အီရန်လုပ် ဖောက်ခွဲရေး ဒရုန်းတွေဟာ ယူကရိန်းရဲ့မြို့တော် ကိယက်ဗ် တဝိုက်ကို ပထမဆုံးအကြိမ် ခြိမ်းခြောက်လာကြောင်း သိရပါတယ်။
အောက်တိုဘာ ၅ ရက်က ကိယက်ဗ်နဲ့ နီးနီးကပ်ကပ် တည်ရှိတဲ့ မြို့တစ်မြို့မှာ အီရန်ရဲ့ ကာမီကာဇီ ဒရုန်းတွေ ဆက်တိုက် ကျရောက် ပေါက်ကွဲပြီး ထိခိုက် ပျက်စီးမှုတွေ ဖြစ်ပေါ်ခဲ့ပါတယ်။ ဘီလာ ဆက်ခ်ဗာမြို့က အဆောက်အအုံတွေကို ဒရုန်း ၆ စင်း ထိမှန် ပေါက်ကွဲခဲ့ကြောင်း ဒေသခံတွေက ပြောပါတယ်။ ဘီလာ ဆက်ခ်ဗာဟာ ကိယက်ဗ်ရဲ့ တောင်ဖက် ၄၅ မိုင်လောက်သာ ကွာဝေးတဲ့ နေရာမှာ တည်ရှိပါတယ်။
အီရန်က တည်ဆောက်ထားတဲ့ Shahed-13 အမျိုးအစား ဒုံးကျည်တွေကို ရုရှားက စျေးသက်သက်သာသာနဲ့ ဝယ်ယူပြီး ယူကရိန်းတောင်ပိုင်း စစ်မြေပြင်မှာ အသုံးပြုနေတာ အတော်ကြာပါပြီ။ ဒါပေမဲ့ ရှေ့တန်း စစ်မြေပြင်နဲ့ ဝေးကွာပြီး ကိယက်ဗ်နားမှာ အီရန် ဒရုန်းတွေကို အသုံးပြု တိုက်ခိုက်တာကတော့ အခုတစ်ကြိမ် ပထမဆုံးပါပဲ။
ဒီဒရုန်းတွေဟာ ပစ်မှတ်ဆီ ပျံသန်းသွားပြီး ကိုယ်တိုင် အပျက်စီးခံ ဝင်တိုက်လေ့ ရှိတာကြောင့် ကာမီကာဇီ ဒရုန်းတွေလို့ ခေါ်ကြတာပါ။ ရုရှားကို တိုက်ခိုက်ရေး ဒရုန်းတွေ အကူအညီ ပေးနေတာကို ဆန္ဒပြတဲ့ အနေနဲ့ ယူကရိန်း အစိုးရက အီရန်နဲ့ သံတမန် ဆက်ဆံရေးကိုပါ လျှော့ချထားပါတယ်။ ယူကရိန်း တပ်ဖွဲ့ဝင်တွေက နိုင်ငံတောင်ပိုင်းမှာ အီရန်လုပ် ဒရုန်းတွေ တော်တော်များများကို ပစ်ချခဲ့ပေမယ့် အီရန်ကတော့ ရုရှားကို လက်နက်တွေ ထောက်ပံ့ပေးနေတာမျိုး မရှိကြောင်း အစဉ်တစိုက် ငြင်းဆိုနေပါတယ်။ ရုရှားကလည်း ဒီကိစ္စအပေါ် ဘာမှတ်ချက်မှ မပေးပါဘူး။
Public Service Announcement
ကာမီကာဇီ ဒရုန်းတွေ ထိမှန်တဲ့အတွက် ဘီလာ ဆက်ခ်ဗာက လူနေတိုက်တစ်လုံး ဆိုးဆိုးရွားရွား ပျက်စီးသွားပြီး တခြား အခြေခံ အဆောက်အအုံတွေလည်း ထိခိုက်ခဲ့တယ်လို့ ဆိုပါတယ်။ လူအသေအပျောက် ရှိသလား ဆိုတာကိုတော့ တိတိကျကျ မသိရသေးပါဘူး။
ယူကရိန်း တောင်ပိုင်းက ဆိပ်ကမ်းမြို့ဖြစ်တဲ့ အိုဒက်ဆာမှာတော့ အီရန် ကာမီကာဇီ ဒရုန်းတွေရဲ့ ရန်ကို အစဉ်တစိုက် ကြုံတွေ့နေရပါတယ်။ ကိယက်ဗ်မြို့တော်တဝိုက် ဧရိယာမှာတော့ အခုကိစ္စက ပထမဆုံးဖြစ်ပြီး ဒေသခံတွေ အကြီးအကျယ် တုန်လှုပ်ခဲ့ကြောင်း သိရပါတယ်။
