ဩဂုတ် ၃၀၊ ၂၀၂၆။ ထားမြတ်/People’s Spring
တနင်္သာရီတိုင်း၊ ထားဝယ်မြို့နယ် မောင်မယ်ရှောင်ရွာအနီး တိုက်ပွဲမှာ စစ်တပ်က ၁၂ဦးသေဆုံးပြီး လက်နက် ၈လက် သိမ်းရခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က ထုတ်ပြန်ပါတယ်။
ဩဂုတ် ၂၉ရက်မနက်က စစ်ကောင်စီတပ် စစ်ကြောင်းကို ကရင်အမျိုးသားလွတ်မြောက်ရေးတပ်မတော်(KNLA)တပ်မဟာ(၄)နဲ့ ပူးပေါင်းတပ်က တိုက်ခိုက်ခဲ့ရာ စစ်တပ် အထိနာခဲ့တာလို့ ဆိုပါတယ်။
စစ်ဆင်ရေးကို KNLA တပ်မဟာ(၄)၊ တပ်ရင်း(၁၂) တပ်ခွဲ(၅), တပ်ရင်း(၁၀) တပ်ခွဲ(၄) နဲ့ ဓဝယ်အမျိုးသားလွတ်မြောက်ရေးတပ်တော်(DNLA)တို့ ပါဝင်တဲ့ တော်လှန်ရေးပူးပေါင်းတပ်ဖွဲ့များ က ဖော်ဆောင်ခဲ့တာပါ။
Public Service Announcement
DNLAကလည်း အဲဒီ တိုက်ပွဲသတင်းကို မနေ့က ထုတ်ပြန်ထားရာ စစ်ကောင်စီတပ်စစ်ကြောင်းဟာ ထားဝယ်ရေနက်ဆိပ်ကမ်းနယ်မြေ လုံခြုံရေးအကြောင်းပြ စစ်ကြောင်းထိုးလာတာကို ပူးပေါင်းတပ်က ကြားဖြတ်တိုက်ခိုက်ခဲ့တာလို့ အသိပေးထားပါတယ်။
ဒါ့အပြင် စစ်ရေးအချိန်မြှင့်တင်နေချိန်ဖြစ်လို့ စစ်ကောင်စီတပ်ဖွဲ့ဝင်တွေ ပြည်သူ့ရင်ခွင်ခိုလှုံဖို့၊ပြည်သူတွေစစ်ရေး သတိရှိဖို့၊ လေကြောင်းရန် ကာကွယ်ရေးဆိုင်ရာတွေ လိုက်နာကျင့်ကြံဖို့ DNLAက တိုက်တွန်းထားပါတယ်။
KNLA တပ်မဟာ(၄) လက်အောက်ခံတပ်တွေဟာ ဩဂုတ် ၂၄ရက်ကလည်း မြိတ်မြို့နယ် တုံးဗျောရွာအတွင်း တပ်စွဲထားတဲ့ စစ်တပ်ကို ဝင်ရောက်တိုက်ခိုက်ခဲ့ရာ လက်နက် ၄လက် သိမ်းရခဲ့ပါတယ်။
