ဇူလိုင်-၁၄၊၂၀၂၆။ဇော်၀င်း/People’s Spring
အာဆီယံနိုင်ငံတွေမှာ မြန်မာတစ်နိုင်ငံတည်း နိုင်ငံခြားရင်းနှီးမြှုပ်နှံမှု(FDI) ကျဆင်းနေတယ်လို့ ကုလသမဂ္ဂကုန်သွယ်မှုနဲ့ဖွံ့ဖြိုးတိုးတက်ရေးကွန်ဖရင့်(UNCTAD)ရဲ့ အစီရင်ခံစာထုတ်ပြန်ချက်မှာ ဖော်ပြပါတယ်။
အခုဇူလိုင်ပထမပတ်က UNCTAD ရဲ့ World Investment Report ရဲ့အရှေ့တောင်အာရှနိုင်ငံတွေမှာ တီမော၊ လာအို၊ကမ္ဘောဒီးယား၊ဘရူနိုင်း၊အင်ဒိုနီးရှား၊မလေးရှာ၊စင်ကာပူ၊ထိုင်၊ဗီယက်နမ် နဲ့ ဖိလစ်ပိုင် နိုင်ငံတွေက နိုင်ငံခြားရင်းနှီးမြှုပ်နှံမှုတွေ တိုးလာနေတယ်လို့ ဆိုပါတယ်။
ကိန်းဂဏန်းတွေအရ ထိုင်း၊စင်ကာပူနဲ့ မလေးရှားက နိုင်ငံခြားရင်းနှီးမြှုပ်နှံမှု သိသိသာသာတိုးလာနေပြီး မြန်မာဟာ ပြီးခဲ့တဲ့ ၅နှစ်ရဲ့ ထက်၀က်ပမာဏပဲရှိ ပါတော့တယ်။
Public Service Announcement
” အရင်တုန်းက နိုင်ငံခြားရင်းနှီးမြှုပ်နှံမှုတွေဟာ လုပ်ခလစာနည်းတဲ့ နိုင်ငံတွေနဲ့ ထုတ်လုပ်မှုကုန်ကျစရိတ်သက်သာတဲ့ နိုင်ငံတွေကို အဓိကရွေးချယ်ခဲ့ကြပေမယ့် ဒီကနေ့မှာတော့ နိုင်ငံတွေရဲ့တည်ငြိမ်မှု၊နည်းပညာ၊အစိုးရပံ့ပိုးမှုနဲ့ တိကျတဲ့မူဝါဒတွေက ရင်းနှီးမြှုပ်နှံမှုကိုပို သက်ရောက်လာနေတယ်”လို့ UNCTAD ရဲ့အစီရင်ခံစာမှာ ပါရှိပါတယ်။
ပြည်ပရင်းနှီးမြှုပ်နှံမှုတွေဟာ နည်းပညာကျွမ်းကျင်တဲ့ လူသားအရင်းအမြစ်၊ ရင်းနှီးမြှုပ်နှံသူတွေအတွက် တည်ငြိမ်တဲ့ စွမ်းအင်ကဏ္ဍနဲ့ ဒစ်ဂျစ်တယ်စီးပွားရေးရဲ့ အခြေခံကျောရိုးတွေရှိတဲ့ နိုင်ငံတွေကို ဗဟိုပြုလာတယ်လို့ အကြံပြုထားပါတယ်။
” ဒေသတွင်းနိုင်ငံတွေနဲ့ ပြိုင်ဆိုင်နိုင်စွမ်း လျော့နည်းလာနေတယ်။ဒါဟာအရှိတရားဖြစ်တယ်။ပြည်ပက ပိတ်ဆို့မှုဆိုတာတွေထက် အဘက်ဘက်က တည်ငြိမ် မှုမရှိတဲ့အခါ ဘယ်သူမှ ၀င်လာမှာလည်းမဟုတ်သလို အလုပ်အကိုင်ရှားပါးမှုကပိုဆိုးလာမှာပဲ”လို့ စီးပွားရေး ပညာရှင်တစ်ဦးက ပြောပါတယ်။
ရင်းနှီးမြှုပ်နှံမှုနဲ့ ကုမ္ပဏီများညွှန်ကြားမှုဦးစီးဌာန (DICA)ရဲ့ နောက်ဆုံးထုတ်ပြန်ထားတဲ့ အချက် အလက်တွေအရ ၂၀၂၅-၂၆ ဘဏ္ဍာနှစ် တစ်ခုလုံးမှာ နိုင်ငံခြားရင်းနှီးမြှုပ်နှံမှုက ဒေါ်လာ ၅၀၀ ၀န်းကျင်ပဲ ရှိပါတယ်။
အဲဒီ ပမာဏက စစ်တပ်အာဏာမသိမ်းခင် ၂၀၂၀ကနဲ့ယှဉ်ရင် ၁၀ ပုံတစ်ပုံ နီးပါးလျော့ကျသွားတာဖြစ်ပါတယ်။
၂၀၂၁နောက်ပိုင်း မြန်မာနိုင်ငံမှာ ၀င်ရောက်ခဲ့တဲ့ ရင်းနှီးမြှုပ်နှံတဲ့နိုင်ငံတွေ တဖြည်းဖြည်းလျော့နည်းလာပြီး တရုတ်နဲ့ စင်ကာပူနိုင်ငံပဲ အဓိကကျန်ရှိပါတယ်။
