စက်တင်ဘာ ၂၈၊ ၂၀၂၆။ ထားမြတ်/People’s Spring
ကချင်ပြည်နယ်၊ မိုးညှင်းမြို့နယ် နမ့်မွန်းကျေးရွာက ကချင်နှစ်ခြင်းခရစ်ယာန်ဘုရားကျောင်းမှာ စစ်တပ်လက်အောက်ခံ SNA တပ်က စစ်သင်တန်းဆင်းပွဲ လုပ်တာဟာ လုံး၀ မလုပ်သင့်တဲ့ အရာလို့ ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံဗိုလ်မှူးကြီးနော်ဘူက ပြောကြားပါတယ်။
အခုရက်ပိုင်းမှာ လူမှုကွန်ရက်ပေါ်မှာ ပြန့်နှံ့နေတဲ့ ဘုရားကျောင်းဝင်းထဲသင်တန်းဆင်းပွဲလုပ်တာ၊ ကခုန်နေတာ စတဲ့ မှတ်တမ်းဓာတ်ပုံနဲ့ ရုပ်သံတွေ နဲ့ပတ်သက်ပြီး အခုလို ပြောကြားတာပါ။
“အင်းတော်ကြီး နမ့်မွန်းရွာက ကျနော်တို့ခရစ်ယာန်ဘုရားကျောင်းမှာ SNA တပ်ကတော့ စစ်သင်တန်းဆင်းပွဲတွေ လုပ်တာ။ အဆိုအကတွေ ဘာတွေ ပျော်ပွဲတွေလုပ်တာပုံတွေပျံ့နှံ့နေပါတယ်။ ဒါက လုံး၀ မလုပ်သင့်တဲ့ အရာတခုဖြစ်ပါတယ်” လို့ ဗိုလ်မှူးကြီးနော်ဘူက ပြောပါတယ်။
Public Service Announcement
ဘုရားကျောင်းမှာ အခုလိုမျိုးလုပ်လိုက်တာဟာ ရှမ်းတိုင်းရင်းသားနဲ့ ကချင်တိုင်းရင်းသားတွေ ကြားမှာ ဘာသာရေးပြဿနာတွေလည်းဖြစ်ပေါ်နိုင်တာမို့ မလုပ်သင့်တာဖြစ်ကြောင်းလည်း ပြောပါတယ်။
ခရစ်ယာန်ဘုရားကျောင်းအတွင်း စစ်သင်တန်းဆင်းပွဲ လုပ်တဲ့ အဲဒီ ဖြစ်စဉ်နဲ့ပတ်သက်ပြီး KIA သတင်းပြန်ကြားရေးဌာနကလည်း ဖော်ပြခဲ့ပါတယ်။
နမ့်မွန်းရွာမှာ ကွင်းပြင်အလွတ်နေရာတွေ အများကြီးရှိပါလျက်နဲ့ ခရစ်ယာန်များအထွဋ်အမြတ်ထားရာ ဘုရားကျောင်းထဲမှာ သင်တန်းဆင်းပွဲ ကျင်းပခြင်းဟာ မလုပ်သင့်တဲ့ အပြုအမူဖြစ်တဲ့အပြင် ယုံကြည်မှု ဘာသာတရားကို စော်ကားရာရောက်ကြောင်းလည်း KIA သတင်းပြန်ကြားရေးဌာနက ဖော်ပြပါတယ်။
SNA ပြည်သူ့စစ်ဟာ နမ့်မွန်းခရစ်ယာန် ဘုရားကျောင်းဝင်းကို သင်တန်းကွင်းအဖြစ် အသုံးပြုနေတာ ၅နှစ်ခန့်ရှိပြီလို့ သိရကြောင်းလည်း ဖော်ပြထားပါတယ်။
ခရစ်ယာန်ဘာသာဝင်များ ဖြစ်ကြတဲ့ နမ့်မွန်းကျေးရွာနေ ကချင်ပြည်သူအများစုဟာ စစ်တပ်၊ SNA ပူးပေါင်းတပ်နဲ့ KIA တပ်များအကြား တိုက်ပွဲဖြစ်ပွားခဲ့လို့ စစ်ရှောင်နေကြရတာလို့ဆိုပါတယ်။ ရှမ်းနဲ့ ကချင်ဟာ ရှေးကတည်းက အတူနေတိုင်းရင်းသားများ ဖြစ်တဲ့အလျောက် နောင်မှာလည်း အတူတကွယှဉ်တွဲနေထိုင်ကြရအုံးမှာဖြစ်တယ်လို့လည်း KIA က ဖော်ပြထားပါတယ်။
