရက်က ဒေါ်အောင်ဆန်းစုကြည်ကို နေပြည်တော်အကျဉ်းထောင်ကနေ သတ်မှတ်ထားတဲ့နေအိမ်ကို ပြောင်းရွှေ့ခဲ့တယ်လို့ ဓာတ်ပုံနဲ့ သတင်းထုတ်ပြန်ခဲ့ပေမယ့် အဲဒီဓာတ်ပုံက လက်ရှိကာလကို ရိုက်ကူးထားခြင်း ဟုတ်၊မဟုတ် ဘယ်သူမှအတည်မပြုနိုင်ပါဘူး။
ဇွန်လ ၁၉ ရက်မှာ (၈၁)နှစ်ပြည့်ခဲ့တဲ့ ဒေါ်အောင်ဆန်းစုကြည်အတွက် ပြည်တွင်း၊ပြည်ပက မွေးနေ့ဆုတောင်းပွဲတွေ ပြုလုပ်ပေးခဲ့ကြပြီး Proof Of Life ကမ်ပိန်းအတွက်လည်း တောင်းဆိုမှုတွေပြုလုပ်ပေးခဲ့တာပါ။
ဒေါ်အောင်ဆန်းစုကြည်ကို စစ်တပ်က အာဏာသိမ်းတဲ့ ၂၀၂၁ ဖေဖော်ဝါရီ ၁ ရက်ကတည်းက မတရားဖမ်းဆီးခဲ့တာဖြစ်ပြီး လက်ရှိအချိန်အထိ ဖမ်းဆီးထားတာ ၁၉၇၅ ရက်ရှိပါပြီ။
