ဇူလိုင် – ၂၈ ၊၂၀၂၆ ၊နိုင်ပကောင်း/People’s Spring
ကရင်ပြည်နယ်၊မြ၀တီမြို့တောင်ဘက်ဖလူးတောင်ခြေမှာစစ်ကြောင်းထိုးဝင်ရောက်လာတဲ့အာဏာသိမ်းစစ်တပ်ရဲ့ပူးပေါင်းစစ်ကြောင်းနဲ့ KNU တပ်မဟာ(၆) ပူးပေါင်းတပ်ဖွဲ့တို့ကြားပြီးခဲ့တဲ့ဇူလိုင် ၂၆ ရက်ကတိုက်ပွဲအပြင်းအထန်ဖြစ်ပွားခဲ့ပါတယ်။
စစ်တပ်စစ်ကြောင်းမှာ BGF တပ်နယ်(၄)ဗိုလ်မှုးကြီးစောမုတ်သုန်ရဲ့အဖွဲ့ ၊ ခွဲထွက်DKBA ဗိုလ်ဘိအဖွဲ့၊ဒီမိုကရေစီအကျိုးပြုကရင်တပ်မတော်( DKBA)တပ်ဖွဲ့ဝင်ဟောင်း ဗိုလ်သခွားသီးတို့က လမ်းပြပို့ဆောင်ကူညီပေးခဲ့တယ်လို့ကရင်သတင်းရင်းမြစ်ကပြောပါတယ်။
စစ်တပ်ရဲ့ပူးပေါင်းစစ်ကြောင်းဟာမဲကနယ်-ဖလူးတောလမ်းကနေတဆင့် စစ်ကြောင်းထိုးလာခဲ့ရာဇူလိုင်လ ၂၆ ရက်မှာတော့ ဖလူးလေးရွာအကျော် မှာ KNU တပ်မဟာ (၆) ပူးပေါင်းအဖွဲ့နဲ့ တိုက်ပွဲ ပြင်းပြင်းထန်ထန်ဖြစ်ခဲ့တာပါ။
Public Service Announcement
ဖလူးလေးရွာအကျော်ကကျောက်ခွဲစက်အနောက်ဘက်မှာDKBA ထိန်း ချုပ်တဲ့ ကျားဖြန့်ဝင်းတစ်ခုထဲမှာ တိုက်ပွဲအပြင်းအထန်ဖြစ်ခဲ့ပြီး စစ်တပ်ဘက်က အထိများနေတယ်လို့ ကရင်သတင်းရင်းမြစ်က ပြောပါတယ်။
ဖလူးလေးအကျော်မှာရှိတဲ့အဲဒီကျားဖြန့်ဝင်းကနေတဆင့်ရှေ့ကိုဆက်သွားရင် မြ၀တီ-ဝေါ်လေ ကားလမ်းပေါ်ရှိ သုံးထပ်ကွေ့နေရာကို ရောက်ရှိမှာပါ။
တိုက်ပွဲကြောင့်ထိုင်း – မြန်မာနယ်ခြားသောင်ရင်းမြစ်ကမ်းနားမှာနေထိုင်တဲ့စစ်ဘေးရှောင်ပြည်သူတွေလည်း ရွှေ့ပြောင်းနေကြရပါတယ်။
ငွေကြေးမတတ်နိုင်တဲ့အတွက် နေရာမရွေ့နိုင်တဲ့စစ်ရှောင်ပြည်သူတွေလည်း အများအပြားကျန်ရှိနေသေးတယ်လို့ ကရင်သတင်းရင်းမြစ်ရဲ့ ပြောပြချက်အရ သိရပါတယ်။
