အမေရိကန်မှာ အခြေချ နေထိုင်ခွင့် အထူးပါမစ်တွေကို ရောင်းချဖို့ စီစဉ်နေကြောင်း သမ္မတ ဒေါ်နယ်လ်ထရမ့်က အတည်ပြု ပြောကြားခဲ့ပါတယ်။
သူသမ္မတ ဖြစ်လာပြီး ချက်ချင်းဆိုသလို အမေရိကန်မှာ ဒုက္ခသည် လက်ခံမှု အစီအစဉ်တွေကို ဆိုင်းငံ့ခဲ့တဲ့ ထရမ့်ဟာ တစ်လလောက် အကြာမှာ အဲဒီ တန်ဖိုးကြီး နေထိုင်ခွင့် ဗီဇာ အစီအစဉ်အကြောင်း ထုတ်ပြောလာတာ ဖြစ်ပါတယ်။ ရွှေရောင်ကတ်လို့ ခေါ်ဝေါ်မယ့် အဲဒီ ဗီဇာဟာ နိုင်ငံခြားသား ငွေကြေး ချမ်းသာ ကြွယ်ဝသူတွေကို ရည်ရွယ်ပြီး လက်ရှိ အသုံးပြုနေတဲ့ အစိမ်းရောင်ကတ် တရားဝင် နေထိုင်ခွင့် ဗီဇာရဲ့ တန်ဖိုးမြင့် ဗားရှင်းလို့ ယူဆနိုင်ပါတယ်။
ရွှေရောင်ကတ် ကိုင်ဆောင်သူတွေ ဝင်ရောက်လာခြင်းက အမေရိကန်မှာ အလုပ်အကိုင် ဖန်တီးပေးမယ့်သူတွေ တိုးလာစေမယ့်အပြင် အမေရိကန်ရဲ့ လိုငွေပြမှုကိုလည်း လျှော့ချနိုင်မှာ ဖြစ်တယ်လို့ ထရမ့်က ဆိုပါတယ်။
အမေရိကန်မှာ သမ္မတဟောင်း ဂျိုးဘိုင်ဒန် အာဏာရနေတုန်းက ရုရှား-ယူကရိန်း စစ်ပွဲကို အကြောင်းပြုပြီး ရုရှား စီးပွားရေး လုပ်ငန်းရှင်တွေကို အရေးယူ ပိတ်ဆို့မှုတွေ သတ်မှတ်ခဲ့ပေမယ့် ထရမ့်ကတော့ ရွှေရောင်ကတ်ကို အဲဒီ သူဌေးသူကြွယ်တွေလည်း ဝယ်ယူခွင့် ရှိနိုင်လောက်တယ်လို့ ဖေဖော်ဝါရီ ၂၅ ရက်နေ့တုန်းက အိမ်ဖြူတော်ရဲ့ ဘဲဥပုံ ရုံးခန်းမှာ ထရမ့်က သတင်းထောက်တွေကို ပြောကြားခဲ့ပါတယ်။
Public Service Announcement
သူ့ရဲ့ ဒုတိယအကြိမ် သမ္မတ သက်တမ်းမှာ အမေရိကန်ရောက် တရားမဝင် နေထိုင်သူတွေကို အင်တိုက်အားတိုက် ဖြိုခွင်းဖို့ ရည်ရွယ်ထားတဲ့ ထရမ့်က ရွှေရောင်ကတ်ရဲ့ ရည်ရွယ်ချက်ဟာ အမေရိကန် နိုင်ငံသားဖြစ်ခွင့်က စျေးကြီးတယ်ဆိုတာ ရှင်းရှင်းလင်းလင်း ပြသခြင်းပဲလို့လည်း ပြောပါတယ်။
အမေရိကန်ကို လာချင်တဲ့ သူတွေ အများကြီး ရှိကြမှာဖြစ်ကြောင်း၊ သူတို့ဟာ အမေရိကန်ကို ရောက်လာရင် အလုပ်လုပ်ကြ၊ အလုပ်နေရာတွေ ဖန်တီးပေးကြ၊ ကုမ္ပဏီတွေ ထူထောင်ကြတာမျိုး အခွင့်အရေး ရနိုင်ကြောင်း၊ ပိုက်ဆံတော့ ရှိကြရမှာဖြစ်ကြောင်း ထရမ့်က ဆိုပါတယ်။
ရွှေရောင်ကတ်တွေ ရောင်းချမှုဟာ နောက်ထပ် နှစ်ပတ်လောက်အတွင်း စတင်လာနိုင်တယ်လို့လည်း သူက မှတ်ချက် ပေးခဲ့ပါတယ်။ အိမ်ခြံမြေ လုပ်ငန်းရှင် ဘီလီယံနာ သူဌေးကြီး တစ်ဦးလည်းဖြစ်တဲ့ ထရမ့်က ရွှေရောင်ကတ်အသစ် လျှောက်ထားသူတွေရဲ့ နောက်ခံ အခြေအနေတွေကို သေချာ စိစစ်သွားမယ်လို့ ပြောခဲ့ပြီး ရုရှား လုပ်ငန်းရှင်တွေကိုရော ခွင့်ပြုမလားဆိုတဲ့ သတင်းထောက်တွေရဲ့ မေးမြန်းမှုကို ဖြစ်နိုင်ခြေ ရှိတယ်လို့ ပြန်ဖြေသွားခဲ့တာပါ။
ထရမ့်ဟာ သမ္မတ ဖြစ်လာပြီး တစ်လလောက် အတွင်းမှာတင် အမေရိကန်ရဲ့ နိုင်ငံတကာ အထောက်အပံ့ အစီအစဉ်တွေကို ပိတ်ပင်တာ၊ ယူကရိန်း စစ်ပွဲအရေးမှာ ရုရှားနဲ့ တိုက်ရိုက် ချိတ်ဆက်ဆွေးနွေးတာတွေ အပါအဝင် ဂယက်ရိုက်ခတ်မှု ကြီးမားတဲ့ စီမံဆုံးဖြတ်ချက်တွေကို ဆက်တိုက် လုပ်ဆောင်လာခဲ့ပါတယ်။
ကိုးကား: AFP
