စစ်ရပ်စဲရေး သဘောတူညီမှုအတွက် အမေရိကန်ဖက်က ပေးပို့တဲ့ အဆိုပြုချက်ကို အီရန်က တုံ့ပြန် တောင်းဆိုထားတဲ့ ကိစ္စတွေဟာ လက်ခံနိုင်စရာ လုံးဝ မရှိဘူးလို့ အမေရိကန် သမ္မတ ဒေါ်နယ်လ်ထရမ့်က ပြောပါတယ်။
အီရန် အစိုးရက တစ်စိတ်တပိုင်း ထိန်းချုပ်ထားတဲ့ Tasnim သတင်းဌာနက အီရန်ရဲ့ အဆိုပြုချက်ကို ပြီးခဲ့တဲ့ သီတင်းပတ်ကုန်မှာ ပါကစ္စတန် အစိုးရဆီကနေတဆင့် အမေရိကန်ဆီ ပေးပို့ခဲ့ပြီးဖြစ်ကြောင်း ဖော်ပြခဲ့ပါတယ်။
အဲဒီ အဆိုပြုချက်ထဲမှာတော့ လက်ရှိ စစ်မက်ဖြစ်ပွားနေမှု အားလုံး ရပ်ကြဖို့၊ အီရန်အပေါ် အမေရိကန်က နောက်ထပ် တိုက်ခိုက်မှုတွေ မလုပ်တော့ပါဘူးဆိုတဲ့ အာမခံချက် ပေးဖို့၊ အီရန်ဆိပ်ကမ်းတွေနဲ့ ရေယာဉ်တွေကို ပစ်မှတ်ထားပြီး ဖြန့်ကျက်ထားတဲ့ အမေရိကန် ရေတပ် ပိတ်ဆို့မှုကို ဖယ်ရှားပေးဖို့ ဆိုတာတွေ ပါဝင်ခဲ့ပါတယ်။
အီရန်နဲ့ အမေရိကန်တို့ဟာ လွန်ခဲ့တဲ့ တစ်လကျော်လောက် ကတည်းက အပစ်အခတ် ရပ်စဲထားပြီး စစ်ပွဲကို အပြီးတိုင် အဆုံးသတ်စေမယ့် ညှိနှိုင်းမှုတွေကို ဆက်လက် လုပ်ဆောင်နေတာ ဖြစ်ပါတယ်။
Public Service Announcement
ပြီးခဲ့တဲ့ သီတင်းပတ် အစောပိုင်းမှာ ထရမ့်က အီရန်စစ်ပွဲဟာ မြန်မြန်ဆန်ဆန် ပြီးဆုံးသွားလိမ့်မယ်လို့ မှတ်ချက်ပေးခဲ့ဖူးပါတယ်။ အမေရိကန်နဲ့အတူ လက်တွဲပြီး အီရန်ကို တိုက်ခဲ့တဲ့ အစ္စရေးနိုင်ငံရဲ့ ဝန်ကြီးချုပ် ဘင်ဂျမင် နေတန်ညာဟုကတော့ အီရန်ရဲ့ နျူကလီးယားလက်နက် ထုတ်လုပ်နိုင်တဲ့ ယူရေနီယံ ဓာတ်သတ္တု သန့်စင်မှုအားလုံး ချုပ်ငြိမ်းမသွားမချင်း စစ်ပွဲကို ရပ်တန့်လို့ရပြီလို့ မသတ်မှတ်နိုင်ကြောင်း သတိပေးခဲ့ပါတယ်။
အီရန် ပိုင်နက်ထဲမှာ ကျိန်းသေပေါက် ဖျက်ဆီးပစ်ရမယ့် ယူရေနီယမ် သန့်စင်မှု စက်ရုံတွေ ကျန်နေဆဲလို့ နေတန်ညာဟုက ပြောပါတယ်။
အီရန်ဖက်က ပေးပို့လိုက်တဲ့ တန်ပြန် ညှိနှိုင်း တောင်းဆိုမှုတွေနဲ့ ပတ်သက်လို့ ထရမ့်က အီရန်ရဲ့ ကိုယ်စားလှယ်ဆိုသူတွေ ပေးပို့ခဲ့တဲ့ တုံ့ပြန်ချက်ကို သူက ဖတ်ကြည့်ထားပြီးဖြစ်ကြောင်း၊ အဲဒီအချက်တွေကို သူသဘောမကျကြောင်း၊ လုံးဝ လက်ခံနိုင်စရာ မရှိကြောင်း မေလ ၁၀ ရက်နေ့တုန်းက လူမှုကွန်ရက်ပေါ်မှာ ရေးသားထားခဲ့ပါတယ်။
အီရန် သမ္မတ မာဆုဒ် ပက်ဇက်ရှ်ခန်းက အဲဒီ အဆိုပြုချက်တွေကို တိုက်ရိုက် ရည်ညွှန်းတာ မဟုတ်ပေမယ့် အီရန်ဟာ ရန်သူကို ဘယ်တော့မှ ဦးညွှတ်အလျှော့ပေးမှာ မဟုတ်ကြောင်း၊ ညှိနှိုင်းမှုနဲ့ ဆွေးနွေးမှုတွေ ရှိနေတာ မှန်ပေမယ့် အဲဒီ အဓိပ္ပါယ်ဟာ ဆုတ်ခွာမှုနဲ့ အရှုံးပေးမှုတွေ လုံးဝမဟုတ်ကြောင်း မေလ ၁၀ ရက်နေ့မှာ ပြောကြားခဲ့ပါတယ်။
လောလောဆယ်တော့ ဟောမုဇ် ရေလက်ကြားရဲ့အထွက် အိုမန်ပင်လယ်ကွေ့နားမှာ အမေရိကန် ရေတပ်က အီရန်ရေယာဉ်တွေကို စောင့်ကြို ပိတ်ဆို့နေသလို အီရန်ကလည်း နိုင်ငံကမ်းလွန်မှာရှိတဲ့ ဟောမုဇ် ရေလက်ကြားကို ပိတ်ထားဆဲပါ။ ဟောမုဇ်ဟာ ကမ္ဘာ့စွမ်းအင်စီးဆင်းမှုအတွက် အချက်အခြာ အကျဆုံး ရေလမ်းကြောင်းတစ်ခု ဖြစ်ပြီး မတ်လဆန်းလောက် ကတည်းက အီရန်ရဲ့ ပိတ်ဆို့ထားမှုကြောင့် နိုင်ငံတကာ ရေနံနဲ့ လောင်စာဆီ စျေးတွေ ထိုးတက်ကုန်ပါတယ်။
ပြီးခဲ့တဲ့ သီတင်းပတ်တုန်းက ဟောမုဇ်တဝိုက် ရေပြင်မှာ အီရန်နဲ့ အမေရိကန်တို့ကြား အပြန်အလှန် ပစ်ခတ်မှုတချို့ ရှိခဲ့ပေမယ့် အပစ်ရပ် သဘောတူညီမှုက ဆက်လက် တည်တံ့နေဆဲလို့ နှစ်ဖက်စလုံးက အသီးသီး အတည်ပြုခဲ့ကြပါတယ်။
ကိုးကား: BBC
