ထိုင်းနိုင်ငံ၊ ဘန်ကောက်မြို့တော် မြောက်ပိုင်းနားမှာ ဖြစ်ပွားခဲ့တဲ့ စာသင်ကျောင်း ပစ်ခတ်မှုမှာ သေနတ်သမား အပါအဝင် အနည်းဆုံး ၃ ဦးသေဆုံးပြီး ၁၅ ဦးထက်မနည်း ဒဏ်ရာရခဲ့ကြောင်း သိရပါတယ်။
ဩဂုတ် ၇ ရက် မနက်ပိုင်းတုန်းက နွန်သာဘူရီရဲ့ ဘန်ခရူရိုင် ခရိုင်ထဲမှာရှိတဲ့ ဒက်ဘ်ဆီရင် နွန်သာဘူရီ စာသင်ကျောင်းမှာ ပစ်ခတ်မှု ဖြစ်ပွားခဲ့တာပါ။
သေနတ်သမားဟာ Grade 8 ကျောင်းသား တစ်ဦးဖြစ်ပြီး ကျောင်းအဆောက်အအုံထဲမှာ ပုန်းအောင်းနေတာကြောင့် ရဲတွေက အဲဒီနေရာကို ပိတ်ဆို့ပြီး ရှာဖွေခဲ့ရပါတယ်။
နောက်ဆုံး ထွက်ပေါ်လာတဲ့ သတင်းတွေအရ သေနတ်သမားဟာ ကိုယ့်ကိုယ်ကိုယ် အဆုံးစီရင်ခဲ့တယ်လို့ ယူဆရပြီး ကျောင်းရဲ့ သင်ကြားရေး ဝန်ထမ်း ၂ ဦး လည်း သေဆုံးခဲ့တယ်လို့ သိရပါတယ်။ သေဆုံးသူတွေက ဆရာလား၊ ဆရာမလား ဆိုတာကိုတော့ ကွဲကွဲပြားပြား မသိရသေးပါဘူး။
Public Service Announcement
သေနတ်သမား ကျောင်းသားရဲ့ သေနတ်ဒဏ်ရာနဲ့ အလောင်းကိုတော့ သူ့ကိုယ်သူ ပိတ်ဆို့ထားတဲ့ အခန်းထဲမှာပဲ ရဲတွေက ရှာတွေ့ခဲ့ပါတယ်။ ပစ်ခတ်မှုမှာ အသုံးပြုခဲ့တယ်လို့ ယူဆရတဲ့ ပစ္စတို သေနတ်ရဲ့ ဓာတ်ပုံကလည်း လူမှုကွန်ရက်တွေပေါ် ထွက်ပေါ်လာပါတယ်။
ဒဏ်ရာရသူ ၁၅ ဦးထဲမှာလည်း အနည်းဆုံး ၁ ဦးရဲ့ အခြေအနေက စိုးရိမ်ရတယ်လို့ ဆိုပါတယ်။
ပစ်ခတ်မှု ကျူးလွန်ရတဲ့ အကြောင်းရင်းကိုလည်း လောလောဆယ်မှာတော့ ရဲတွေက စုံစမ်းနေဆဲ ဖြစ်ပါတယ်။ ဒေသခံတွေကတော့ လူသိများတဲ့ အလယ်တန်းကျောင်းဖက်ကနေ သေနတ်သံတွေ ကြားခဲ့ရကြောင်း ပြောပါတယ်။
စာသင်ကျောင်း ပစ်ခတ်မှု သတင်းကြောင့် ရဲတွေက အဆောတလျင် သွားရောက်ပြီး ကျောင်းသူကျောင်းသားတွေနဲ့ ဆရာဆရာမတွေကို ကယ်ဆယ် ရွှေ့ပြောင်းပေးခဲ့ရပါတယ်။
ဖြစ်စဉ်နဲ့ ပတ်သက်လို့ နောက်ဆက်တွဲ အခြေအနေတွေကိုတော့ ဆက်လက် စုံစမ်းနေဆဲ ဖြစ်ပါတယ်။
ကိုးကား: Khaosod
