အာဖဂန် နစ္စတန်နိုင်ငံ၊ ကဘူးလ်မြို့တော်က အမေရိကန် စစ်တပ်တွေ အခြေစိုက် နေရာယူထားတဲ့ လေဆိပ်ထဲကို ဒုံးကျည် ငါးစင်းထက်မနည်း ပစ်ခတ် တိုက်ခိုက်တာ ကြုံခဲ့ရကြောင်း သိရပါတယ်။
ဩဂုတ် ၃၀ မနက်ပိုင်းက ဟာမစ်ကာဇိုင်း လေဆိပ်ကို ဦးတည်ပြီး ဒုံးကျည်တွေနဲ့ ပစ်ခတ်ခဲ့တာ ဖြစ်တယ်လို့ အမေရိကန် အာဏာပိုင်တွေက ပြောပါတယ်။ လေဆိပ်မှာ တပ်ဆင်ထားတဲ့ C-RAM ဒုံးကျည် ကာကွယ်ရေး စနစ်က ကျူးကျော်ဝင်ရောက်လာတဲ့ ဒုံးကျည်တွေကို တုံ့ပြန်ဖျက်ဆီးနိုင်ခဲ့တယ်လို့ ဆိုပါတယ်။
လေဆိပ်ကို တိုက်ခိုက် ခံရမှုမှာ အသေအပျောက် သတင်းတွေတော့ မကြားခဲ့ရပါဘူး။ ကဘူးလ် အခြေစိုက် အမေရိကန် သံရုံးက လေဆိပ်ကို နောက်ထပ် အကြမ်းဖက် တိုက်ခိုက်မှုတွေ ရှိလာနိုင်တယ်လို့ သတိပေးထားပြီး မကြာခင်မှာပဲ ဒုံးကျည်နဲ့ အပစ်ခံခဲ့ရတာပါ။
ပြီးခဲ့တဲ့ သီတင်းပတ်ကလည်း လေဆိပ်နားမှာ ဗုံးပေါက်ကွဲမှုတွေကြောင့် အမေရိကန် စစ်သည် ၁၃ ဦး အပါအဝင် လူပေါင်း ၁၇၀ ကျော် သေဆုံးခဲ့ပါတယ်။ ကဘူးလ်ကို တာလီဘန် စစ်သွေးကြွတွေက ပြန်လည် ထိန်းချုပ်လိုက်တဲ့နောက် အာဖဂန်မှာ ရှိနေတဲ့ အမေရိကန် နိုင်ငံသားတွေနဲ့ လုံခြုံရေး စိုးရိမ်ရသူတွေကို လေယာဉ်တွေနဲ့ အရေးပေါ် ရွှေ့ပြောင်းပေးဖို့ အမေရိကန် စစ်တပ်က တာဝန်ယူထားတာပါ။
Public Service Announcement
လေဆိပ်ကို ဒုံးကျည်နဲ့ လှမ်းပစ်တာဟာ အာဖဂန် အခြေစိုက် အိုင်အက်စ် အဖွဲ့ခွဲ အိုင်ဆစ်ကေရဲ့ လက်ချက် ဖြစ်နိုင်တယ်လို့ ယူဆရပေမယ့် အတည်ပြုလို့တော့ မရသေးပါဘူး။ အိုင်ဆစ်ကေဟာ လေဆိပ် ဗုံးခွဲမှုကို ကျူးလွန်ခဲ့တဲ့ အကြမ်းဖက် အဖွဲ့ပါ။ ပြီးတော့ အာဖဂန်မှာ တာလီဘန်တွေရဲ့ ပြိုင်ဘက်အဖြစ် ရပ်တည်နေပါတယ်။
ကနဦး စုံစမ်းမှုတွေအရ အိမ်စီးကား တစ်စီးပေါ်မှာ ပစ်စင်တင်ပြီး ဒုံးကျည်တွေနဲ့ ပစ်ခတ်ခဲ့တာလို့ ယုံကြည်ရကြောင်း သိရပါတယ်။ အဲဒီကားကတော့ မီးလောင် ပျက်စီးနေတာကို တွေ့ရပါတယ်။ နောက်ပိုင်းမှာ တာလီဘန် လက်နက်ကိုင်တွေ ရောက်လာပြီး အခင်းဖြစ်ရာ နေရာတဝိုက်ကို ပိတ်ဆို့ထားပြီး စစ်ဆေးမှုတွေ ပြုလုပ်ခဲ့ပါတယ်။
အမေရိကန်ဟာ လေဆိပ် ဗုံးခွဲမှု အပြီးမှာ အိုင်ဆစ်ကေ အဖွဲ့ကို လေကြောင်းကနေ လက်တုံ့ပြန် တိုက်ခိုက်နေပါတယ်။ ဩဂုတ် ၂၉ ရက်က အမေရိကန်ရဲ့ ဒရုန်းနဲ့ တိုက်ခိုက်မှု တစ်ခုမှာ ကလေး ၆ ဦး အပါအဝင် လူ ၉ ဦး သေဆုံးခဲ့ကြောင်း သတင်းတွေ ထွက်ပေါ်နေပေမယ့် အမေရိကန် စစ်ဘက်ကတော့ အရပ်သားတွေ အသေအပျောက် ရှိတယ်ဆိုတဲ့ အထောက်အထား မတွေ့ကြောင်း ငြင်းဆိုထားပါတယ်။
