နောက်ထပ် ကာလအတော်ကြာအောင် အငြင်းပွားစရာတွေ ဖြစ်နေစေမယ့် ခရီးစဉ်အပြီး အမေရိကန် အောက်လွှတ်တော် ဥက္ကဋ္ဌ နန်စီ ပလော့စီဟာ ထိုင်ဝမ်ကနေ ပြန်လည် ထွက်ခွာသွားပြီ ဖြစ်ပါတယ်။
တရုတ် အစိုးရက ပြင်းပြင်းထန်ထန် ဖိအားပေး ကန့်ကွက်နေတဲ့ ကြားကနေ ပလော့စီဟာ ဩဂုတ် ၂ ရက်မှာ ထိုင်ဝမ်ကို လေကြောင်းကနေ ဆိုက်ရောက်လာပါတယ်။ သူဟာ မြို့တော် ထိုင်ပေမှာ တစ်ညအိပ်ခဲ့ပြီး သမ္မတ ဆိုင်အင်ဝမ် အပါအဝင် ထိုင်ဝမ် အစိုးရ တာဝန်ရှိသူတွေနဲ့ တွေ့ဆုံခဲ့ပါသေးတယ်။ နောက်တစ်နေ့မှာတော့ ပလော့စီဟာ သူ့ရဲ့ အာရှ ခရီးစဉ် မူလအစီအစဉ်အတိုင်း တောင်ကိုရီးယား နိုင်ငံကို ခရီးဆက်ခဲ့ပါတယ်။
သူဟာ ၂၅ နှစ်တာ ကာလအတွင်း ထိုင်ဝမ်ကျွန်းကို ရောက်ရှိလာတဲ့ အဆင့်အမြင့်ဆုံး အမေရိကန် အစိုးရ အရာရှိအဖြစ် မှတ်တမ်း ဝင်ခဲ့ပါတယ်။ ထိုင်ဝမ်ဟာ ကိုယ်ပိုင် အုပ်ချုပ်မှုနဲ့ ရပ်တည်နေပေမယ့် တရုတ်ကတော့ ထိုင်ဝမ်ကျွန်းကို ပိုင်နက်နယ်မြေ တစ်ခုအဖြစ် သတ်မှတ်ထားသလို ထိုင်ဝမ်ရဲ့ သံတမန်ရေး လွတ်လပ်ခွင့်တွေကိုပါ စွက်ဖက် ထိန်းချုပ်ဖို့ ကြိုးစားနေခဲ့ပါတယ်။ ပလော့စီက ထိုင်ဝမ်ကို သွားရောက်ခဲ့တာဟာ အချိန်တိုလေး ဆိုပေမယ့်လည်း တရုတ် အတွက်တော့ ရိုက်ချက်ပြင်းတဲ့ ကိစ္စတစ်ခု ဖြစ်လာပါတယ်။
တရုတ် နိုင်ငံခြားရေး ဝန်ကြီးဌာနဟာ ဒီကိစ္စကို ကန့်ကွက်ဖို့ အမေရိကန် သံအမတ်ကို ဆင့်ခေါ်ခဲ့သလို ထိုင်ဝမ်ကျွန်း တဝိုက်မှာလည်း လာမယ့် ရက်ပိုင်းအတွင်း စစ်ရေး လေ့ကျင့်မှုတွေ လုပ်ဆောင်သွားမယ်လို့ ကြေညာခဲ့ပါတယ်။ တရုတ် နိုင်ငံခြားရေး ဝန်ကြီး ဝမ်ယိက မီးနဲ့ ကစားချင်သူတိုင်း ဇာတ်သိမ်း မကောင်းတတ်ကြောင်း၊ တရုတ်ကို စော်ကားသူတိုင်း အပြစ်ပေး ခံရမှာဖြစ်ကြောင်း၊ အမေရိကန်ဟာ တရုတ်ရဲ့ အချုပ်အခြာ အာဏာ ပိုင်ဆိုင်မှုကို ဒီမိုကရေစီဆိုတဲ့ ခေါင်းစဉ်အောက်ကနေ ပြောင်ပြောင်တင်းတင်း ချိုးဖောက်ခဲ့ကြောင်း ဝေဖန် ပြောကြားသွားပါတယ်။
Public Service Announcement
ပလော့စီ ထိုင်ဝမ်မှာ ရှိနေတဲ့အချိန် အတောအတွင်းမှာပဲ တရုတ် ကာကွယ်ရေး ဝန်ကြီးဌာနက အမေရိကန်ရဲ့ လုပ်ရပ်နဲ့ ပတ်သက်လို့ မျှတပြီး အမှန်တကယ် လိုအပ်တဲ့ တုံ့ပြန်မှုအဖြစ် ထိုင်ဝမ်ကျွန်းနဲ့ ၁၀ မိုင်လောက်အကွာ ပင်လယ်ပြင်မှာ လေတပ်၊ ရေတပ် ပူးပေါင်း စစ်ရေးလေ့ကျင့်မှုတွေ ဆောင်ရွက်သွားမယ်လို့ ကြေညာခဲ့ပါတယ်။
ထိုင်ဝမ် သမ္မတ ဆိုင်ကတော့ လက်ရှိ အနေအထားမှာ သူ့နိုင်ငံဟာ စစ်ရေး တင်းမာမှုတွေကို ရည်ရွယ်ချက်ရှိရှိ မြှင့်တင်ဖို့ အားထုတ်လာတာမျိုးကို ရင်ဆိုင်နေရကြောင်း အတည်ပြုခဲ့ပြီး ထိုင်ဝမ်ဟာ ကိုယ့်ကိုယ်ကိုယ် ကာကွယ်ဖို့ လုပ်နိုင်စွမ်း ရှိသမျှ အားလုံး လုပ်ဆောင်သွားမယ်လို့ ပြောကြားခဲ့ပါတယ်။
လောလောဆယ်တော့ ထိုင်ဝမ် ဆိပ်ကမ်း အာဏာပိုင်တွေက သင်္ဘောတွေ အနေနဲ့ တရုတ်ရဲ့ စစ်ရေးလေ့ကျင့်မှုတွေ ပြုလုပ်မယ့် ရေပြင်တွေကို ရှောင်ရှားသွားကြဖို့ တိုက်တွန်းထားပါတယ်။ ဒီအတောအတွင်း ထိုင်ဝမ်နဲ့ တရုတ်တို့ကို ပိုင်းခြားထားရာ ထိုင်ဝမ် ရေလက်ကြားမှာလည်း တရုတ် စစ်လေယာဉ်တွေ အုံနဲ့ကျင်းနဲ့ အင်အားပြ ပျံသန်းနေကြကြောင်း သိရပါတယ်။
