အစ္စမေးလ် ဆာဘရီ ယာကော့ဘ်ဟာ ဩဂုတ် ၂၂ ရက်က မလေးရှား ဝန်ကြီးချုပ်သစ်အဖြစ် ကျမ်းသစ္စာ ကျိန်ဆိုခဲ့ပါတယ်။ သူဟာ မလေးရှားမှာ ၁၈ လအတွင်း ၃ ယောက်မြောက် ပြောင်းလဲသွားတဲ့ ဝန်ကြီးချုပ်လည်း ဖြစ်ပါတယ်။ မလေးရှားဟာ ပြိုင်ဘက် နိုင်ငံရေး အင်အားစုတွေကြား အားပြိုင်မှုတွေကြောင့် တည်ငြိမ်တဲ့ အစိုးရတစ်ရပ် ဖွဲ့စည်းနိုင်ဖို့ ရုန်းကန်ရတဲ့ အခြေအနေတွေနဲ့ ရင်ဆိုင်နေရပါတယ်။
ပြီးခဲ့တဲ့ အစိုးရနှစ်ဆက် ပြုတ်ကျသွားတာဟာလည်း နောက်ကွယ်က နိုင်ငံရေး ဖိအားပေးမှုတွေကြောင့် ဖြစ်ပါတယ်။ အစ္စမေးလ်က အမြင်ကွဲပြားမှုတွေကို သေချာ မဖော်ထုတ်နိုင်သ၍ အချင်းချင်း စည်းလုံးဖို့ မဖြစ်နိုင်ဘူးလို့ ပြောပါတယ်။ ပြည်တွင်းမှာ နိုင်ငံရေး ပဋိပက္ခတွေ ဖြစ်ပေါ်နေတဲ့ အခြေအနေတိုင်းကို နားလည် သဘောပေါက်ကြောင်း၊ ဒါပေမဲ့ အခုအချိန်မှာတော့ အားလုံး စုပေါင်းပြီး နိုင်ငံရေး ပြန်လည် တည်ငြိမ်မှုကို ဆောင်ကြဉ်းဖို့ အရေးကြီးကြောင်း၊ နိုင်ငံရေး ပါတီတွေ အချင်းချင်း ပူးပေါင်း ဆောင်ရွက်တာတွေ လိုအပ်ကြောင်း ဝန်ကြီးချုပ်က ဆိုပါတယ်။
ရာထူးက နုတ်ထွက်ခဲ့တဲ့ မူယစ်ဒင် ယာဆင်ရဲ့ ဝန်ကြီးချုပ် နေရာကို အစ္စမေးလ်က ဆက်ခံမယ်လို့ မလေးရှား ဘုရင်က ပြီးခဲ့တဲ့ သီတင်းပတ်ကုန်မှာ ကြေညာခဲ့ပါတယ်။ မလေးရှား လွှတ်တော်မှာ အမတ်ပေါင်း ၂၂၀ ရှိတဲ့အနက် ၁၁၄ ဦးက အစ္စမေးလ်ကို ထောက်ခံ မဲပေးခဲ့ကြပါတယ်။
အစ္စမေးလ် ဝန်ကြီးချုပ် ဖြစ်သွားတာဟာ မလေးရှား အတိုက်အခံခေါင်းဆောင် အန်ဝါ အီဘရာဟင် အတွက်တော့ ကြီးမားတဲ့ ထိုးနှက်ချက် တစ်ခုပဲ ဖြစ်ပါတယ်။ သူဟာ ဝန်ကြီးချုပ်ဟောင်း မဟာသီယာ မိုဟာမက်ရဲ့ နေရာမှာ ဆက်ခံဖို့ သဘောတူညီမှု ရယူထားခဲ့ပေမယ့် လက်တွေ့ ဖြစ်မြောက်မလာဘဲ လက်ရှိ အချိန်ထိ အတိုက်အခံ အနေနဲ့သာ ဆက်ရှိနေပါတယ်။ ၂၀၂၀ ပြည့်နှစ် အစောပိုင်းမှာတော့ မဟာသီယာက ဝန်ကြီးချုပ် ရာထူးက နုတ်ထွက်ခဲ့ပြီး အဲဒီအချိန်ကစလို့ ပြည်တွင်း နိုင်ငံရေး မတည်ငြိမ်မှုတွေ ဆက်တိုက် ပေါ်ပေါက်နေခဲ့တာ ဖြစ်ပါတယ်။
Public Service Announcement
