မြောင်မြို့နယ်အတွင်း စစ်ကောင်စီတပ်ဝင်စီးပြီး ပြည်သူ များ၏ နေအိမ်များကို မီးရှို့ ဝင်ရောက်စီးနင်းပြီး ပြည်သူ လူထုပိုင် တဲများ နေအိမ်များကို မီးရှို့ဖျက်ခြင်းခြင်း၊ လက်နက်ကြီးလက်နက်ငယ်များဖြင့် ရမ်းသမ်းပစ်ခတ်ခြင်းများ လုပ်ဆောင်နေကြောင်း မြိုင်ပြည်သူ့ကာကွယ်ရေးတပ်ဖွဲ့(PDF)က ယနေ့ ထုတ်ပြန်သည်။
အကြမ်းဖက် စစ်ကောင်စီ တပ်များသည် မြောင်မြို့နယ် လက်ယက်မကျေးရွာ ဘက်မှစတင်ဝင်ရောက်ပြီး ငမြောင်တောင်ရွာ အရှေ့ဘက်ရှိဒေါင်မြင့်တော တစ်လျှောက်တဲများကို ဝင်ရောက်မွှေနှောက်ပြီး ဖျက်စီးမီးရှို့နေသည်ဟု ရုပ်သံဖိုင်နှင့်အတူ ဖော်ပြသည်။
ပြည်သူများ ဘေးလွတ်ရာကို ထွက်ပြေးတိမ်းရှောင်နေရကြောင်းနှင့် စစ်ကောင်စီတပ်များသည်လာရာ လမ်းတစ်လျှောက်မှ အိမ်များကို မီးရှို့ဖျက်စီးခဲ့ကြောင်း PDFက ထုတ်ပြန်သည်။
ပြည်သူများ အစစအရာရာ ဂရုစိုက်ပြီး အချင်းချင်းကူညီကြရန်လည်း တိုက်တွန်းထားသည်။
ပြီးခဲ့သည့်ရက်ပိုင်းများကတည်းက စစ်ကောင်စီတပ်များ ဝင်ရောက်စီးနင်းနေခြင်းကြောင့် မြောင်မြို့နယ်အတွင်းရှိ ကျေးရွာများစွာ မှ ဒေသခံများ ထွက်ပြေးတိမ်းရှောင်နေကြရသည်ဟု ဆိုသည်။ ထို့ပြင် စစ်ကောင်စီတပ်မှ ပစ်ခတ်၍ ဒေသခံအချို့ အသက်ဆုံးရှုံးခဲ့ရသည်။
အောက်တိုဘာ ၈ရက်က စစ်ကောင်စီတပ်များသည် ပရိမ္မရွာ နှင့် ကျားအိုရွာသို့ ဝင်ရောက်စီးနင်းရာ ပရိမ္မရွာ စပါးခင်းအတွင်း ထွက်ပြေးတိမ်းရှောင်နေသည့် အမျိုးသားတစ်ဦးကို ပစ်ခတ်ခဲ့၍ ဦးခေါင်းနှင့် ဆီးခုံ၌ ကျည်ထိမှန်သေဆုံးခဲ့သည်ဟု PDFက ထုတ်ပြန်ထားသည်။
မြောင် PDF အနေဖြင့်လည်း ဒေသတွင်းရှိ အခြားမြို့နယ်များမှ PDFများနှင့် လက်တွဲပူးပေါင်းပြီး စစ်ကောင်စီတပ်ကို ခုခံတိုက်ခိုက်လျက်ရှိသည်။