လူတစ်ယောက်တည်းက တစ်နေ့တည်းမှာ ကိုဗစ် ကာကွယ်ဆေး ၁၀ လုံး ထိုးနှံခဲ့တဲ့ ဖြစ်စဉ်နဲ့ ပတ်သက်လို့ နယူးဇီလန်မှာ စုံစမ်း စစ်ဆေးမှုတွေ ပြုလုပ်နေပါတယ်။
ဒီသတင်းကို ကြားမိသူတိုင်းက အဲဒီ အမျိုးသားဟာ မယုံနိုင်စရာ ကောင်းလောက်အောင် တစ်ကိုယ်ကောင်း ဆန်လွန်းသူအဖြစ် ဝေဖန် ပြစ်တင်နေကြပါတယ်။ သူဟာ တခြားသူတွေအတွက် ထိုးပေးရမယ့် ကာကွယ်ဆေးတွေကို လက်လွှဲ ဝယ်ယူပြီး ကိုယ်တိုင် တစ်ယောက်တည်း ယူထိုးခဲ့တာလို့ သိရပါတယ်။
နယူးဇီလန် အစိုးရရဲ့ ကျန်းမာရေး ဝန်ကြီးဌာနက အခုဖြစ်စဉ်ကို ကြားသိပြီးတဲ့နောက် စုံစမ်း စစ်ဆေးမှုတွေ စတင်နေပြီလို့ ကာကွယ်ဆေး ထိုးနှံမှု ပရောဂျက် မန်နေဂျာ အက်စ်ထရစ်ဒ် ကောနက်ဖ်က ဆိုပါတယ်။ ဒီဖြစ်စဉ်က ကာကွယ်ဆေး ထိုးနှံမှု တာဝန်ကို ရိုးသား ဖြောင့်မှန်တဲ့ အဖွဲ့အစည်းတွေဆီ ပေးအပ်ဖို့ ဘယ်လောက် အရေးကြီးသလဲ ဆိုတာ သင်ခန်းစာ ရလာစေတယ်လို့လည်း ကောနက်ဖ်က မှတ်ချက် ပေးခဲ့ပါတယ်။
ကျန်းမာရေး ဝန်ကြီးဌာနက ဒီကိစ္စဟာ နယူးဇီလန်ရဲ့ ဘယ်ဒေသ၊ ဘယ်မြို့မှာ ပေါ်ပေါက်ခဲ့သလဲ ဆိုတာကိုတော့ မထုတ်ပြန်ပါဘူး။ နယူးဇီလန်က ဗိုင်းရပ်စ်ဗေဒ ပညာရှင် ဒေါက်တာ ဟယ်လန် ပက်တိုဆစ် ဟားရစ်ကတော့ ဒီလုပ်ရပ်မျိုးဟာ အရမ်း တစ်ကိုယ်ကောင်းဆန်ပြီး ဆေးမထိုးဖြစ်တဲ့ သူတွေအတွက် အကြီးအကျယ် အန္တရာယ် ရှိသွားစေနိုင်တယ်လို့ ပြောပါတယ်။ အဲဒီ အမျိုးသားဟာ ဆေးတချို့ကို ငွေလိုလို့ ပြန်ရောင်းလိုက်ရသူတွေဆီက ယူထိုးခဲ့တယ်လို့လည်း ယုံကြည်ရပြီး ဒါဟာ ဆင်းရဲနွမ်းပါးသူတွေအပေါ် တစ်မျိုးတစ်ဖုံ အမြတ်ထုတ်လိုက်တဲ့ သဘောပဲလို့ ဒေါက်တာ ဟားရစ်က မှတ်ချက် ပေးခဲ့ပါတယ်။
တစ်နေ့တည်း ဆေး ၁၀ လုံးထိုးတဲ့ အမျိုးသားဟာ ဒေသတွင်းက ကာကွယ်ဆေးထိုး စင်တာ တချို့ဆီ လှည့်လည် သွားလာပြီး ဆေးထိုးရမယ့် သူတွေ ဆီကရော၊ ကာကွယ်ဆေး ကိုင်တွယ်သူ တချို့ဆီကပါ ဆေးပြန်ဝယ် ထိုးခဲ့တာလို့ ယူဆရပါတယ်။ ကိုယ့်သဘောနဲ့ကိုယ် ဆေးတွေ အများကြီး ထိုးလိုက်တဲ့ ကိစ္စမျိုးက ကာယကံရှင် ကိုယ်တိုင် အတွက်လည်း အန္တရာယ် များလွန်းတယ်လို့ ဒေါက်တာ ဟားရစ်က သတိပေးခဲ့ပါတယ်။
ကာကွယ်ဆေး ထိုးပေးတဲ့ လုပ်ငန်းစဉ်တွေဟာ ပါဝင် တာဝန်ယူ ပတ်သက်သူတိုင်းအပေါ် ယုံကြည်မှု မြင့်မြင့်မားမား ထားပေးရကြောင်း၊ ဒီလို အခြေအနေမျိုးမှာ အခုပြဿနာမျိုး ပေါ်လာတယ် ဆိုတာကတော့ အားလုံးအတွက် မကောင်းကြောင်းလည်း သူက ပြောကြားသွားပါတယ်။