သားဖြစ်သူပေါ်တာဆွဲခံရလို့ စစ်သားစုဆောင်ရေးတပ်ကိုသွားရှာတဲ့ ဖခင်ကိုပါ စစ်တပ်ကဖမ်းထား

ဇူလိုင်-၂၄၊၂၀၂၆။တာရာ/People’s Spring

ရန်ကုန်မြို့မှာဇူလိုင် ၂၂ ရက်ညက သားဖြစ်သူအလုပ်မှအပြန်ပေါ်တာဆွဲခံရတာကြောင့် ဖခင်ဖြစ်သူကတညင်းကုန်းမှာရှိတဲ့စစ်သားစုဆောင်းရေးတပ်ကို သွားရောက်စုံစမ်းမေးမြန်းခဲ့ရာ ဖခင်ကိုပါ စစ်တပ်ကထပ်မံဖမ်းဆီးလိုက်ပါတယ်။

အသက် ၂၅ နှစ်အရွယ်လူငယ်တဦးဟာဇူလိုင် ၂၂ ရက်ညပိုင်းကအလုပ်မှအပြန် ဆူးလေကနေ မြောက်ဒဂုံသို့ပြန်လာစဥ် ကျောင်းလမ်းမှတ်တိုင် အနီးမှာ ဖမ်းဆီးခံရတာဖြစ်တယ်လို့ ဖြစ်စဥ်သိသူအချို့က​ပြောပါတယ်။

သားဖြစ်သူ​ပေါ်တာဆွဲခံရတာ​ကြောင့်ဖခင်ဖြစ်သူက ​နောက်တစ်ရက်မှာအင်းစိန်မြို့နယ် တညင်းကုန်းမှာရှိတဲ့ အမှတ်(၁)စစ်သားစုဆောင်းရေးတပ်ထံသွားပြီးသတင်းစုံစမ်းခဲ့ပါတယ်။ သားဖြစ်သူ သတင်းလာစုံစမ်းတဲ့ အသက် ၅၆ နှစ်အရွယ်ဖခင်ဖြစ်သူကိုပါ စစ်တပ်ကထပ်မံဖမ်းဆီးခဲ့တာဖြစ်တယ်လို့ သိရပါတယ်။

Public Service Announcement

“သူက YBS ၁၂ ကိုအမြဲစီးတာ။ ဘာလို့ဆိုအဲဒီကားကပဲ ည ၈ နာရီခွဲအထိပဲရှိတာလေ။ အဲဒီတော့သူအလုပ်ဆင်းချိန်နဲ့ကွက်တိဆိုတော့ အဲဒီကားကိုပဲစီးတာ။ အဲဒီနေ့က ကယ်ရီသမားတစ်ယောက်ကတွေ့လိုက်တာ။ ကားပေါ်ကို ကောင်လေးတစ်ယောက်ဆွဲခေါ်ခံရတယ်။ ဘတ်စ်ကားပေါ်ကဆင်းပြီး အိမ်ကိုလမ်းလျှောက်နေချိန်။ အိမ်စီးကားနဲ့ပဲဖမ်းခေါ်သွားတာ။သူ့အိမ်ကတော့သူ့သားမှန်းမသိသေးဘူး။ နောက်တစ်ရက်ကျတော့ လိုက်စုံစမ်းရင်းနဲ့မှသူတို့သားဖြစ်နေတော့ နီးစပ်ရာကိုလိုက်စုံစမ်းကြတာပေါ့။ အုပ်ချုပ်ရေးမှူးကပဲ တညင်းကုန်းစစ်သားစုဆောင်းရေးတပ်ကိုသွားဖို့ အကြံပေးလိုက်တာ။ သားသမီးဇောဆိုတော့ ဟိုကလည်းမစဥ်းစားနိုင်ဘူး။ လိုက်တာပေါ့။ အဲဒီရောက်တော့ လူတယောက်ကအထဲမှာဝင်ကြည့်လို့ရတယ်ပြောပြီး ဖခင်ဖြစ်သူကိုခေါ်သွားတာ”လို့ ဖြစ်စဥ်သိရှိသူတဦးကပြောပါတယ်။

သားဖြစ်သူသတင်းစုံစမ်းရင်း အဖမ်းခံတဲ့ ဖခင်နဲ့ ကျန်မိသားစုဝင်​တွေဟာ ဇူလိုင် ၂၄ ရက်အထိအဆက်အသွယ်မရ​​သေးဘူးလို့စုံစမ်းသိရပါတယ် ။သူတို့မိသားစုမှာမိသားစုဝင်စုစုပေါင်း ၆ ဦးရှိပြီး အလုပ်ကအပြန်အဖမ်းခံရတဲ့လူငယ်ဟာတတိယမြောက်သားဖြစ်ပါတယ်။

