ဖင်လန်နိုင်ငံမှာ အားပေးတဲ့ ဘောလုံးကလပ်က တန်းဆင်းသွားခဲ့တာကို ဒေါသထွက်နေတဲ့ ပရိသတ်တွေက ဘောလုံးကွင်းရဲ့ ပွဲကြည့်စင်ကို မီးတင်ရှို့ခဲ့ကြပါတယ်။
ဖင်လန်မှာ ၉ ကြိမ်တိုင် အမှတ်ပေး ချန်ပီယံ ဖြစ်ခဲ့ဖူးတဲ့ ဟာကာ အသင်းဟာ ပြီးခဲ့တဲ့ ဘောလုံးရာသီကတော့ ရလဒ်တွေ ဆိုးရွားခဲ့တာကြောင့် ဒုတိယတန်းကို တန်းဆင်းပြီး ယှဉ်ပြိုင်ရတော့မှာပါ။ အောက်တိုဘာလမှာ တန်းဆင်းခဲ့ရတဲ့ အခြေအနေက ပရိသတ်တွေကြားမှာ အကြီးအကျယ် စိတ်ပျက်စရာ ဖြစ်ခဲ့ပါတယ်။
ပြီးခဲ့တဲ့ သီတင်းပတ်ကုန်မှာတော့ ဗယ်လ်ကီယာကော့စကီး မြို့မှာရှိတဲ့ အသင်းပိုင် Factory Field အားကစားရုံထဲက ပွဲကြည့်စင်တစ်ခုကို ပရိသတ်တချို့က မီးရှို့ပစ်ခဲ့တာ ဖြစ်ပါတယ်။ အဲဒီနောက်ပိုင်း ရဲတွေက သံသယရှိသူ ဆယ်ကျော်သက် ၃ ယောက်ကို ထိန်းသိမ်းထားခဲ့ပါတယ်။ အဲဒီထဲကမှာ ၁၅ နှစ်အရွယ် လူငယ်တစ်ယောက်က ပွဲကြည့်စင်ကို သူက မီးစရှို့ခဲ့တာလို့ ဝန်ခံထားပါတယ်။
သုံးယောက်စလုံးက အသက်မပြည့်သေးတဲ့ လူငယ်တွေ ဖြစ်နေတာကြောင့် လက်ရှိ ဖင်လန်နိုင်ငံရဲ့ ဥပဒေတွေ အရတော့ စွဲချက်တင်လို့ မရဘဲ ဖြစ်နေတယ်လို့လည်း ဆိုပါတယ်။ ရဲတွေကတော့ အဲဒီ လူငယ်တွေကို မြှောက်ပေးခဲ့တဲ့ တခြားကြံရာပါတွေ ရှိသလား ဆိုတာကို စုံစမ်းနေပါတယ်။
Public Service Announcement
မီးရှို့ခံရတဲ့ ဘောလုံးကွင်းရဲ့ ပွဲကြည့်စင်တစ်ခုက လုံးဝဥဿုံ မီးကျွမ်းသွားပြီး အနီးမှာရှိတဲ့ မြက်ခင်းတု အစိတ်အပိုင်း တချို့လည်း ပျက်စီးခဲ့ပါတယ်။
ဟာကာ အသင်းရဲ့ ဥက္ကဋ္ဌ မာကိုလာဆန်က ဒီလို အစွန်းရောက်တဲ့ ပရိသတ်မျိုးတွေကို အသင်းက မလိုချင်ဘူးလို့ ပြောပါတယ်။ သတင်းကြားပြီးတဲ့အခါ အသင်းကို ထောက်ခံအားပေးဖို့ ဆက်သွယ်လာတဲ့ ပရိသတ် အများအပြား ရှိခဲ့ကြောင်း၊ ဒီလို အားပေးမှုမျိုးကိုသာ အသင်းက လိုအပ်ကြောင်း သူက ဆိုပါတယ်။
ပျက်စီးဆုံးရှုံးမှု တန်ဖိုးကို တိတိကျကျ မသိရသေးပေမယ့်လည်း ပမာဏတော့ မနည်းလောက်ဘူးလို့လည်း လာဆန်က မှတ်ချက်ပေးခဲ့ပါတယ်။
အသင်းရဲ့ အမှုဆောင်ချုပ်ဖြစ်သူ အိုလီ ဟတ်တူနန်က စိတ်အလိုမကျမှု တစ်ခုကြောင့် သူတစ်ပါးပိုင်တဲ့ ပစ္စည်းကို လက်လွတ်စပယ် ဖျက်ဆီးတဲ့ အမူအကျင့်မျိုးဟာ လက်ခံနိုင်စရာ မရှိကြောင်း၊ ဒါပေမဲ့ ကမ္ဘာကြီးကိုက အဲဒီလိုတွေ ဖြစ်နေကြောင်း ပြောကြားသွားပါတယ်။
မီးလောင်ထားတဲ့ ပွဲကြည့်စင်ရဲ့ ကျန်နေတဲ့ အပိုင်းတွေကိုလည်း အပြီးဖြိုချပစ်ရမယ်လို့ ဆိုပါတယ်။ လောလောဆယ်တော့ အသင်းတာဝန်ရှိသူတွေ၊ အာဏာပိုင်တွေနဲ့ အာမခံ ကုမ္ပဏီတို့က ဒီကိစ္စနဲ့ ပတ်သက်ပြီး ဘယ်လိုကိုင်တွယ်မလဲ ဆိုတာကို ညှိနှိုင်း ဆန်းစစ်နေကြောင်း သိရပါတယ်။
ကိုးကား: The Sun
