ဒီးမော့ဆိုမြို့အနီးတိုက်ပွဲ တော်လှန်ရေး ရဲဘော် ၂ဦး ကျဆုံး

ဇူလိုင်- ၁၉၊၂၀၂၆။ဇော်၀င်း/People’s Spring

ကရင်နီပြည်နယ်၊ ဒီးမော့ဆိုမြို့အနီးတိုက်ပွဲမှာ တော်လှန်ရေး ရဲဘော် ၂ဦးကျဆုံးခဲ့တယ်လို့ အမှတ်(၁၁၀၉)တပ်ရင်းက ဒီကနေ့ ညပိုင်းမှာ ထုတ်ပြန်ပါတယ်။

ဒေါငံခါးကျေးရွာ ရှေ့တန်းစစ်မျက်နှာမှာ စစ်တပ်ကို ခုခံရင်း ရဲဘော်ဖိုးသား (ခ) ရန်နိုင်ထွန်းနဲ့ ရဲဘော် ဝင်သိန်းတို့ဟာ အခုဇူလိုင် ၁၈ ရက်နဲ့ ၁၉ ရက် တိုက်ပွဲအတွင်းမှာ ကျဆုံးခဲ့တာလို့ ဆိုပါတယ်။

“တိုက်ပွဲက အတော်ကြမ်းတယ်။ကျသွားတဲ့ ရဲဘော်တစ်ယောက်ရဲ့ ခန္ဓာကိုယ်က ပြန်မရခဲ့ဘူး”လို့ ဒေါငံခါး တိုက်ပွဲအခြေအနေကို သိရှိသူတစ်ဦးက ပြောပါတယ်။

Public Service Announcement

ဒေါငံခါးကျေးရွာဟာ လွိုင်ကော်-ဒီးမော့ဆို လမ်းဆုံ အနီးမှာရှိပြီး ဖရူဆိုမြို့နယ်က အခြေစိုက်တပ်တွေကိုချိတ်ဆက်ဖို့ အရေးပါတဲ့ နေရာတစ်ခုလို့ အသိပေးပါတယ်။

ဒါကြောင့် စစ်တပ်ဟာ အလုံးစုံထိန်းချုပ်နိုင်ဖို့ မကြာခဏ အင်အားအလုံးအရင်းနဲ့ စစ်ကြောင်းထိုးနေပြီး အခုလထဲမှာပဲ ထိတွေ့မှုများစွာရှိတယ်လို့ မြေပြင်ရဲဘော်တွေက ပြောပါတယ်။

စစ်တပ်က ဒေါငံခါးရွာ ဘုရားကျောင်းဝင်းမှာ တပ်စွဲထားပြီး နယ်မြေထပ်ချဲ့နိုင်ဖို့ လက်နက်ကြီးနဲ့ ဒရုန်း တိုက်ခိုက်မှုတွေ လုပ်နေပါတယ်။

နှစ်သက်တမ်း ၆၀ကျော်ရှိတဲ့ ဒေါငံခါးဘုရား ကျောင်းဝင်းက သီလရှင်ကျောင်းဆောင်တွေကို စစ်တပ်က မေလ ၁၃ ရက်မှာ မီးရှို့ဖျက်ဆီးခဲ့ပါ‌သေးတယ်။

ကျောင်းဆောင်တွေကို မီးရှို့တာက ဒီးမော့ဆိုမြို့ အခြေစိုက် ခလရ(၁၀၂)၊ ခမရ(၄၂၇)တပ်ရင်းနဲ့ စစ်တပ်လက်အောက်ခံ ပအိုဝ်းပြည်သူ့စစ် PNOတွေလို့ တော်လှန်ရေးတပ်ဖွဲ့ဝင်တချို့က ပြောထားပါတယ်။

ပြီးခဲ့တဲ့နှစ် ၂၀၂၅ ဩဂုတ်လပိုင်းမှာ စစ်တပ်က အင်အားအလုံးအရင်းနဲ့ စစ်ကြောင်းထိုးလာပြီးနောက် ဒီးမော့ဆိုမြို့ပေါ်က နေရာအများစုကို ပြန်လည်ထိန်းချုပ်ခဲ့ပါတယ်။အဲဒီနောက်ပိုင်း မြို့အနီးပတ်ဝန်းကျင်နေရာတွေကို အထိုင်ချတပ်စွဲ ပြီး စစ်ကြောင်းထိုးတာ၊ လက်နက်ကြီးနဲ့ ပစ်ခတ်မှုတွေ မကြာခဏ ရှိပါတယ်။