တောင်အာဖရိက အသင်းကို တစ်ဂိုးတည်းနဲ့ ကပ်အနိုင်ယူခဲ့တဲ့နောက် ၂၀၂၆ ကမ္ဘာ့ဖလား ပူးတွဲအိမ်ရှင် ကနေဒါ အသင်းဟာ ၁၆ သင်း ရှုံးထွက်အဆင့်ထိ တက်လှမ်းလာနိုင်ခဲ့ပြီ ဖြစ်ပါတယ်။
ကနေဒါ အမျိုးသား လက်ရွေးစင် ဘောလုံးအသင်းရဲ့ သမိုင်းကြောင်း တလျှောက်မှာတော့ ဒါဟာ ၁၆ သင်း ရှုံးထွက်အဆင့်ထိ ပထမဆုံးအကြိမ် ရောက်ရှိတဲ့ သမိုင်းမှတ်တမ်းသစ်လည်း ဖြစ်လာပါတယ်။
ဇွန်လ ၂၈ ရက်နေ့ ညပိုင်းက ယှဉ်ပြိုင်ခဲ့တဲ့ ၃၂ သင်း ရှုံးထွက်အဆင့် ပွဲစဉ်မှာတော့ ပွဲချိန် မိနစ် ၉၀ ကျော်လာတဲ့ထိ ဂိုးမရှိ သရေကျနေခဲ့ပြီး အချိန်ပို ဆက်ကစားရမယ်လို့ ပရိသတ်တွေက ယူဆနေခဲ့ကြပါတယ်။ အဲဒီနောက် နာကျင် အပိုဆောင်းချိန် ၉၂ မိနစ်မှာ စတီဖန် အူစတာကွီရိုက ကနေဒါအတွက် အနိုင်ဂိုးကို ဘီးကုပ်စက်ဝိုင်း ထိပ်နားကနေ ကန်သွင်းသွားခဲ့ပါတယ်။ လော့စ်အန်ဂျလိစ်မြို့ထိ လိုက်ပါ အားပေးခဲ့တဲ့ တောင်အာဖရိက ပရိသတ်တွေ အတွက်တော့ အဲဒီ အခိုက်အတန့်ဟာ အသည်းကွဲစရာ ဖြစ်ခဲ့ပါတယ်။
ကနေဒါဟာ ၂၀၂၆ ကမ္ဘာ့ဖလား မတိုင်ခင်တုန်းက ယှဉ်ပြိုင်ဖူးသမျှ ကမ္ဘာ့ဖလား ပွဲစဉ် ၆ ပွဲစလုံးကို အရေးနိမ့်ခဲ့ပါတယ်။ ဒါပေမဲ့ အခုနှစ် ပြိုင်ပွဲမှာတော့ သမိုင်းတလျှောက် စံချိန်တင် အမြင့်ဆုံး စွမ်းဆောင်မှုအဖြစ် ၁၆ သင်း အဆင့်ကို ရောက်လာခဲ့တာပါ။ အဲဒီအဆင့်မှာတော့ နယ်သာလန်နဲ့ မော်ရိုကို ပွဲစဉ်ကနေ အနိုင်ရလာတဲ့ အသင်းနဲ့ တွေ့ဆုံရမှာဖြစ်ပြီး ကနေဒါသားတွေ ကွာတားဖိုင်နယ်ထိ ဆက်လက် ချီတက်နိုင်မလား ဆိုတာကို စောင့်ကြည့်ရမှာပါ။
Public Service Announcement
ကနေဒါဟာ အုပ်စုပွဲစဉ်တွေမှာ ၁ ပွဲနိုင်၊ ၁ ပွဲသရေ၊ ၁ ပွဲရှုံးခဲ့ပြီး အုပ်စုဒုတိယ နေရာကနေ နောက်တစ်ဆင့်ကို တက်ခဲ့တာပါ။ ကာတာကို ခြောက်ဂိုး-ဂိုးမရှိနဲ့ အနိုင်ရခဲ့တဲ့ ပွဲစဉ်ကတော့ ကမ္ဘာ့ဖလား သမိုင်းမှာ ကနေဒါရဲ့ ပထမဆုံး နိုင်ပွဲဖြစ်ခဲ့ပြီး အခုတော့ တောင်အာဖရိကကိုပါ ဆက်လက် အနိုင်ယူနိုင်ခဲ့တာပါ။
ပွဲသိမ်းခရာ မှုတ်ပြီးချိန်မှာ နည်းပြ ဂျက်ဆီမတ်ချ်က သူ့ရဲ့ ကစားသမားတွေကို ‘မင်းတို့က ကနေဒါရဲ့ သူရဲကောင်းတွေပဲ။ ဒီနိုင်ငံရဲ့ အားကစား အနာဂတ် အလားအလာက မင်းတို့ကြောင့် အများကြီး ခမ်းနားလာတော့မှာ’လို့ ချီးကျူးပြောဆိုခဲ့ပါတယ်။
ပူးတွဲ အိမ်ရှင် မက္ကဆီကို ပါဝင်တဲ့ အုပ်စု(A)ရဲ့ ဒုတိယ နေရာကနေ နောက်တစ်ဆင့် တက်လာတဲ့ တောင်အာဖရိက အသင်းကတော့ လော့စ်အန်ဂျလိစ်မှာ ရုန်းကန်ခဲ့ရပြီး ကနေဒါ ဂိုးပေါက်ကို တစ်ကြိမ်သာ ထိထိရောက်ရောက် ခြိမ်းခြောက်နိုင်ခဲ့ပါတယ်။ ကနေဒါလည်း အပိုင်အခွင့်အရေး များများစားစား မရခဲ့ပေမယ့် တောင်အာဖရိက ဂိုးပေါက်ကို ၇ ကြိမ်ထိ တည့်တည့်မတ်မတ် ခြိမ်းခြောက်ပြခဲ့သလို စွမ်းဆောင်ရည်ပိုင်းမှာ ပိုသာတဲ့ အသင်းဆိုတာ ပြသနိုင်ခဲ့ပါတယ်။
ကိုးကား: BBC
