ဟောင်ကောင်မှာ ခရီးသည်တင် လေယာဉ်တစ်စီး ပျံတက်မယ့် အချိန်မှာ ချွတ်ချော် မှားယွင်းမှု ကြုံခဲ့တာကြောင့် လူပေါင်း တစ်ဒါဇင်နီးပါး ထိခိုက် ဒဏ်ရာရသွားခဲ့ပါတယ်။
ဇွန်လ ၂၄ ရက် မနက်ပိုင်းက Cathay Pacific လေကြောင်းလိုင်းရဲ့ ခရီးစဉ်အမှတ် CX880 လေယာဉ်ဟာ ဟောင်ကောင် နိုင်ငံတကာ လေဆိပ်ကနေ ပျံတက်ဖို့ ပြင်ဆင်ခဲ့ပေမယ့် နည်းပညာပိုင်း ချွတ်ချော်မှု တစ်ခု ဖြစ်နေမှန်း ထောက်လှမ်းမိခဲ့တဲ့နောက် လေယာဉ်မှူးက ခရီးစဉ်ကို ဖျက်သိမ်းဖို့ ဆုံးဖြတ်ခဲ့ပါတယ်။
လေယာဉ်မှူးက ပျံတက်မယ့် ဆုံးဖြတ်ချက်ကို အရေးပေါ် ပြင်ဆင်ပြီး သတ်မှတ် လမ်းညွှန်ချက်တွေနဲ့အညီ တုံ့ပြန် ဆောင်ရွက်ချိန်မှာ ခရီးသည် ၁၁ ဦးလောက် ဒဏ်ရာတွေ ရခဲ့တယ်လို့ လေကြောင်းလိုင်းက ပြောပါတယ်။ လေယာဉ်ပေါ်မှာ အမှုထမ်း ၁၇ ဦးနဲ့ ခရီးသည် ၂၉၃ ဦး လိုက်ပါလာပြီး ဟောင်ကောင်ကနေ လော့စ်အန်ဂျလိစ်ကို ပျံသန်းဖို့ ရည်ရွယ်ထားခဲ့တာ ဖြစ်ပါတယ်။
လေယာဉ်ရဲ့ တံခါးပေါက်တွေကို ဖွင့်ပြီး အရေးပေါ် လျှောတွေကနေတဆင့် ခရီးသည်တွေ ဆင်းသက်ကြရချိန်မှာ အခုလို ဒဏ်ရာတွေ ရခဲ့တာပါ။ ဒဏ်ရာရ ခရီးသည်တွေထဲက ၉ ဦးက ခဏအကြာမှာပဲ ဆေးရုံက ပြန်ခွင့်ရခဲ့ပြီး နောက်ထပ် ဆေးရုံဆက်တက်နေသူ ၂ ဦးအပြင် သူတို့ရဲ့ မိသားစုတွေကိုပါ လိုအပ်သမျှ ကူညီ ဖြည့်ဆည်းပေးသွားမယ်လို့ လေကြောင်းလိုင်းက ထုတ်ပြန်ထားပါတယ်။
Public Service Announcement
လေဆိပ် ရဲတပ်ဖွဲ့ရဲ့ အဆိုကို ကိုးကားပြီး RTHK သတင်းဌာနကတော့ လေယာဉ်ရဲ့ တာယာတစ်လုံး ပေါက်ကွဲသွားလို့ ခရီးစဉ် ရွှေ့ဆိုင်းလိုက်ရတာလို့ ဖော်ပြထားပေမယ့် လေကြောင်းလိုင်းကတော့ အသေးစိတ် မပြောသေးပါဘူး။ အဲဒီအစား ခရီးသည်တွေအတွက် စိတ်အနှောင့်အယှက် ဖြစ်စရာ ကြုံသွားရတာကိုပဲ လေကြောင်းလိုင်းက တောင်းပန်ထားပါတယ်။
