သဘာဝဘေး ကြုံနေချိန် အပန်းဖြေ ခရီးထွက်နေခဲ့မိတာကြောင့် ဂျာမန် အစိုးရ ဝန်ကြီးတစ်ဦး နုတ်ထွက်ရ

နိုင်ငံမှာ သဘာဝ ဘေးအန္တရာယ် ကြုံနေတဲ့အချိန် အပန်းဖြေခရီး ထွက်နေခဲ့တဲ့ ကိစ္စကြောင့် ဂျာမန် အစိုးရ အဖွဲ့ဝင် ဝန်ကြီးတစ်ဦး ရာထူးက နုတ်ထွက်ခဲ့ရပါတယ်။

အန်းစပိုင်ဂယ်လ်က သူဟာ အမျိုးသမီးနဲ့ ကလေးများရေးရာ ဝန်ကြီးအဖြစ်က နုတ်ထွက်စာ တင်လိုက်ပြီလို့ ဧပြီ ၁၁ ရက်မှာ အတည်ပြု ပြောကြားသွားပါတယ်။ သူဟာ ပြီးခဲ့တဲ့နှစ်၊ ပြည်နယ် အစိုးရအဖွဲ့ အရာရှိ ဘဝတုန်းက ဂျာမနီမှာ လူပေါင်း ၁၀၀ ကျော် သေဆုံးခဲ့တဲ့ ရေကြီးမှုတွေ ဖြစ်ပွားနေချိန်အတွင်း အပန်းဖြေ အပျော်ခရီး ထွက်နေခဲ့ကြောင်း ပေါ်ပေါက်လာတဲ့နောက် ဝေဖန်မှုတွေ အကြီးအကျယ် ခံခဲ့ရပါတယ်။

သူဟာ နိုင်ငံရေး ဖိအားတွေနဲ့ ရင်ဆိုင်နေရကြောင်း၊ လက်ရှိ အခြေအနေတွေအရ ဝန်ကြီးရာထူးကနေ နုတ်ထွက်ခြင်းက အားလုံးအတွက် အကောင်းဆုံး ရွေးချယ်မှု ဖြစ်လာမယ်လို့ ယုံကြည်ကြောင်း ပြောကြားခဲ့ပါတယ်။ ဂျာမနီ အဓိပတိ အိုလက်ဖ်ရှော့ဇ် ဦးဆောင်တဲ့ အစိုးရသစ် လက်ထက်မှာတော့ စပိုင်ဂယ်လ်ဟာ ရာထူးက နုတ်ထွက်ရတဲ့ ပထမဆုံး ဝန်ကြီး ဖြစ်လာပါတယ်။

သူဟာ ပြီးခဲ့တဲ့နှစ် ဒီဇင်ဘာလ မတိုင်ခင်၊ ရှော့ဇ်ရဲ့ အစိုးရ အဖွဲ့နဲ့ မပူးပေါင်းခင်က ရိုင်းလန်း-ပါလီတီနိတ် ပြည်နယ်ရဲ့ ဒုတိယ ဝန်ကြီးချုပ်နဲ့ သဘာဝ ပတ်ဝန်းကျင်ဆိုင်ရာ ဝန်ကြီးအဖြစ် တာဝန် ယူနေခဲ့ပါတယ်။ မနှစ်က ဇူလိုင်လမှာ အဲဒီပြည်နယ်ဟာ ဆိုးဆိုးရွားရွား ရေကြီးမှုတွေနဲ့ ကြုံတွေ့ခဲ့ပြီး လူပေါင်း ၁၄၀ နီးပါး သေဆုံးခဲ့ပါတယ်။

Public Service Announcement

လူ့အသက်တွေ ဆုံးရှုံးမှုနဲ့ ပတ်သက်လို့ ပြည်နယ် အစိုးရ အဖွဲ့ရဲ့ စီမံကိုင်တွယ်မှုတွေအပေါ် ဝေဖန် မေးခွန်းထုတ်မှုတွေ အဲဒီအချိန် ကတည်းက ရှိခဲ့ပါတယ်။ အခုတော့ ရေဘေးကြုံနေတဲ့ အချိန်တုန်းက စပိုင်ဂယ်လ်ဟာ မိသားစုနဲ့အတူ ပြင်သစ်ကို သီတင်းလေးပတ်ကြာ အလည်အပတ် ခရီး သွားရောက်နေခဲ့ကြောင်း ဖော်ထုတ် တွေ့ရှိလာတဲ့နောက် ပြည်သူတွေရဲ့ အမျက်ဒေါသနဲ့ ရင်ဆိုင်ခဲ့ရတာပါ။ စပိုင်ဂယ်လ်က ဒီကိစ္စတွေနဲ့ ပတ်သက်လို့ သူ့အနေနဲ့ ဘယ်လိုမှ လက်လှမ်းမမီနိုင်ခဲ့ဘူးလို့ ကာကွယ် ပြောဆိုခဲ့ပေမယ့် လုံလောက်တဲ့ ဖြေရှင်းမှုတော့ မဖြစ်ခဲ့ပါဘူး။

စပိုင်ဂယ်လ်နဲ့ အလားတူပဲ တခြားပြည်နယ် တစ်ခုက သဘာဝ ပတ်ဝန်းကျင်ဆိုင်ရာ ဝန်ကြီးတစ်ဦးကလည်း ရေကြီးနေတဲ့ အချိန်မှာ အပန်းဖြေ ခရီးစဉ်ကို ခဏလောက်ပဲ ဆိုင်းငံ့ပြီး မဖျက်သိမ်းခဲ့တာ ဖော်ထုတ် တွေ့ရှိတဲ့နောက် ရာထူးက နုတ်ထွက်ခဲ့ရပြီး ဖြစ်ပါတယ်။