ဇွန်လ ၁၉ ရက်က အလာဘားမား ပြည်နယ်မှာ မုန်တိုင်း ရာသီဥတုတွေ ဖြစ်ပေါ်နေတဲ့အချိန် အခုလို ဆိုးရွားတဲ့ ယာဉ်မတော်တဆမှုနဲ့ ကြုံခဲ့ရတာပါ။ ကားတွေ အစုအပြုံလိုက် တိုက်မိတဲ့ အကြောင်းရင်းကို အတိအကျ မသိရသေးပေမယ့် လမ်းပေါ်မှာ ရေခဲပြီး လမ်းချော်သွားတာကြောင့် ဖြစ်နိုင်တယ်လို့ စုံထောက်တွေက ယူဆထားပါတယ်။
သေဆုံးသူတွေထဲမှာ အသက် ၉ လအရွယ် မိန်းကလေးငယ် တစ်ဦးနဲ့ ဖခင်ဖြစ်သူတို့ ပါဝင်ပြီး ကျန်တဲ့ ၈ ဦးကတော့ အသက် ၃ နှစ်နဲ့ ၁၇ နှစ်ကြား ကလေးတွေ ဖြစ်ပါတယ်။ အဲဒီ ကလေးတွေကတော့ ဒေသတွင်းမှာရှိတဲ့ မိဘမဲ့ ဂေဟာ တစ်ခုမှာ နေထိုင်သူတွေလို့ ဆိုပါတယ်။ ဂေဟာက ဘတ်စ်ကားနဲ့ ကလေးတွေကို ခေါ်ဆောင်လာချိန်မှာ အခုလို အဖြစ်ဆိုး ကြုံသွားခဲ့ရတာပါ။
ယာဉ်တိုက်မှုဖြစ်ပြီး ချက်ချင်းလိုလို ဘတ်စ်ကားက မီးလောင်ခဲ့တာကြောင့်လည်း ပိတ်မိနေသူတွေကို ကယ်ထုတ်ဖို့ အခက်ကြုံခဲ့တာလို့ မျက်မြင်တွေက ပြောပါတယ်။ ဒီဖြစ်စဉ် အတောအတွင်း လူ ၅ ဦးလည်း ဒဏ်ရာတွေ ရခဲ့ကြပါတယ်။
အဲဒီနေ့ကပဲ အလာဘားမားမှာ မုန်တိုင်းတွေ တိုက်ခတ်ပြီး နေအိမ်ပေါ် သစ်ပင်ပြိုကျလို့ ကလေး ၁ ဦးနဲ့ လူငယ် ၁ ဦး အသက်ဆုံးရှုံးခဲ့ပါသေးတယ်။ အလာဘားမား ပြည်နယ် အုပ်ချုပ်ရေးမှူး ကေအိုင်ဗီးက ဒါဟာ ပြည်နယ်အတွက် အမှောင်မိုက်ဆုံး နေ့တစ်နေ့ ဖြစ်ခဲ့တယ်လို့ Twitterမှာ ရေးသားသွားခဲ့ပါတယ်။
Public Service Announcement
