ဆီနီဂေါ နိုင်ငံမှာ ဆေးရုံ မီးလောင်မှုကြောင့် မွေးကင်းစ ကလေးငယ် ၁၁ ဦး သေဆုံးခဲ့ကြောင်း သိရှိရပါတယ်။
နိုင်ငံ အနောက်ပိုင်းက တီဗော်အူနေးမြို့မှာ မေလ ၂၅ ရက် သန်းခေါင်ကျော် အချိန်က မီးလောင်မှု ဖြစ်ခဲ့တာလို့ ဆီနီဂေါ သမ္မတ မက်ကီဆောလ်က Twitterမှာ ရေးသားခဲ့ပါတယ်။ ကွယ်လွန်ခဲ့တဲ့ ကလေးငယ်တွေရဲ့ မိခင်တွေ၊ မိသားစုတွေနဲ့ထပ်တူ တစ်နိုင်ငံလုံး ကြေကွဲ ဝမ်းနည်းနေကြောင်းလည်း သမ္မတက ဆိုပါတယ်။
သတင်းတွေအရ ဆေးရုံရဲ့ မွေးကင်းစ ကလေးတွေ ထားရှိရာ အဆောင်မှာ မီးလောင်မှု ဖြစ်ခဲ့တာလို့ သိရပါတယ်။ မာမာ အက်ဘ်ဒူ အဇစ် ဆိုင်ဒါဘက်ခ် ဆေးရုံရဲ့ အုပ်ချုပ်ရေး အဖွဲ့က ဝါယာရှော့ကြောင့် မီးစတင် လောင်ကျွမ်းခဲ့တာလို့ ထုတ်ပြန်ထားပါတယ်။
မီးက စလောင်ပြီးတာနဲ့ အရမ်း မြန်မြန်ဆန်ဆန် ပျံ့နှံ့သွားကြောင်း၊ ကလေးငယ် ၃ ဦးကိုသာ ကယ်ထုတ်နိုင်ခဲ့ကြောင်း မြို့တော်ဝန် ဒမ်ဘာ ဒီယော့ပ်က ဆိုပါတယ်။ ဒေသခံ မီဒီယာတွေက အခင်းဖြစ်ပွားရာ ဆေးရုံဟာ အသစ် ဖွင့်လှစ်ထားတာ မကြာသေးဘူးလို့ ဖော်ပြခဲ့ပါတယ်။
Public Service Announcement
ဧပြီလတုန်းကလည်း နိုင်ငံ မြောက်ပိုင်းက လင်ဂူရီမြို့မှာ အလားတူ ဆေးရုံ မီးလောင်မှု ဖြစ်ပွားပြီး မွေးကင်းစ ကလေး ၄ ဦး အသက်ဆုံးရှုံးခဲ့ရပါတယ်။ အဲဒီတုန်းကလည်း သားဖွားဆောင်မှာ တပ်ဆင်ထားတဲ့ လေအေးပေးစက် စနစ်တွေမှာ ဝါယာရှော့ ဖြစ်ရာက မီးစလောင်ခဲ့တာလို့ သိရပါတယ်။
