ပနားမား နိုင်ငံမှာ မှတ်ပုံတင်ထားတဲ့ Crimson Polaris သင်္ဘောဟာ ဂျပန်မြောက်ပိုင်း၊ ဟာချီနိုဟီ ဆိပ်ကမ်းကို ဦးတည် ခုတ်မောင်းနေရင်း ဩဂုတ် ၁၁ ရက်မှာ သောင်တင်သွားခဲ့ပါတယ်။ နောက်တော့ သောင်တင်ရာက လွတ်မြောက်အောင် ရုန်းထွက်နိုင်ခဲ့ပေမယ့် ရာသီဥတု ဆိုးရွားမှုနဲ့ တခြားထိခိုက်မှုတွေကြောင့် ကိုယ်ထည် နှစ်ပိုင်း ကျိုးသွားခဲ့တာလို့ ကမ်းခြေစောင့် တပ်ဖွဲ့က ပြောပါတယ်။
သင်္ဘောပေါ်မှာ တရုတ်နဲ့ ဖိလစ်ပိုင် နိုင်ငံသား အမှုထမ်း ၂၁ ဦး လိုက်ပါလာပြီး အားလုံးကို ကယ်ဆယ်နိုင်ခဲ့ပါတယ်။ တန်ချိန်လေးသောင်းနီးပါးရှိတဲ့ သင်္ဘောကြီးဟာ ရေနံတွေ တင်ဆောင်လာတာကြောင့် ကိုယ်ထည် ကျိုးပျက်ချိန်မှာ ပင်လယ်ထဲ ရေနံတွေ ယိုစိမ့်ကုန်တာပါ။ အခင်းဖြစ်တဲ့ နေရာတဝိုက်မှာ ၁၅ မိုင်လောက်ရှည်တဲ့ ဆီကွက်ကြီးကို ဝေဟင်ကနေ တွေ့မြင်နိုင်ပါတယ်။
အာဏာပိုင်တွေက အဲဒီ ယိုစိမ့်မှုကို ထိန်းချုပ်ဖို့ ကြိုးစားနေပေမယ့် လက်ရှိ အချိန်ထိတော့ အခက်အခဲ ပေါင်းစုံနဲ့ ရုန်းကန်နေရဆဲ ဖြစ်ပါတယ်။ အဲဒီနေရာ တဝိုက်ကို တခြားသင်္ဘောတွေ ရောက်မလာဖို့အတွက် ကမ်းခြေစောင့် တပ်တွေက လမ်းကြောင်းရှင်းနေပါတယ်။
ရေနံ ယိုစိမ့်မှုတွေကို ထိန်းချုပ်နိုင်ရင်တော့ နှစ်ပိုင်းကျိုးနေတဲ့ သင်္ဘောကြီးကို ဆယ်ယူ ဖယ်ရှားဖို့ လုပ်ငန်း စတင်လာဖွယ် ရှိကြောင်းလည်း သိရပါတယ်။
Public Service Announcement