ရန်ကုန်မှာပေါ်တာဆွဲခံရတဲ့လူငယ်တွေကို တညင်းကုန်းစစ်သားစုဆောင်းရေးတပ်လို့ လူသိများတဲ့ အမှတ်(၁)စစ်သားစု​ဆောင်း​ရေးတပ်ကိုပို့ဆောင်ပြီး အဲဒီကနေတဆင့် စစ်သင်တန်းကျောင်းကိုပို့ဆောင်​လေ့ရှိပါတယ်။

စစ်အုပ်စုဟာအခု​နောက်ပိုင်း ရန်ကုန်မြို့မှာစစ်ကားတွေနဲ့မဟုတ်ပဲ အိမ်စီးကားတွေကို အဓိကအသုံးပြုပြီး လူငယ်တွေကို​ပေါ်တာဆွဲ​နေတာဖြစ်တယ်လို့ မြို့ခံအချို့က​ပြောပါတယ် ။စစ်တပ်က ​အရွယ်မ​ရွေး​ ဖမ်းဆီး​ပေါ်တာဆွဲတာများလာတာ​ကြောင့် ပြည်သူ​တွေထိတ်လန့်ပြီး ညပိုင်းမှာအပြင်ထွက်သူနည်းလာတယ်လို့လည်း ပြည်သူအချို့​က​ပြောပါတယ်။

ဒါ့အပြင်ရန်ကုန်မြို့ကကွန်ဒိုတွေမှာနေထိုင်သူတွေကို စစ်မှုထမ်းဖို့ စစ်တပ်ကဇူလိုင်လလယ်ပိုင်းမှာခေါ်စာတွေ စတင်ပေးပို့နေတယ်လို့ကွန်ဒိုအခန်းတွေမှာ နေထိုင်သူတွေက ပြောပါတယ်။ စစ်တပ်က ပြဋ္ဌာန်းထားတဲ့ စစ်မှုထမ်းဥပဒေအရ အသက် (၁၈) နှစ်ကနေ (၃၅) နှစ်အတွင်း စစ်မှုမထမ်းမနေရ အကျုံး၀င်သူတိုင်းကိုပုံစံ (၂)နဲ့ ဆင့်ခေါ်မှာလို့ ဆိုပါတယ်။

စစ်မှုထမ်းဥပ​ဒေပါပုံစံ (၂)ဆိုတာက စစ်မှုထမ်းအသက်အရွယ်ရောက်သူတွေကိုမြေပြင်စာရင်းကောက်ယူပြုစုတာနဲ့ စစ်ဆေးဖို့အတွက် အသုံးပြုတာ ဖြစ်ပါတယ်။ ပြီးခဲ့တဲ့လကအထိစစ်မှုမထမ်းချင်ဘူးဆိုရင် လူငယ်တွေရှိတဲ့ ကွန်ဒို​တွေမှာ တခန်းကို တစ်လတစ်သိန်း ရပ်ကွက်အုပ်ကြီးကို ပေးရတာလို့မရမ်းကုန်းမြို့နယ် ကွန်ဒိုတစ်ခုမှာ နေထိုင်သူတဦးက ပြောပါတယ်။

ဒါ​ပေမယ့်လစဉ်ကောက်ခံတဲ့ လစဥ်ကြေးကို ဇူလိုင်ကစပြီး မကောက်ခံတော့ဘဲ စစ်မှုထမ်းရမယ့်သူဆိုပါက အကြောင်းကြားဖို့ ပြောဆိုလာတယ်လို့ သူက ဆက်ပြောပါတယ်။ ဒါ့အပြင် ဒဂုံဆိပ်ကမ်းမြို့နယ်က ဧရာချမ်းသာကွန်ဒိုမှာ နေထိုင်ကြတဲ့သူတွေကိုလည်း အသက်ပြည့်မီတဲ့သူတိုင်းစစ်မှုထမ်းဖို့စစ်တပ်က အကြောင်းကြားစာပို့ထားတယ်လို့ သိရပါတယ်။ အဲဒီကွန်ဒိုနေသူတွေဟာလည်း စစ်မှုထမ်းအပတ်စဉ် (၁) ကနေ (၂၈)အထိ စစ်မှုထမ်းတာ လုံးဝမရှိခဲ့သေးတာကြောင့် စစ်မှုထမ်းဖို့ ရပ်ကွက်ရုံးနဲ့ အိမ်ရာကော်မတီရုံးခန်းကို အသိပေးရမယ်လို့ ဆိုပါတယ်။

