ဇူလိုင်-၁၁၊၂၀၂၆။ရောင်နီ/People’s Spring
ရန်ကုန်မြို့၊လှိုင်မြို့နယ် ရွာမကွေ့ မှတ်တိုင်မှာ YBS(၂၂)တစ်စီး မီးခိုးတွေထွက်လာလို့ ကားတံခါးချက်ချင်းဖွင့်မပေးတာကြောင့် ခရီးသည်တွေက ကားပေါ်ကဆင်းဖို့ မှန်တွေရိုက်ခွဲဆင်းပြေးခဲ့ရတယ်လို့ သိရပါတယ်။
ဇူလိုင် ၁၀ရက် ည ၇ နာရီလောက်က YBS(၂၂) ယာဉ်တစ်စီး ဝါယာရှော့ဖြစ်ကာ မီးလောင်ပြီး ဂက်စ်ယိုစိမ့်မှုတွေဖြစ်ခဲ့တာကြောင့် ခရီးသည်တွေက ကားတံခါးဖွင့်ပေးခိုင်းပေမယ့် မဖွင့်ပေးခဲ့တာကြောင့် မှန်တွေကို ရိုက်ခွဲပြေးခဲ့ရတယ်လို့ ခရီးသည်တစ်ဦးက ရင်ဖွင့်ထားတာပါ။
ဗီဒီယိုဖိုင်နဲ့ ဓာတ်ပုံမှတ်တမ်းတွေအရ ကားထဲမှာ မီးခိုးထွက်နေတာကို အတည်ပြုနိုင်ပေမယ့် ဝါယာရှော့ဖြစ်ကာ မီးလောင်ခဲ့တာနဲ့ ဂက်စ်ယိုစိမ့်မှုရှိ၊မရှိကိုတော့ လူထုနွေဦးအနေနဲ့ သီးသန့် အတည်မပြုနိုင်ပါဘူး။
Public Service Announcement
ခရီးသည်တွေက ကားပြတင်းပေါက် မှန်တွေကို ရိုက်ခွဲဆင်းခဲ့ရတာကြောင့် တချို့ခရီးသည်တွေ ဒဏ်ရာရရှိတာတွေရှိတယ်လို့လည်း ဆိုပါတယ်။
ရှေ့တံခါးကို ကားပေါ်က ဆင်းလာတဲ့အမျိုးသားတွေ ဝိုင်းပြီးဆွဲဖွင့်ပေးတာကြောင့် ပွင့်သွားခဲ့တာကို ဖေ့စ်ဘွတ်ခ်အသုံးပြုသူတစ်ဦး တင်ထားတဲ့ ဗီဒီယိုဖိုင်မှာတွေ့မြင်ရပါတယ်။
အဲဒီဖြစ်စဉ်မှာ ကားပေါ်မှာ မီးခိုးလုံးတွေထွက်လာချိန် တံခါးမဖွင့်ပေးတဲ့ ယာဉ်မောင်းကို ပြစ်တင်ဝေဖန်ထားကြပါတယ်။
“သက်ဆိုင်ရာမှ ယခုဖြစ်စဥ်ကို နမူနာယူ၍ ကားများကို အများပြည်သူ အသုံးပြုရန် သင့်မသင့် မီးသတ်ဆေးဘူး ထားရှိမှု ၊အကယ်၍ အရေးပေါ်ဖြစ်လျင် ခရီးသည်များအတွက် အရေးပေါ်ထွက်ပေါက် မှန်ခွဲတံများပါထားရှိပေးရန် လိုအပ်ပါကြောင်း တင်ပြအပ်ပါသည်။” လို့ ခရီးသည်တစ်ဦးက အကြံပြုထားပါတယ်။
ရန်ကုန်မြို့မှာ ပြေးဆွဲနေတဲ့ YBS ယာဉ်တွေထဲမှာ သက်တမ်းကုန်နေတဲ့ ယာဉ် ၊ ပျက်စီးမှုတွေကို မပြင်ဆင်ပဲ ပြေးဆွဲနေတဲ့ ယာဉ် တွေ အများအပြားရှိနေတယ်လို့ ခရီးသည်တွေက ပြောထားပါတယ်။
