မလေးရှား ဝန်ကြီးချုပ်သစ် အစ္စမေးလ် ဆာဘရီ ယာကော့ဘ်ဟာ Quarantine ဝင်နေရတဲ့အတွက် ကျမ်းသစ္စာ ကျိန်ဆိုပွဲ အခမ်းအနားနဲ့ လွဲချော်သွားခဲ့ပါတယ်။
သူနဲ့ အနီးကပ် ထိတွေ့ခဲ့သူ တစ်ဦးဟာ Covid-19 ရောဂါ ဖြစ်ပွားနေကြောင်း ဆေးစစ် တွေ့ရှိခဲ့တဲ့နောက် ကျန်းမာရေး ဌာနရဲ့ စည်းမျဉ်းတွေနဲ့အညီ Quarantine ဝင်သွားမယ်လို့ အစ္စမေးလ်က ပြောပါတယ်။ ဒါကြောင့်လည်း ဩဂုတ် ၃၀ မှာ ကျင်းပမယ့် အစိုးရသစ် ကျမ်းသစ္စာ ကျိန်ဆိုပွဲကို အစ္စမေးလ် မတက်ရောက် ဖြစ်တော့ပါဘူး။
ဝန်ကြီးတွေနဲ့ ဒုတိယ ဝန်ကြီးတွေက မလေးရှားဘုရင် အယ်လ်ဆူလ်တန် အက်ဘ်ဒူလာ ရီယာတူဒင် အယ်လ်မူစတာဖာ ဘီလာရှားဟ် ရှေ့မှောက် ကျမ်းသစ္စာ ကျိန်ဆိုကြမှာ ဖြစ်ပေမယ့် ဝန်ကြီးချုပ်တော့ အခမ်းအနား မတက်ဖြစ်ဘူးလို့ အစ္စမေးလ်ရဲ့ ရုံးအဖွဲ့က ကြေညာပါတယ်။
ပူထရာဂျာယားမှာ ဩဂုတ် ၃၁ ရက်ကျရင် ပြုလုပ်မယ့် အမျိုးသားနေ့ အခမ်းအနားကိုလည်း ဝန်ကြီးချုပ်က လွဲချော်မှာဖြစ်ပြီး အွန်လိုင်းကသာ ချိတ်ဆက် ပါဝင်ဖို့ စီစဉ်ထားပါတယ်။ အစောပိုင်း သတင်းတွေအရ ဒုတိယ ဝန်ကြီးချုပ် မိုဟာမက် အလာမင်လည်း ရောဂါစွဲကပ်နေလို့ ကျမ်းသစ္စာ ကျိန်ဆိုပွဲနဲ့ လွဲချော်မယ်လို့ သိရပါတယ်။
Public Service Announcement
အစ္စမေးလ်ရဲ့ အစိုးရ အဖွဲ့သစ်မှာ ဝန်ကြီး ၃၁ ဦးနဲ့ ဒုတိယ ဝန်ကြီး ၃၈ ဦး ပါဝင်ပါတယ်။ မလေးရှားဟာ ပြီးခဲ့တဲ့ ၂ နှစ်အတွင်း နိုင်ငံရေး မတည်ငြိမ်မှုတွေ ဆက်တိုက် ကြုံနေရပြီး ဝန်ကြီးချုပ် ၃ ဆက် ပြောင်းခဲ့ပါတယ်။ အစ္စမေးလ်ကတော့ သူ့အစိုးရ လက်ထက်မှာ နိုင်ငံရေး အင်အားစုတွေကို ပြန်လည် ရင်ကြားစေ့ဖို့ ကြိုးစားသွားမှာဖြစ်ကြောင်း ပြောကြားထားပါတယ်။
