ရုရှားသမ္မတ ဗလာဒီမာ ပူတင်ဟာ လက်ရှိ စစ်ပွဲမှာ အီရန်ကို နည်းနည်းပါးပါး အကူအညီ ပေးချင်လည်း ပေးနေလိမ့်မယ်လို့ အမေရိကန် သမ္မတ ဒေါ်နယ်လ်ထရမ့်က ပြောကြားခဲ့ပါတယ်။
အမေရိကန်ဟာ အစ္စရေးနဲ့ ပူးပေါင်းပြီး ဖေဖော်ဝါရီ ၂၈ ရက်နေ့က အီရန်ကို တိုက်ခိုက်ခဲ့ရာက အီရန်စစ်ပွဲ စတင်လာခဲ့ပါတယ်။ Fox သတင်းဌာနနဲ့ အင်တာဗျူးမှာတော့ ထရမ့်က အီရန်ရဲ့ မိတ်ဖက် နိုင်ငံဖြစ်တဲ့ ရုရှားက အီရန်ကို အတိုင်းအတာ တစ်ခုထိ ကူညီနေမယ်လို့ သူယုံကြည်ကြောင်း မှတ်ချက်ပေးခဲ့ပါတယ်။
အမေရိကန် မီဒီယာ တချို့က အီရန်ဟာ အရှေ့အလယ်ပိုင်း ဒေသတွင်းက အမေရိကန် စစ်စခန်းတွေနဲ့ စစ်တပ်တွေရဲ့ ရွေ့လျားလှုပ်ရှားမှု ဂြိုဟ်တု ဓာတ်ပုံတွေနဲ့ တခြား ထောက်လှမ်းရေး သတင်း အချက်အလက်တွေကို ရုရှားဆီကနေ အချိန်နဲ့ တပြေးညီ ရရှိနေတယ်လို့ ဖော်ပြထားခဲ့ပါတယ်။
Foxနဲ့ အင်တာဗျူးမှာတော့ ထရမ့် အီရန်နဲ့ ရုရှားကြားက ထောက်လှမ်းရေး သတင်းအချက်အလက် မျှဝေမှု ကိစ္စအကြောင်း မှတ်ချက်ပေးခဲ့ရာမှာ ပူတင်ဟာ အီရန်ကို နည်းနည်းတော့ ကူညီနေလိမ့်မယ်လို့ သူထင်ကြောင်း ပြောကြားသွားပါတယ်။
Public Service Announcement
ပူတင်ဖက်က ကြည့်ရင် ရုရှားနဲ့ စစ်ဖြစ်နေတဲ့ ယူကရိန်းကိုလည်း အမေရိကန်က ကူညီနေတယ်လို့ ရှုမြင်မှာ ဖြစ်ကြောင်း၊ ဒီတော့ အခုကိစ္စကို ဘဲစားဘဲချေလို့ သဘောထားနိုင်ကြောင်း ထရမ့်က ဆိုပါတယ်။
မတ်လ ၁၂ ရက်နေ့တုန်းကတော့ အရှေ့အလယ်ပိုင်းဒေသဆိုင်ရာ အမေရိကန် အစိုးရ အထူးကိုယ်စားလှယ် စတိဗ်ဝစ်ကော့ဖ်က ရုရှားဟာ အီရန်ဆီကို ထောက်လှမ်းရေး ကူညီပံ့ပိုးမှုတွေ မလုပ်ပါဘူးလို့ အမေရိကန်ဆီ အာမခံထားကြောင်း ပြောဆိုထားပါတယ်။
အီရန်ဟာ ဂြိုဟ်တု ထောက်လှမ်းရေး စွမ်းရည်နဲ့ ပတ်သက်ရင် အကန့်အသတ် ကြီးကြီးမားမား ရှိနေပြီး စစ်ပွဲကာလ ပစ်မှတ်ရှာဖွေမှုနဲ့ တခြားထောက်လှမ်းရေး အချက်အလက်တွေ ရရှိဖို့ ရုရှားရဲ့ ဂြိုဟ်တုတွေက ကူညီ ဖြည့်တင်းပေးနေတယ်လို့ အမေရိကန် မီဒီယာ တချို့က ဖော်ပြခဲ့ပါတယ်။
အီရန်စစ်ပွဲကြောင့် နိုင်ငံတကာ ရေနံစျေးတွေ မြင့်တက်လာတာကို ရေတို ဖြေရှင်းမှုအဖြစ် ရုရှားရေနံအပေါ် အမေရိကန်က ပိတ်ဆို့ အရေးယူမှုတွေ ဖြေလျှော့ပေးခဲ့ပြီး နောက်တစ်နေ့မှာ ထရမ့်ဆီက အခုလို မှတ်ချက်စကား ထွက်ပေါ်လာတာပါ။
ဖြေလျှော့မှု အသစ်အရ မတ်လ ၁၂ ရက်နေ့ထိ အတောအတွင်း သင်္ဘောတွေပေါ် တင်ထားပြီးသား၊ ဒါမှမဟုတ် ပင်လယ်ပြင်မှာ ရှိနှင့်နေပြီးသား ရုရှားရေနံတွေကို ကမ္ဘာ့နိုင်ငံ အသီးသီးက ရက်ပေါင်း ၃၀ အတွင်း ဝယ်ယူနိုင်ဖို့ အမေရိကန်က ခွင့်ပြုပေးခဲ့ကြောင်း သိရပါတယ်။
ကိုးကား: Fox
ဓာတ်ပုံ – Getty
