စက်တင်ဘာ၂၉၊၂၀၂၆။အိမ်သွင်/People’s Spring
မြန်မာ့ကမ်းရိုးတန်းကို ဖြတ်ဝင်လာခဲ့တဲ့ မုန်တိုင်းငယ်ဟာ လေဖိအားနည်းရပ်ဝန်းအဖြစ် အားလျော့သွားပြီး ရခိုင်ပြည်နယ်ကတဆင့် ဘင်္ဂလားပင်လယ်အော် အရှေ့မြောက်ဘက်ကို ဆက်လက်ရွေ့လျှားနေလို့ ရခိုင်ပြည်နယ်မှာ မိုးနဲ့ လေပြင်းဘေးသတိပြုဖို့ အမျိုးသားညီညွတ်ရေးအစိုးရ(NUG)၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA)က ထုတ်ပြန်ထားပါတယ်။
မုန်တိုင်းငယ်ဟာ စက်တင်ဘာ ၂၈ ရက် ညနေပိုင်းမှာ ရန်ကုန်နဲ့ ကျိုက်ထိုမြို့ကြားကနေ ကမ်းရိုးတန်းကို ဖြတ်ကျော်ဝင်ရောက်ခဲ့တာပါ။ ကမ်းရိုးတန်းဝင်ရောက်ပြီးနောက်ပိုင်း ဒီကနေ့ စက်တင်ဘာ ၂၉ရက်မနက်ပိုင်းကစပြီး အားကောင်းတဲ့ လေဖိအားနည်းရပ်ဝန်းအဖြစ် မကွေးတိုင်းနဲ့ စစ်ကိုင်းတိုင်းအောက်ပိုင်းကို ဖြတ်ကျော်နေပါတယ်။
အဲ့ဒီကနေ ၂၄နာရီအတွင်း ရခိုင်ပြည်နယ်နဲ့ ဘင်္ဂလားဒေ့ရှ်နိုင်ငံ အရှေ့တောင်ဘက်ပိုင်း၊ အိန္ဒိယနိုင်ငံ မီဇိုရမ်နှင့် ထရီပူရားပြည်နယ်တွေကို ဆက်လက်ရွေ့လျားပြီး တဖြည်းဖြည်း အားလျော့ပျက်ပြယ်သွားနိုင်တယ်လို့ MoSLHAက ထုတ်ပြန်ထားပါတယ်။
Public Service Announcement
စစ်ကိုင်းတိုင်းနဲ့မကွေးတိုင်း မြို့နယ်တွေမှာ ဒီကနေ့နေ့လယ်ပိုင်းကစပြီး မိုးကြီးခဲ့ပါတယ်။ ဒါ့အပြင် ရန်ကုန်တိုင်း၊ ဧရာဝတီတိုင်း၊ ပဲခူးတိုင်း၊ မွန်ပြည်နယ်၊ ကရင်ပြည်နယ်၊ ကရင်နီပြည်နယ်မှာလည်း မိုးသက်လေပြင်းကျရောက်ခဲ့ပါတယ်။
လေးဖိအားနည်းရပ်ဝန်းဖြတ်သန်းစဉ် ရခိုင်ပြည်နယ် မြောက်ပိုင်းမြို့နယ်တွေမှာ လေပြင်းတိုက်ခတ်တာ၊ လျှပ်စီးလက်တာ၊ မိုးကြိုးပစ်တာနဲ့ နေရာကွက်၍ မိုးကြီးတာတွေ အထူးသတိပြုနေထိုင်ကြဖို့ MoSLHAက ထုတ်ပြန်ထားပါတယ်။
စက်တင်ဘာ၂၆ရက်က ထိုင်းနိုင်ငံဘက်ကနေ ရွေ့လျားလာတဲ့ လေဖိအားနည်းရပ်ဝန်းကြောင့် မြန်မာနိုင်ငံဘက်မှာ မိုးကြီးပြီး တနင်္သာရီတိုင်းမှာ ရေဘေးနဲ့ မြေပြိုမှုဘေးရင်ဆိုင်နေရပါတယ်။
လောင်းလုံး၊ ထားဝယ်၊ သရက်ချောင်း၊ ရေဖြူ၊ မြိတ်မြို့နယ်တွေမှာ ရေဘေးကြုံတွေ့နေပြီး လောင်းလုံးနဲ့ သရက်ချောင်းမြို့ဟာ လက်ရှိမှာရေဘေးနဲ့ မြေပြိုမှုအဆိုးဆုံးကြုံတွေ့နေရပါတယ်။ ရေဘေးနဲ့ မြေပြိုမှုတွေကြောင့် ဒီနေ့ညနေပိုင်းအထိ ရုပ်အလောင်း ၄၀နီးပါ ရှာဖွေတွေ့ရှိထားပြီး ပျောက်ဆုံးနေသူတွေလည်းရှိတယ်လို့ ကူညီကယ်ဆယ်ရေးအဖွဲ့တွေက ပြောပါတယ်။
ထိုင်းနိုင်ငံဘက်ကနေ ရွေ့လျားလာတဲ့ လေဖိအားနည်းရပ်ဝန်းဟာ မြန်မာ့ကမ်းရိုးတန်းအနီးမှာ အားကောင်းလာပြီး မုန်တိုင်းငယ်ဖြစ်ခဲ့တာပါ။ ဒီကနေ့မှာ ကုန်းတွင်းပိုင်းကို ဝင်ရောက်ပြီးနောက် လေဖိအားနည်းရပ်ဝန်းအဖြစ် ပြန်လည်အား လျော့သွားတာဖြစ်ပါတယ်။
ရေဘေးသတိပေးထားတဲ့ ရခိုင်ပြည်နယ်ကို စစ်တပ်ကလေကြောင်းတိုက်ခိုက်မှုတွေပြုလုပ်နေပါတယ်။ မနေ့က ကျောက်တော်မြို့ကို ဗုံးကြဲလို့ ကလေးငယ်တွေအပါအဝင် အရပ်သား ၅၀ ဦးသေဆုံးပြီး ၅၈ဦး ဒဏ်ရာရခဲ့ပါတယ်။
