အောက်တိုဘာ ၉၊၂၀၂၆။သုည/People’s Spring
ဂျပန်နိုင်ငံ တိုကျိုမြို့ရှိ နိုင်ငံခြားရေးဝန်ကြီးဌာနရှေ့မှာ ပြည်ပရောက်မြန်မာတွေ စုပေါင်းပြီး မြန်မာစစ်တပ်နဲ့ စစ်တပ်ကျောထောက်နောက်ခံပြု အုပ်ချုပ်ရေးအဖွဲ့ထံ ဂျပန်အစိုးရရဲ့ ဖွံ့ဖြိုးရေးအကူအညီ (ODA) ပြန်လည်ပေးအပ်ရေးအပေါ် ကန့်ကွက်တဲ့ ဆန္ဒပြပွဲကို ဒီကနေ့ (အောက်တိုဘာ ၉) ပြုလုပ်ခဲ့ပါတယ်။
ဆန္ဒပြပွဲကို ဂျပန်အခြေစိုက် အဖွဲ့အစည်းတွေမှ မဲခေါင်စောင့်ကြည့်ရေးအဖွဲ့ (Mekong Watch)၊ နိုင်ငံတကာပတ်ဝန်းကျင်အဖွဲ့ (FoE Japan)၊ လက်နက်ကုန်သွယ်မှု ဆန့်ကျင်ရေး ကွန်ရက် (NAJAT)၊ ဗုဒ္ဓဘာသာ နိုင်ငံတကာပူးပေါင်းဆောင်ရွက်ရေး ကွန်ရက် (AYUS)၊ ဂျပန်နိုင်ငံတကာ စေတနာ့ဝန်ထမ်းစင်တာ JVC နဲ့ အာရှပစိဖိတ်လေ့လာရေးစင်တာ PARC တို့ ပူးပေါင်းပါဝင်ခဲ့ပါတယ်။
မြန်မာနိုင်ငံမှာ အရပ်သားတွေအပေါ် အကြမ်းဖက်မှု၊ ဖမ်းဆီးမှုနဲ့ လေကြောင်းတိုက်ခိုက်မှုတွေ ဆက်လက်ဖြစ်ပွားနေပြီး လူအများအပြား နေရပ်စွန့်ခွာနေရတဲ့ အခြေအနေမှာ စစ်တပ်နဲ့ ပူးပေါင်းဆောင်ရွက်မှုတွေက စစ်တပ်ရဲ့ အုပ်ချုပ်ရေးနဲ့ ငွေကြေးအင်အားကို ပိုမိုခိုင်မာစေနိုင်ကြောင်းနဲ့ စိုးရိမ်မိကြောင်းလည်း မဲခေါင်စောင့်ကြည့်ရေးအဖွဲ့က ဖော်ပြခဲ့ပါတယ်။
Public Service Announcement
ယင်းဆန္ဒပြပွဲမှာ မြန်မာစစ်တပ်ဦးဆောင်တဲ့ နိုင်ငံရေးစနစ်အောက်မှာ အာဏာသိမ်းမှုကို ဆန့်ကျင်တဲ့ နိုင်ငံရေးအင်အားစုတွေကို ဖယ်ထုတ်ပြီး ပြုလုပ်ခဲ့တဲ့ ရွေးကောက်ပွဲနဲ့ ပေါ်ပေါက်လာတဲ့ အုပ်ချုပ်ရေးအဖွဲ့ဟာ တရားဝင်မှု မရှိကြောင်း ဖော်ပြထားပါတယ်။
ဂျပန်အစိုးရအနေနဲ့ အဆိုပါအုပ်ချုပ်ရေးအဖွဲ့ကို တရားဝင်အစိုးရအဖြစ် အသိအမှတ်မပြုကြောင်း ရှင်းလင်းစွာ ထုတ်ဖော်ပြောကြားဖို့၊ အာဆီယံနိုင်ငံတွေကိုလည်း အလားတူ ရပ်တည် တိုက်တွန်းပေးဖို့နဲ့ မြန်မာနိုင်ငံကို လက်နက်၊ ခဲယမ်းနဲ့ စစ်ဘက်ဆိုင်ရာ ပစ္စည်းတွေ လွှဲပြောင်းရောင်းချမှု ရပ်တန့်ရေးအတွက် ဆောင်ရွက်ဖို့ကိုလည်း တောင်းဆိုခဲ့ကြပါတယ်။
ဒါ့အပြင် မြန်မာနိုင်ငံ အမြန်ဆုံးငြိမ်းချမ်းရေးအတွက် ဆုတောင်းမှုပြုလုပ်ခဲ့ပြီး မြန်မာနိုင်ငံတဝန်း ငြိမ်းချမ်းရေးနဲ့ ဒီမိုကရေစီအရေး ကြိုးပမ်းရင်း အသက်ပေးစွန့်လွှတ်ခဲ့ရသူတွေအား ရည်စူးပြီး ၃ မိနစ် ငြိမ်သက်ဆုတောင်းခဲ့ကြပါတယ်။
