မက္ကဆီကို ရေတပ်ရဲ့ ရွက်သင်္ဘော တစ်စီးဟာ နယူးယောက်မြို့မှာ ဘရွတ်ကလင်း တံတားနဲ့ ငြိမိပြီး လူအသေအပျောက် ဖြစ်ခဲ့တဲ့ ကိစ္စကို အမေရိကန် အာဏာပိုင်တွေက ကိုင်တွယ် စုံစမ်းနေပါတယ်။
မေလ ၁၇ ရက်တုန်းက နယူးယောက်မှာ အခမ်းအနား တစ်ခုအတွက် ပူးပေါင်း ပါဝင်ဖို့ ရောက်ရှိလာတဲ့ သင်္ဘောကြီးရဲ့ မြင့်မားတဲ့ ရွက်တိုင်တွေဟာ ဘရွတ်ကလင်း တံတား အောက်ခြေနဲ့ ငြိမိပြီး ကုန်းပတ်ပေါ် အပျက်အစီးတွေ ပြုတ်ကျခဲ့တာ ဖြစ်ပါတယ်။
အဲဒီ မတော်တဆမှုမှာ လူ ၂ ဦးသေဆုံးပြီး ၁၉ ဦး ဆေးရုံရောက်ခဲ့ကြောင်း နောက်ပိုင်းမှာ မက္ကဆီကို ရေတပ်က ထုတ်ပြန်ခဲ့ပါတယ်။ Cuauhtémoc ရေယာဉ်ဟာ မက္ကဆီကို ရေတပ်မှာ ရွက်လွှင့် ခုတ်မောင်းမှုတွေကို လေ့ကျင့်ဖို့ အသုံးပြုတဲ့ ရွက်သင်္ဘော တစ်စီးပါ။
တံတားနဲ့ သင်္ဘော ချိတ်မိခဲ့တဲ့ ကိစ္စမှာ အကြောင်းရင်း တိတိကျကျ မသိရသေးပေမယ့် ကနဦး စုံစမ်းမှုတွေအရ ရေယာဉ်ဟာ အဲဒီဖြစ်ရပ် မတိုင်ခင်မှာ စက်သေပြီး ထိန်းချုပ်ရ ခက်ခဲတဲ့ အခြေအနေ ဖြစ်သွားခဲ့တယ်လို့ သိရှိထားပါတယ်။
Public Service Announcement
ဘရွတ်ကလင်း တံတားကို အခင်းဖြစ်ပြီးတဲ့နောက် နာရီပိုင်းလောက် ပိတ်ခဲ့ပေမယ့် စစ်ဆေးမှုတွေအပြီး ပုံမှန်ပြန်လည် ဖွင့်လှစ်ပေးထားခဲ့ပါတယ်။
ရွက်လှေရဲ့ ရွက်တိုင်အမြင့်ဆုံး အပိုင်းဟာ ၁၅၈ ပေရှိပြီး တံတားနဲ့ ရေမျက်နှာပြင်ကြား အကွာအဝေးကတော့ ၁၃၅ ပေပဲ မြင့်တယ်လို့လည်း သိရပါတယ်။
ကယ်ဆယ်ရေး အဖွဲ့တွေက သင်္ဘောပေါ် လိုက်ပါလာသူ ၂၇၇ ယောက်စလုံးမှာ ပျောက်ဆုံးနေသူ မရှိကြောင်း အတည်ပြုခဲ့ပြီး ၂၇ ဦးကို ပြုစုကုသပေးခဲ့ရသလို အဲဒီထဲက ၁၉ ဦးကို ဆေးရုံ ပို့ခဲ့ရကြောင်း ပြောပါတယ်။
လက်ရှိမှာတော့ အမေရိကန်ရဲ့ အမျိုးသား သယ်ယူပို့ဆောင်မှု လုံခြုံရေး ဘုတ်အဖွဲ့ဟာ ဖြစ်စဉ်နဲ့ ပတ်သက်ပြီး စုံစမ်းစစ်ဆေးမှုတွေ လုပ်ဆောင်မယ့် အဖွဲ့တစ်ခု စေလွှတ်ပေးထားပြီး မက္ကဆီကိုနဲ့ အမေရိကန် အစိုးရတွေကလည်း ပံ့ပိုး ကူညီပေးနေပါတယ်။
ရွက်သင်္ဘောဟာ ဧပြီ ၆ ရက်နေ့က မက္ကဆီကိုရဲ့ အကာပူလ်ကို ဆိပ်ကမ်းကနေ ထွက်ခွာလာခဲ့ပြီး နယူးယောက်ကနေ စကော့တလန်နိုင်ငံ၊ အဘာဒင်းမြို့ဆီ ခရီးဆက်ဖို့ မူလက စီစဉ်ထားခဲ့ကြောင်း သိရပါတယ်။
ကိုးကား: BBC
