ဇူလိုင်-၂၈၊၂၀၂၅။People’s Spring
ထိုင်းနိုင်ငံ၊ ဘန်ကောက်မြို့လယ်ကချာတူချက် စျေးမှာပစ်ခတ်မှု ဖြစ်ပွားပြီး လူ ၄ ဦး သေဆုံးခဲ့သလို သေနတ်သမားလည်း ကိုယ့်ကိုယ်ကိုယ် အဆုံးစီရင်သွားကြောင်း သိရပါတယ်။
ဇူလိုင် ၂၈ ရက် နေ့လယ်ပိုင်းတုန်းက ချာတူချက်မှာရှိတဲ့ အော်တော်ကော်စျေးထဲမှာပစ်ခတ်မှု ဖြစ်ပွားခဲ့တာပါ။
ကနဦး သိရှိထားတာကတော့ သေဆုံးသူတွေဟာ လုံခြုံရေး အစောင့်တွေလို့ ဆိုပါတယ်။
Public Service Announcement
သေနတ်သမားဟာ အနက်ရောင် ရှပ်အင်္ကျီ၊ အသားရောင် ဘောင်းဘီကို ဝတ်ထားပြီး စစ်သုံး ကျောပိုးအိတ်လွယ်ထားသူသက်ကြီးပိုင်း အမျိုးသား တစ်ဦးလို့ မျက်မြင်တွေက ပြောပါတယ်။
ဘာကြောင့် ပစ်ခတ်မှု ဖြစ်ပွားခဲ့သလဲ ဆိုတာကိုတော့ တိတိကျကျ မသိရသေးပါဘူး။
နောက်ပိုင်းမှာတော့သေနတ်သမားဟာကိုယ့်ကိုယ်ကိုယ်ပစ်ခတ်ထားတဲ့ဒဏ်ရာတွေနဲ့ သေဆုံးလျက်သားရှာတွေ့ခဲ့တယ်လို့လည်းသိရပါတယ်။
အခင်းဖြစ်ရာ နေရာမှာတော့ လက်နက်ကိုင် ရဲတပ်ဖွဲ့ဝင်တွေ ဖြန့်ကျက်ထားတာကိုလည်း ဒေသခံ မီဒီယာတွေက ဖော်ပြခဲ့ပါတယ်။
လူမှုကွန်ရက်ပေါ်မှာတော့ လက်နက်ကိုင် အမျိုးသားတစ်ဦးကို ရိုက်ကူးထားတဲ့ ဗီဒီယိုတစ်ခုက မြန်မြန်ဆန်ဆန် ပျံ့နှံ့သွားခဲ့ပါတယ်။ ထိုင်းရဲတပ်ဖွဲ့ကတော့ ဖြစ်စဉ်နဲ့ ပတ်သက်လို့ အသေးစိတ် ထုတ်ပြန်တာမျိုး မရှိသေးပါဘူး။
အခုဖြစ်ရပ်ဟာလက်ရှိဖြစ်ပွားနေတဲ့ထိုင်းနဲ့ ကမ္ဘောဒီးယားကြားက နယ်စပ်စစ်ရေး ပဋိပက္ခနဲ့ အဆက်အစပ်ရှိ၊မရှိဆိုတာကိုလည်းအတည်မပြုနိုင်သေးပါဘူး။
ကိုးကား – Khaosod
