ဇူလိုင် – ၁၀ ၊၂၀၂၆ /People’s Spring
စစ်ကိုင်းတိုင်းအထက်ပိုင်း အင်းတော်မြို့နယ်အတွင်း အာဏာသိမ်းစစ်တပ်နဲ့ တော်လှန်ရေးတပ်ဖွဲ့တွေ နေ့စဉ်နီးပါးတိုက်ပွဲဖြစ်နေတာကြောင့် ကုန်ကားတွေပိတ်မိနေပြီးကုန်တွေပျက်စီးဆုံးရှုံးမှုရှိနေတယ်လို့ ဒေသခံအချို့ဆီကသိရပါတယ်။
တိုက်ပွဲတွေကြောင့်မြစ်ကြီးနား – မန္တလေးကားလမ်းပိုင်းမှာခရီးသွားကားတွေပိတ်မိရာကုန်စိမ်းနဲ့ အေးခဲအသား ၊ငါးသယ်ယူတဲ့ကုန်ကားတွေပါ ပိတ်မိခဲ့တာပါ။
ပိတ်မိနေတဲ့ကုန်ကားတွေuပုပ်သိုးကုန်တွေကိုဒေသခံတွေအကူအညီနဲ့ စွန့်ပစ်ရသလိုရှိနေသလိုအခြားသောစားကုန်တွေကိုလည်းနီးစပ်ရာရွာတွေမှာ စျေးလျော့ပြီး ရောင်းချနေရတယ်လို့သိရပါတယ်။
Public Service Announcement
“အနံတွေဆိုးလာတော့ဆိုင်ကယ်ဘေးတွဲနဲ့ တခြားနေရာတွေသွားစွန့်ပစ်နေရတာ” ဒေသခံတစ်ဦးကပြောပါတယ်။
ပိတ်မိနေတဲ့ကုန်တွေထဲမှာမီးဖိုချောင်သုံးစားကုန်ဖြစ်တဲ့ ကြက်သွန်နီ ၊ ခရမ်းချဉ်သီး၊ ငရုတ် ၊ ကြက်သွန်ဖြူ တဲ့ အသီးအနှံတွေ ပါဝင်တယ်လို့ သိရပါတယ်။
အဲဒီကုန်ပစ္စည်းတွေကစစ်ကိုင်းတိုင်းအထက်ပိုင်းကသာနဲ့ကချင်ပြည်နယ်မြို့တော်မြစ်ကြီးနားဆီ ပို့ဆောင်ဖို့ ရည်ရွယ်ထားတာပါ။
မန္တလေး -မြစ်ကြီးနားလမ်းပိုင်းမှာပြီးခဲ့တဲ့ဇွန်လကုန်ပိုင်းကလည်း မန္တလေးတိုင်း၊သပိတ်ကျင်းခရိုင်ထဲက တကောင်းမြို့နယ်အတွင်း တိုက်ပွဲဖြစ်ပြီးလမ်းပိတ်ခဲ့ပါတယ်။
အာဏာသိမ်းစစ်တပ်ဟာစစ်ကိုင်းတိုင်းနဲ့ ကချင်ပြည်နယ်အစပ်နေရာတွေဖြစ်တဲ့အင်းတော် ၊ကသာ ၊ထီးချိုင့်မြို့နယ်တွေကိုအလုံးစုံထိန်းချုပ်နိုင်ဖို့ ကြိုးပမ်းနေပေမယ့် တော်လှန်ရေးတပ်တွေရဲ့ တွန်းလှန်တိုက်ခိုက်မှုတွေ ရှိနေပါတယ်။
ပြီးခဲ့တဲ့ မေလအစောပိုင်းမှာတော့ စစ်ကိုင်းနဲ့ ကချင်အစပ် အင်းတော်မြို့နဲ့ မော်လူးမြို့တွေကို စစ်တပ်က ပြန်လည်ထိန်းချုပ်နိုင်ခဲ့တာပါ။
ဒါအပြင် မန္တလေး – မြစ်ကြီးနား လမ်းကြောင်းပေါ် ကမြို့အချို့ကိုပြန်ထိန်းချုပ်လာပြီးနောက် ကချင်ပြည်နယ်မြို့တော် မြစ်ကြီးနားမြို့ဆီ ကုန်လမ်းကနေ စားနပ်ရိက္ခာနဲ့ထောက်ပံ့ရေးပစ္စည်းတွေကိုစစ်တပ်က စစ်ယာဉ်တန်းနဲ့ ပေးပို့တာတွေရှိလာပါတယ်။
မြစ်ကြီးနားမှာတော့ အာဏာသိမ်းစစ်တပ်ရဲ့ မြောက်ပိုင်းတိုင်းစစ်ဌာနချုပ် တည်ရှိတာပါ။
