ဩဂုတ် ၂၂၊ ၂၀၂၆။ ထားမြတ်/People’s Spring
ရက္ခိုင်ပြည်နယ်၊ သံတွဲမြို့နယ်နဲ့ ဂွမြို့နယ်ကို အာဏာသိမ်းစစ်တပ်က လေယာဉ်အုပ်စုနဲ့ ဗုံးအလုံးရေအများအပြား အသုံးပြု လေကြောင်းတိုက်ခိုက်မှုတွေ ထပ်မံ ပြုလုပ်ခဲ့လို့ စစ်ရှောင်တွေ သေဆုံးထိခိုက်မှု ထပ်မံဖြစ်ခဲ့ရတယ်လို့ အာရက္ခ တပ်တော်(AA) က အသိပေးထုတ်ပြန်ပါတယ်။
ဩဂုတ် ၂၁ရက် ည သန်းခေါင်မှာ သံတွဲမြို့နယ် ငပလီမြို့ကို စစ်တပ်က လေယာဉ် အများအပြား အသုံးပြု တိုက်ခိုက်ခဲ့တာလို့ ဆိုပါတယ်။ ငပလီမြို့ရှိ စစ်ကောင်စီတပ် စခန်းချတပ်စွဲခဲ့သော တပ်ရင်းနေရာဟောင်းများဖြစ်တဲ့ ခလရ (၅၅)၊ ခမရ (၅၆၆) တပ်ရင်းနဲ့ အရပ်သား ပြည်သူ စစ်ဘေးရှောင်ပြည်သူတွေ နေထိုင်ရာ နေရာဝန်းကျင်ကို တိုက်လေယာဉ် ၈စီး၊ Y12 လေယာဉ် ၁စီး၊ Y8 လေယာဉ် ၁စီး တို့နဲ့ ဗုံးအလုံးရေ ၁၀၀ ခန့် ကြဲချတိုက်ခိုက်ခဲ့ကြောင်း ဖော်ပြထားပါတယ်။
၁ နာရီကျော်ကြာမြင့်ခဲ့တဲ့ လေကြောင်းဗုံးကြဲမှုအတွင်း ငပလီမြို့ကို လာရောက်စစ်ရှောင်နေတဲ့ အရပ်သား ပြည်သူ ၁ဦး သေဆုံးကာ ၁၄ဦး ဒဏ်ရာရခဲ့ကြောင်း ထုတ်ပြန်ပါတယ်။
Public Service Announcement
စစ်တပ်ဟာ ဂွမြို့နယ် ညောင်ချောင်းရွာကိုလည်း ဩဂုတ် ၂၁ရက် မနက်ပိုင်းမှာ တိုက်လေယာဉ်နဲ့ ၂ကြိမ် ဗုံးကြဲခဲ့တယ်လို့ဆိုပါတယ်။ ညောင်ချောင်းရွာ စာသင်ကျောင်းကို ပေါင် ၅၀၀ ဗုံးနဲ့ ကြဲချလို့ စာသင်ကျောင်းမှာ စစ်ရှောင်နေတဲ့ ပြည်သူ ၇ဦး ဒဏ်ရာရခဲ့သလို စာသင်ကျောင်းဆောင်တခုလုံးလည်း ပျက်စီးခဲ့ရကြောင်း ဖော်ပြပါတယ်။
ဒါ့အပြင် ညောင်ချောင်းရွာ ဓမ္မရက္ခိတ ဘုန်းကြီးကျောင်းကို စစ်တပ်က ထပ်မံ ဗုံးကြဲခဲ့ရာ အရပ်သား ၁ဦး ဒဏ်ရာရပြီး ဘုန်းကြီးကျောင်းဆောင်များနဲ့ အနီးအနားရှိ ပြည်သူ့ နေအိမ်များ ပြည်သူပိုင်ပစ္စည်းများ ပျက်စီးဆုံးရှုံးခဲ့ရကြောင်း ထုတ်ပြန်ပါတယ်။
“အာရက္ခဒေသအတွင်းနေ မိဘပြည်သူများအနေဖြင့် ဖက်ဆစ် အကြမ်းဖက် စစ်ကော်မရှင်တပ်၏ လေကြောင်း နှင့် ရေကြောင်းရန်တိုကို ယခင်ထက်ပိုမိုသတိထားကြပါရန် ထပ်မံအသိပေး တိုက်တွန်းလိုက်ပါသည်” လို့လည်း ထုတ်ပြန်ချက်မှာ ဖော်ပြထားပါတယ်။
စစ်တပ်ဟာ AA ထိန်းချုပ်ရာ မြို့နယ်တွေကို လေကြောင်းဗုံးကြဲတာတွေ နေ့စဉ်ရက်ဆက် ပြုလုပ်နေတာဖြစ်ပြီး အရပ်သားတွေစုလိုက်အပြုံလိုက်သေဆုံးထိခိုက်မှုတွေ ဖြစ်ပေါ်လျက်ရှိပါတယ်။
ဩဂုတ် ၁၇ရက်က ရသေ့တောင်မြို့နယ် အောက်ဇီးကိုင်းရွာကို စစ်တပ်က လေယာဉ်ဗုံးကြဲလို့ ပြည်သူ ၁ဦး ဒဏ်ရာရခဲ့ပါတယ်။
ဩဂုတ် ၁၆ရက်ကလည်း သံတွဲမြို့တဝိုက်ကို လေကြောင်းတိုက်ခိုက်ခဲ့ရာ သားအဖ ၂ဦးသေဆုံးကာ ကလေးငယ်အပါအဝင် ၃ဦး ဒဏ်ရာရခဲ့ပါတယ်။ ဩဂုတ် ၁၃ရက်ကလည်း ဂွမြို့နယ် ကျိန္တလီမြို့ကို စစ်တပ် လေကြောင်းဗုံးကြဲခဲ့ရာ မိသားစုလိုက်အပါအဝင် ပြည်သူ ၈ဦးသေဆုံးခဲ့ရပါတယ်။ ဩဂုတ် ၁၀ရက်ကလည်း သံတွဲမြို့နယ် ကျောက်ကြီးရွာကို လေကြောင်းဗုံးကြဲခဲ့ရာ ပြည်သူ ၁၆ဦးသေဆုံးပြီး ၁၈ဦး ဒဏ်ရာရခဲ့ပါတယ်။
စစ်တပ်ဟာ အာရက္ခဒေသအပါအဝင် မြန်မာပြည်အနှံမှာ စစ်ရေးနဲ့ မသက်ဆိုင်တဲ့ ပြည်သူနေထိုင်ရာနေရာတွေကို လေကြောင်းကနေ တရားလက်လွတ် ဗုံးကြဲတိုက်ခိုက်မှုတွေ ဆက်တိုက်ပြုလုပ်နေလို့ ပြည်သူသေဆုံးထိခိုက်မှု အိုးအိမ်အဆောက်အအုံး ပျက်စီးမှုများ မြင့်တက်လျက်ရှိကြောင်းလည်း AAက ထုတ်ပြန်ပါတယ်။