ဒါ့အပြင် အာဏာသိမ်းစစ်​တပ်ခန့် ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက လူငယ်​တွေစစ်မှုထမ်းရှောင်တိမ်းမှုကြောင့် ပေါ်တာဆွဲခြင်းဖြစ်တယ်လို့ တရားဝင် ဝန်ခံထားပါတယ်။

​နေပြည်​တော်က စစ်တပ်လွှတ်​တော်မှာစစ်မှုထမ်းရှောင်လွှဲချင်သူတွေဟာ တခြားဒေသတွေကို တိမ်းရှောင်နေတာကြောင့် ဥပဒေ၊ နည်းဥပဒေနဲ့အညီ ဆင့်ခေါ်ဖို့ အခက်အခဲများစွာရှိနေကြောင်း၊ တိမ်းရှောင်သူများကို လမ်းခရီးကနေ စောင့်ကြည့် ဆင့်ခေါ်ခြင်း၊ နေအိမ်များတွင် ဝင်ရောက်ဆင့်ခေါ်ခြင်းများအား တာဝန်ရှိသူ​တွေကဆောင်ရွက်တဲ့အခါ အများပြည်သူအမြင်မှာ အဓမ္မဖမ်းဆီးခြင်း သဘောများဖြစ်တယ်လို့ စစ်တပ်ဒုဝန်ကြီးက အ​ကြောင်းပြခဲ့ပါတယ်။စစ်မှုထမ်းတိမ်းရှောင်သူတွေရဲ့စာရင်းတွေကိုလည်းမြို့အဝင်၊ အထွက် စစ်ဆေးရေး ဂိတ်တွေမှာ ပေးပို့ထားတယ်လို့ သူကဆိုပါတယ်။

ပြည်သူတစ်ဦးက​တော့ “စစ်မှုထမ်းကိုရှောင်လို့ပေါ်တာဆွဲတယ်ဆိုတာ ယုတ္တိမှမရှိတာ။ ဆွဲချင်လို့ကိုဆွဲနေတာလေ။ ပြီးရင်ပိုက်ဆံတတ်နိုင်တဲ့လူတွေပါလာရင် ခြိမ်းခြောက်ငွေတောင်းမယ်။ ယုတ်မာတာ။ စစ်မှုထမ်းဥပဒေအရ မဖြစ်မနေ ခေါ်မယ်ဆိုလည်း တန်းတူခေါ်လေ။ လူကြီးသားသမီးတွေကျတော့မပါဘူး။ ရုပ်ရှင်မင်းသားတွေကျမပါဘူး။ ပြည်သူတွေကပဲသူတို့အစားဒုက္ခခံပေးရမှာလား။ ဒါသက်သက်လူမဆန်တဲ့စကားပြောတာ။ မျက်နှာပြောင်တိုက်တာ” လို့ ပြောပါတယ်။

စစ်မှုထမ်းဖို့ လူစားထိုး​ရောင်းဝယ်တဲ့စျေးကွက်မှာ တစ်ဦးကို ကျပ်သိန်း ၈၀ ကနေ သိန်း ၁၅၀ အထိပေါက်စျေးရှိနေတယ်လို့ စုံစမ်းသိရပါတယ်။

စစ်တပ်ကနိုင်ငံတစ်ဝန်းတိုက်ပွဲ​တွေမှာ​သေဆုံးဒဏ်ရာရသူများပြီး စစ်သားအင်အားလိုအပ်တာ​ကြောင့် ပေါ်တာဆွဲတာ၊လူငယ်တွေကို အတင်းအဓမ္မစစ်မှုထမ်းခိုင်းတာ​တွေကိုပိုလုပ်လာတာလည်းဖြစ်ပါတယ်။

ဒါ​ကြောင့်​ တော်လှန်​ရေးအင်အားစု​တွေက ပြည်သူ​တွေအ​နေနဲ့ ​ပေါ်တာဆွဲမခံရဖို့ ၊ စစ်မှုထမ်းစု​ဆောင်းမခံရ​အောင်ပါးပါးနပ်နပ်​နေထိုင်ကြဖို့ အကြံပြုတိုက်တွန်းထားပါတယ်။