ထိုင်းက အိမ်တစ်လုံးထဲမှာ ဖမ်းဆီးချုပ်နှောင် ခံထားရပြီး လိင်ပိုင်းဆိုင်ရာ အမြတ်ထုတ်မှုတွေ ခံခဲ့ရတယ်ဆိုတဲ့ တရုတ် အမျိုးသမီး ၃ ဦးကို ရဲတပ်ဖွဲ့က ကယ်ဆယ်နိုင်ခဲ့ပါတယ်။
အမျိုးသမီးတွေထဲက တစ်ဦးက ဆွေမျိုးတွေဆီ လျှို့ဝှက် ဆက်သွယ် သတင်းပေးနိုင်ခဲ့တဲ့နောက် ချွန်ဘူရီမှာရှိတဲ့ ဘန်လာမွန်က နှစ်ထပ်အိမ်ကြီးထဲကို ဖေဖော်ဝါရီ ၂၃ ရက်နေ့ မနက်ပိုင်းမှာ ထိုင်းရဲတွေက ဝင်ရောက် စီးနင်းခဲ့တာ ဖြစ်ပါတယ်။
ပြီးတော့ အသက် ၃၆ နှစ်၊ ၃၂ နှစ်နဲ့ ၂၃ နှစ်အရွယ် အမျိုးသမီးတွေကိုလည်း ကယ်ထုတ်နိုင်ခဲ့ပါတယ်။ အမျိုးသမီးတွေက သူတို့ဟာ ဖျော်ဖြေရေး အလုပ်အတွက် ခေါ်ယူခံရတာ ဖြစ်ပေမယ့် အိမ်ထဲမှာ ချုပ်နှောင် ခံထားခဲ့ရကြောင်း၊ သူတို့ကို အိမ်ပိုင်ရှင်တွေက လိင်ပိုင်းဆိုင်ရာ စော်ကား အနိုင်ကျင့်ခဲ့သလို မိဘဆွေမျိုးတွေ ဆီကနေပြီး ပြန်ပေးငွေတွေပါ အကျပ်ကိုင် တောင်းခံခဲ့ကြောင်း ထွက်ဆိုခဲ့ပါတယ်။
ရဲတွေက အဲဒီအိမ်မှာရှိတဲ့ တရုတ် အမျိုးသား ၄ ဦးကိုလည်း ဖမ်းဆီးခဲ့ပါတယ်။ အဲဒီအမျိုးသားတွေဟာ အမျိုးသမီး သုံးဦးကို ထိုင်းနိုင်ငံထဲ ပတ်စ်ပို့တ်မပါဘဲ တရားမဝင် ဝင်ရောက်လာနိုင်အောင် စီစဉ်ပေးခဲ့တယ်လို့လည်း ထိုင်းရဲတွေက ပြောပါတယ်။
Public Service Announcement
အိမ်ထဲမှာတော့ အမျိုးသမီးတွေကို ချုပ်နှောင်ရာမှာ အသုံးပြုတယ်လို့ ယူဆရတဲ့ သံကြိုးတစ်ချောင်း၊ ကွန်ဒုံးတွေနဲ့ မူးယစ်ဆေးဝါး သုံးစွဲတဲ့ ပစ္စည်းတွေကို ရှာဖွေ သိမ်းဆည်း ရမိခဲ့ပါတယ်။
ရဲတပ်ဖွဲ့ဟာ စုံစမ်းစစ်ဆေးမှုတွေ ဆက်လက် လုပ်ဆောင်နေပြီး ဖြစ်စဉ်မှာ ပါဝင်ပတ်သက်နေသူတွေ ဘယ်သူဘယ်ဝါ ဆိုတာကို ဖော်ထုတ်ဖို့လည်း မေးမြန်းစစ်ဆေးနေကြောင်း သိရပါတယ်။
ကိုးကား: Khaosod
