အိန္ဒိယနဲ့ နီပေါမှာ ရေကြီးလို့ သေဆုံးသူ ၂၀၀ ကျော်ရှိလာ

အိန္ဒိယနဲ့ နီပေါ နိုင်ငံတွေမှာ မိုးသည်းသည်းထန်ထန် ရွာသွန်းပြီး ရေကြီးမှုတွေကြောင့် သေဆုံးသူ ၂၀၀ ကျော်ထိ များပြားလာကြောင်း သိရပါတယ်။

အောက်တိုဘာ ၂၂ ရက်မှာတော့ နီပေါမှာ ရေကြီးမှုတွေ၊ မြေပြိုမှုတွေ ထပ်မံဖြစ်ပွားပြီး အသေအပျောက် ၁၀၄ ဦးထိ ရှိလာပါတယ်။ အဲဒီ မတိုင်ခင် ၂ ရက်ကတည်းက သဘာဝ ဘေးအန္တရာယ်ကြောင့် သေဆုံးမှု သတင်းတွေ ကြားသိနေခဲ့ရတာလို့ ပြည်ထဲရေးဝန်ကြီးဌာန ပြောရေးဆိုခွင့်ရ အရာရှိ ဖာနင်ဒရာ မာနီ ဖိုခါရဲလ်က ပြောပါတယ်။

နီပေါနိုင်ငံ အနှံ့အပြားမှာ ရေဘေးသင့်နေသလို အိန္ဒိယက ကီရာလာနဲ့ အူတက်ရာခန် ပြည်နယ်တွေမှာလည်း ရေကြီးမှုတွေကြောင့် လူပေါင်း ရာနဲ့ချီ သေဆုံးနေပါတယ်။ ပြီးတော့ အာရှတောင်ပိုင်း နှစ်နိုင်ငံလုံးမှာ ရေလွှမ်းမိုးမှုတွေ အတောအတွင်း ပျောက်ဆုံးနေသူ ဒါဇင်ပေါင်း အတော်များများ ရှိနေတယ်လို့လည်း သိရပါတယ်။

အူတက်ရာခန် ပြည်နယ်မှာ ကယ်ဆယ်ရေး လုပ်ငန်း ဆောင်ရွက်မှုတွေ ပြီးစီးလုနီးပါး ဖြစ်နေပေမယ့် ကီရာလာမှာတော့ ရေမြုပ်ဧရိယာတွေမှာ ပိတ်မိနေသူတွေကို ဖြန့်ကျက် ရှာဖွေနေဆဲပါ။ ပြီးတော့ အိန္ဒိယ စစ်တပ်ရဲ့ ရဟတ်ယာဉ်တွေကိုလည်း ကယ်ဆယ်ရေး လုပ်ငန်းတွေမှာ ပူးပေါင်းဖို့ စေလွှတ်ထားပါတယ်။

Public Service Announcement

နီပေါနဲ့ အိန္ဒိယ နှစ်နိုင်ငံစလုံးမှာ အောက်တိုဘာ ၂၂ ရက်ကစလို့ မိုးနည်းနည်း လျော့လာပေမယ့် ရေကြီးပြီး တင်ကျန်ခဲ့တဲ့ အမှိုက်သရိုက်တွေက လမ်းတွေပေါ် ပိတ်ဆို့နေလို့ ကူးသန်းသွားလာရေး ခက်ခဲနေဆဲပါ။ အိန္ဒိယမှာတော့ အီလမ်ခရိုင်က ရေကြီးမှုကြောင့် အသေအပျောက် အများဆုံး ဖြစ်နေပြီး ခရိုင်တစ်ခုတည်းမှာတင် လူ ၄၀ နီးပါး အသက်ဆုံးရှုံးခဲ့ပါတယ်။

နီပေါ မိုးလေဝသ ဦးစီးဌာနကတော့ အခုသီတင်းပတ်ကုန်မှာ နိုင်ငံအနှံ့က မိုးရွာသွန်းမှုတွေ၊ ဆီးနှင်းကျဆင်းမှုတွေ တဖြည်းဖြည်း လျော့ပါးလာမယ်လို့ ခန့်မှန်း ကြေညာသွားပါတယ်။