ယီမင်မှာ ဟိုသီ စစ်ရေးပစ်မှတ်တွေကို ချေမှုန်းခဲ့တယ်လို့ အမေရိကန် အတည်ပြု

ယီမင်နိုင်ငံ ပိုင်နက်ထဲက ဟိုသီ သူပုန်တွေရဲ့ စစ်ရေးပစ်မှတ်တွေကို ချေမှုန်း တိုက်ခိုက်ခဲ့ကြောင်း အမေရိကန် စစ်ဘက်က အတည်ပြု ပြောကြားခဲ့ပါတယ်။

အီရန်က ကျောထောက်နောက်ခံ ပေးထားတဲ့ ဟိုသီတွေရဲ့ စစ်ရေး ပစ်မှတ် ၁၅ ခုကို အောက်တိုဘာ ၄ ရက်နေ့က တိုက်ခိုက်ခဲ့ရာမှာ အမေရိကန်ရဲ့ စစ်လေယာဉ်တွေနဲ့ စစ်သင်္ဘောတွေကို အသုံးပြုခဲ့တယ်လို့လည်း အမေရိကန် ကာကွယ်ရေး ဝန်ကြီးဌာနဖြစ်တဲ့ ပင်တဂွန် စစ်ဌာနချုပ်က ကြေညာပါတယ်။

အခုတိုက်ခိုက်မှုဟာ ဒေသတွင်း လွတ်လပ်စွာ ရေကြောင်းသွားလာခွင့်ကို ကာကွယ်ဖို့ ရည်ရွယ်ချက်နဲ့ လုပ်ဆောင်တာလို့ အမေရိကန်က ဆိုပါတယ်။

Public Service Announcement

ဟိုသီတွေဟာ ဂါဇာကမ်းမြှောင်ဒေသမှာ အစ္စရေးနဲ့ ဟားမားစ်ပြောက်ကျားတွေ စစ်ပွဲ စတင်လာချိန် ကတည်းက ယီမင်ကမ်းလွန်ကို ဖြတ်သန်းသွားပြီး အစ္စရေးနဲ့ ဆက်စပ်တဲ့၊ ဒါမှမဟုတ် အစ္စရေးမှာ ကမ်းကပ်တဲ့ အရပ်ဖက် ရေယာဉ်တွေကို ပစ်မှတ်ထား တိုက်ခိုက်မှုတွေ မကြာခဏ လုပ်ဆောင်ခဲ့ပါတယ်။

ပင်တဂွန်က ပစ်မှတ်တွေအကြောင်း အသေးစိတ် မပြောပေမယ့် ဟိုသီတွေ မြို့တော်ဆာနား အပါအဝင် အဓိက မြို့ကြီးတချို့မှာ တိုက်ခိုက်မှုတွေ လုပ်ဆောင်ခဲ့တာလို့ ကြေညာပါတယ်။

မျက်မြင်တွေရဲ့ အဆိုအရ ဆာနား အပါအဝင် ယီမင်တောင်ပိုင်း မြို့ကြီးတချို့မှာ ပေါက်ကွဲသံတွေ ကြားနေခဲ့ရတယ်လို့ သိရပါတယ်။

မနှစ်က နိုဝင်ဘာလကစလို့ ဟိုသီတွေဟာ ပင်လယ်နီမှာ ဖြတ်သန်းခုတ်မောင်းတဲ့ ရေယာဉ်ပေါင်း ၁၀၀ လောက်ကို ဒုံးကျည်တွေ၊ ဒရုန်းတွေနဲ့ ပစ်ခတ် တိုက်ခိုက်ခဲ့ပြီး သင်္ဘော နှစ်စီး နစ်မြုပ်ခဲ့ပါတယ်။

အခုတိုက်ခိုက်မှုမှာတော့ ဟိုသီတွေရဲ့ လက်နက်စနစ်တွေ၊ အခြေစိုက် စခန်းတွေ၊ သိုလှောင်ရုံတွေကို အဓိက ပစ်မှတ်ထားခဲ့တယ်လို့ အရှေ့အလယ်ပိုင်းဒေသ စစ်ဆင်ရေးတွေကို ကွပ်ကဲနေတဲ့ အမေရိကန် စစ်ရေးဗဟိုဌာနက ထုတ်ပြန်ပါတယ်။

အခုသီတင်းပတ် အစောပိုင်းတုန်းက ဟိုသီတွေဟာ ယီမင်နိုင်ငံ ပိုင်နက်ထဲမှာ ပျံသန်းနေတဲ့ အမေရိကန်လုပ် MQ-9 ဒရုန်းတစ်စီးကို ပစ်ချခဲ့ကြောင်း ကြေညာပြီး အမေရိကန်ကလည်း အဲဒီဆုံးရှုံးမှုကို အတည်ပြုခဲ့ပါတယ်။ ပြီးခဲ့တဲ့ သီတင်းပတ်တုန်းကလည်း ဟိုသီတွေဟာ ဒေသတွင်းမှာရှိတဲ့ အမေရိကန် စစ်သင်္ဘောတွေကို ရှုပ်ထွေးတဲ့ ပုံစံတွေနဲ့ ပစ်မှတ်ထား တိုက်ခိုက်ခဲ့ပေမယ့် ဟိုသီတွေ အသုံးပြုတဲ့ လက်နက်တွေ အားလုံးကို ကြားဖြတ် ပစ်ချနိုင်ခဲ့ကြောင်း အမေရိကန်က ထုတ်ပြန်ခဲ့ပါတယ်။

ဟိုသီတွေဟာ အရှေ့အလယ်ပိုင်း ဒေသမှာ အီရန်ခံအဖြစ် ဖြန့်ကျက်ထားတဲ့ ဂါဇာက ဟားမားစ်၊ လက်ဘနွန်ဟာ ဟစ်ဇ်ဘိုလာတို့လို လက်နက်ကိုင် အင်အားစုတစ်ခု ဖြစ်ပါတယ်။

ကိုးကား: BBC⁩