'/%3E%3C/svg%3E){kind=small}
ကားမောင်းနေတဲ့အချိန် လုံခြုံရေး ခါးပတ် ပတ်မထားမိခဲ့တဲ့ ကိစ္စနဲ့ ပတ်သက်လို့ ဗြိတိန်ဝန်ကြီးချုပ် ရီရှီ ဆူနက်ခ်က ပြန်လည် တောင်းပန်ခဲ့ပါတယ်။
လူမှုကွန်ရက်ပေါ်တင်ဖို့ ရိုက်ကူးထားတဲ့ ဗီဒီယို တစ်ခုမှာ ဆူနက်ခ်ဟာ မောင်းနှင်နေတဲ့ ကားတစ်စီးရဲ့ နောက်ခန်းမှာထိုင်ရင်း စကားပြောနေခဲ့ပေမယ့် ခါးပတ် ပတ်မထားတာကို တွေ့ရပါတယ်။ ဗြိတိန်မှာတော့ ယာဉ်မောင်းရော၊ ခရီးသည် အားလုံးပါ ကားမောင်းနေချိန် ခါးပတ် ပတ်ထားဖို့ ဥပဒေ ထုတ်ပြန်ထားပါတယ်။
ဆူနက်ခ်ဟာ အင်္ဂလန် အနောက်မြောက်ပိုင်း တစ်နေရာကို ကားနဲ့ သွားရောက်နေရင်း အဲဒီ ဗီဒီယိုကို ရိုက်ကူးခဲ့တာ ဖြစ်ပါတယ်။ ဇန်နဝါရီ ၁၉ ရက်မှာတော့ လန်ဒန်မြို့၊ ဒေါင်းနင်းလမ်းမှာရှိတဲ့ ဝန်ကြီးချုပ် အိမ်တော်က အစိုးရ ပြောရေးဆိုခွင့်ရ အရာရှိက ဝန်ကြီးချုပ် အနေနဲ့ သူ့အမှားကိုသူ သိပြီး တောင်းပန်လိုကြောင်း ကြေညာခဲ့ပါတယ်။
ပြီးတော့ ဆူနက်ခ်ဟာ ဗီဒီယို ရိုက်နေချိန် ခဏလေး အတွင်းမှာပဲ လုံခြုံရေး ခါးပတ်ကို ချွတ်ထားခဲ့တာဖြစ်ကြောင်း၊ ဒါဟာ မှားယွင်းတဲ့ ကိစ္စဆိုတာ နားလည်ပြီး ဝန်ကြီးချုပ်က တောင်းပန်ကြောင်း၊ ဘယ်သူမဆို ကားမောင်းနေရင်း ခါးပတ် ပတ်ထားရမယ်လို့ ဝန်ကြီးချုပ်က ယုံကြည်ကြောင်း ဆူနက်ခ်ရဲ့ ပြောရေးဆိုခွင့်ရ အရာရှိက ထုတ်ပြန်ပါတယ်။
Public Service Announcement
ဗြိတိန် ယာဉ်ထိန်းရဲဌာနက အခုဖြစ်စဉ်နဲ့ ပတ်သက်လို့ စုံစမ်းသွားမယ်လို့ ပြောပါတယ်။ ဗြိတိန် ဥပဒေတွေအရ ပြစ်မှု ထင်ရှားခဲ့မယ်ဆိုရင် စတာလင်ပေါင် ၁၀၀ ကနေ ၅၀၀ လောက်ထိ ဒဏ်ကြေး ပေးဆောင်ရမယ့် သဘောပါ။ ဒါပေမဲ့ ဗြိတိန်နိုင်ငံ သမိုင်းမှာ အချမ်းသာဆုံး ဝန်ကြီးချုပ်လို့ သတ်မှတ် ခံထားရတဲ့ ဆူနက်ခ် အတွက်တော့ ဒီကိစ္စက ပြောပလောက်မှာ မဟုတ်ပါဘူး။
အတိုက်အခံ လေဘာ ပါတီကတော့ အခုကိစ္စအပြင် အရင်တုန်းက အကြွေးဝယ် ကတ်ပြားသုံးဖို့ ရုန်းကန်နေရတဲ့ ဗီဒီယို တစ်ခု ထွက်ပေါ်ဖူးတာကိုပါ ညောင်မြစ်ပြန်တူးပြီး ဆူနက်ခ်ကို ဝေဖန် တိုက်ခိုက်ခဲ့ပါတယ်။ ဝန်ကြီးချုပ်ဟာ ကားပေါ်က လုံခြုံရေးခါးပတ်၊ အကြွေးဝယ်ကတ်၊ ရထားစီးနင်းမှုတွေ ဘာမှ မလုပ်တတ်သလို ယုတ်စွအဆုံး ဒီနိုင်ငံရဲ့ စီးပွားရေးကိုလည်း ထဲထဲဝင်ဝင် သိရှိပြီး စီမံခန့်ခွဲနိုင်မှာ မဟုတ်ကြောင်း၊ ဝန်ကြီးချုပ် မလုပ်တတ်တဲ့ ကိစ္စတွေရဲ့ စာရင်းဟာ တစ်နေ့ပြီးတစ်နေ့ တိုးလာနေကြောင်း လေဘာပါတီ ပြောရေးဆိုခွင့်ရ အရာရှိ တစ်ဦးက ပြောကြားသွားပါတယ်။
