အိန္ဒိယ ပြည်နယ် တစ်ခုမှာ ကိုဗစ်ကြောင့် သေသူ ဦးရေကို လျှော့ပေါ့ကြေညာထားကြောင်း အာဏာပိုင်တွေ ဝန်ခံ

နိုင်ငံ အနောက်ပိုင်းက ဂူဂျာရတ် ပြည်နယ်မှာ ကိုဗစ်ရောဂါ ပျံ့နှံ့ ဖြစ်ပွားမှုတွေကြောင့် သေဆုံးသူ ဦးရေဟာ တရားဝင် ထုတ်ပြန်တဲ့ ကိန်းဂဏန်းတွေထက် အများကြီး ပိုနိုင်ကြောင်း တရားရုံး မှတ်တမ်း တစ်ခုမှာ ဖော်ပြထားပါတယ်။ ဒေသတွင်း မီဒီယာတွေက ရင်ခွဲရုံတွေ၊ သုဿန်တွေကို ချိတ်ဆက် စုံစမ်းခဲ့တဲ့နောက် ကိုဗစ်ကြောင့် သေဆုံးသူ အရေအတွက်ဟာ ပြည်နယ် အစိုးရ ထုတ်ပြန်ထားတာထက် အများကြီး ပိုနိုင်ကြောင်း စတင် ဖော်ပြလာခဲ့ကြပါတယ်။

အိန္ဒိယ ဝန်ကြီးချုပ် နာယန်ဒရာ မိုဒီရဲ့ ဇာတိပြည်နယ်ဖြစ်တဲ့ ဂူဂျာရတ်မှာ ပြည်နယ် တရားရုံးချုပ်က ကိုဗစ်ကြောင့် သေဆုံးသူ ၂၂၅၅၇ ဦးရဲ့ မိသားစုဝင်တွေဆီက အကြောင်းကြားမှုတွေကို လက်ခံ ရရှိခဲ့ပါတယ်။ ဒါပေမဲ့ ၁၆၁၇၅ ခုကိုသာ တရားရုံးချုပ်က အသိအမှတ် ပြုပေးခဲ့တယ်လို့ ဆိုပါတယ်။ အဲဒီအချိန်ထိ ဂူဂျာရတ် ပြည်နယ် အစိုးရက ထုတ်ပြန်ထားတဲ့ သေဆုံးသူ ဦးရေဟာ ၁၀၀၉၉ ဦးသာ ရှိခဲ့ပါတယ်။

ဂူဂျာရတ်မှာ ကိုဗစ်ကြောင့် သေဆုံးမှုတွေအတွက် နစ်နာကြေး ၅၀၀၀၀ ရူပီး (ဒေါ်လာ ၆၆၀ ဝန်းကျင်) ပေးလေ့ ရှိတာကြောင့် ကိုဗစ်ကြောင့် သေတာ ဟုတ်မဟုတ် တရားရုံးရဲ့ စစ်ဆေး အတည်ပြုချက်က အရေးကြီးသလို ဖြစ်ပါတယ်။ အတိုက်အခံ အင်အားစုတွေကတော့ ဂူဂျာရတ်မှာ ရောဂါကြောင့် အမှန်တကယ် သေဆုံးသူ အရေအတွက်ဟာ တရားရုံးချုပ်မှာ ပြုစုထားတဲ့ စာရင်းထက် အများကြီး ပိုလိမ့်ဦးမယ်လို့ ဝေဖန် ပြောဆိုထားကြပါတယ်။

ဒီပြဿနာမျိုးဟာ ဂူဂျာရတ်ပြည်နယ် တစ်ခုတည်းမှာသာ မကဘဲ အိန္ဒိယ တစ်နိုင်ငံလုံးမှာ ရှိနေနိုင်တယ်လို့လည်း ဝေဖန်မှုတွေ ကျယ်ကျယ်ပြန့်ပြန့် ထွက်ပေါ်နေပါတယ်။ လက်ရှိ အချိန်ထိ တရားဝင် စာရင်းတွေအရ အိန္ဒိယမှာ လူပေါင်း ၃၄.၇ သန်းလောက် ကိုဗစ်ရောဂါ ကူးစက်ခံရပြီး သေဆုံးသူ ၄ သိန်း ၈ သောင်းနီးပါး ရှိနေကြောင်း သိရပါတယ်။

Public Service Announcement