ဩဂုတ် ၃၁ ရက်နေ့တုန်းက Mi-8T အမျိုးအစား ရဟတ်ယာဉ်ဟာ ရုရှား အရှေ့ဖျားက ဝေးလံခေါင်သီပြီး ကမ္ဘာလှည့် ခရီးသွားတွေကြားမှာ လူသိများတဲ့ ကမ်ချက်ကာ ကမ်းရိုးတန်း ဒေသမှာ ပျံသန်းနေရင်း အဆက်အသွယ် ပြတ်တောက်သွားခဲ့ပါတယ်။ အဲဒီ ရဟတ်ယာဉ်ကို အင်အား အမြောက်အမြား အသုံးပြု ဖြန့်ကျက် ရှာဖွေခဲ့တဲ့နောက် ၂၄ နာရီ ဝန်းကျင်အကြာ စက်တင်ဘာ ၁ ရက်နေ့မှာ ရဟတ်ယာဉ်ပျက်ကို တွေ့ရှိခဲ့ပါတယ်။
ရဟတ်ယာဉ်ရဲ့ ထိခိုက်ပျက်စီးမှု အခြေအနေတွေအရ လိုက်ပါသွားသူ ၂၂ ဦးစလုံး အသက်ရှင်စရာ အကြောင်းမရှိဘူးလို့ ကယ်ဆယ်ရေးတွေက ပြောပါတယ်။ လက်ရှိ အချိန်ထိ အလောင်း ၁၇ လောင်းကို ရှာတွေ့ထားပြီး နောက်ထပ် ပျောက်ဆုံးနေသူတွေကိုလည်း ဖြန့်ကျက် ရှာဖွေနေပါတယ်။
Public Service Announcement
ကမ်ချက်ကာ ဒေသဟာ သဘာဝ မီးတောင်တွေနဲ့ လှပတဲ့ ရှုခင်းတွေကြောင့် ကမ္ဘာလှည့် ခရီးသွားတွေကြားမှာ အထူး ရေပန်းစားပါတယ်။ အခုပျက်ကျတဲ့ ရဟတ်ယာဉ်ဟာ Vityaz-Aero ကုမ္ပဏီက ပိုင်ဆိုင်တာဖြစ်ပြီး ဗက်ဇ်ကာဟက်ဇ် မီးတောင်နားက ပျံတက်လာပြီးတဲ့နောက် ရည်မှန်းထားတဲ့ နေရာဆီ ပြန်မရောက်ဘဲ ပျောက်ဆုံးသွားတာပါ။
ရဟတ်ယာဉ်ပေါ်မှာ အမှုထမ်း ၃ ယောက်နဲ့ ခရီးသည် ၁၉ ယောက် လိုက်ပါသွားတယ်လို့ သိရပါတယ်။ ဆိုဗီယက်ခေတ်က ထုတ်လုပ်ခဲ့တဲ့ Mi-Tတွေဟာ သက်တမ်း အိုဟောင်းနေပြီ ဖြစ်ပေမယ့် ရုရှားအနှံ့မှာတော့ ကျယ်ကျယ်ပြန့်ပြန့် သုံးစွဲနေကြဆဲ ဖြစ်ပါတယ်။
ရဟတ်ယာဉ် ပျက်ကျရတဲ့ အကြောင်းရင်းကို တိတိကျကျ မသိရသေးသလို သေဆုံးသူတွေနဲ့ ပတ်သက်တဲ့ အချက်အလက်တွေကို မထုတ်ပြန်သေးပါဘူး။
ရဟတ်ယာဉ် ပျက်ကျခဲ့တယ်လို့ ယူဆရတဲ့ အချိန်တုန်းက အဲဒီဧရိယာ တဝိုက်မှာ ရာသီဥတု မကြည်လင်သလို မြင်ကွင်းဝေဝါးနေနိုင်တယ်လို့ ကနဦး စစ်ဆေးမှု ရလဒ်တွေက ညွှန်ပြနေပါတယ်။
လေကြောင်းထိန်းသိမ်းရေး ဌာနနဲ့ နီးစပ်သူတွေရဲ့ အဆိုအရ ရဟတ်ယာဉ်ဟာ ပျံတက်ပြီး သိပ်မကြာခင်မှာတင် ရေဒါမြင်ကွင်းကနေ ပျောက်ဆုံးသွားခဲ့တာဖြစ်ပြီး ရဟတ်ယာဉ် အဖွဲ့သားတွေဆီက အရေးပေါ် အခြေအနေ အကူအညီ တောင်းခံတာမျိုးတွေလည်း မရှိခဲ့ဘူးလို့ သိရပါတယ်။
ကိုးကား: Reuters
