People’s Spring
ထိုင်းနိုင်ငံမှာ ကျောင်းကား မီးလောင်ရာက မူကြိုကလေးငယ် အနည်းဆုံး ၁၀ ဦးသေဆုံးပြီး နောက်ထပ် ဒဏ်ရာရသူတွေလည်း ရှိခဲ့တယ်လို့ သိရပါတယ်။
ဒီနေ့ အောက်တိုဘာ ၁ ရက်နေ့က ဘန်ကောက် မြို့တော်နားမှာရှိတဲ့ ပါသွန်သာနီမှာ ကျောင်းပြင်ပ လေ့လာရေး ခရီးစဉ်တစ်ခု သွားရောက်ရင်း ကျောင်းဘတ်စ်ကား မီးလောင်မှု ဖြစ်ခဲ့တာပါ။
Public Service Announcement
ထိုင်းရဲ့ မီးသတ်နဲ့ ကယ်ဆယ်ရေး ဌာန Facebook စာမျက်နှာမှာ အဲဒီ ကျောင်းကား မီးလောင်မှု သတင်းကို စတင် ဖော်ပြခဲ့ပါတယ်။
ကနဦး ရရှိထားတဲ့ သတင်းတွေအရ အဲဒီ ကျောင်းကားဟာ ယူသိုင်ဌာနီမှာရှိတဲ့ ဝတ်ခွန်ဖရာ ဆန်ခါရမ်ကျောင်းရဲ့ အသက် ၄ နှစ်၊ ၅ နှစ်အရွယ် မူကြို ကျောင်းသူကျောင်းသားလေးတွေကို တင်ဆောင်လာတာလို့ သိရပါတယ်။
ကားပေါ်မှာ ကလေးတွေ၊ ယာဉ်မောင်းနဲ့ ဆရာဆရာမတွေ စုစုပေါင်း ၄၂ ဦး လိုက်ပါလာပြီး ၁၉ ဦးသာ မီးလောင်မှုကနေ အချိန်မီ ထွက်ပြေး လွတ်မြောက်ခဲ့ပါတယ်။
လက်ရှိ အသေအပျောက်က ၁၀ ဦးလို့ အတည်ပြုထားပေမယ့်လည်း အဲဒီထက် တိုးလာနိုင်ခြေ ရှိနေဆဲပါ။
အနီးမှာရှိတဲ့ မီးသတ်တပ်ဖွဲ့ဟာ အခင်းဖြစ်တဲ့ နေရာကို အမြန်ဆုံး သွားရောက်ပြီး ကျောင်းကားကိုယ်ထည်ကို စွဲလောင်နေတဲ့ မီးတွေကို အစွမ်းကုန် ငြှိမ်းသတ်ခဲ့ရပါတယ်။
ဒါပေမဲ့ လုံခြုံရေးကြောင့် အတွင်းပိုင်း အခြေအနေတွေကိုတော့ ချက်ချင်း စစ်ဆေးလို့ မရသေးဘူးလို့ ဆိုပါတယ်။
Khaosod သတင်းဌာနက ကလေး ၁၀ ဦးဟာ အခင်းဖြစ်တဲ့ နေရာမှာတင် သေဆုံးတယ်လို့ ရေးသားထားပြီး ဒဏ်ရာရသူတွေလည်း အများအပြား ရှိခဲ့တယ်လို့ ဆိုပါတယ်။
သေဆုံးတဲ့ ကလေးတွေ ဘယ်သူဘယ်ဝါ ဆိုတာကို မထုတ်ပြန်သေးပါဘူး။
ကျောင်းကားမှာ ဆိုးဆိုးရွားရွား မီးလောင်မှု ဖြစ်ပွားခဲ့တဲ့ အကြောင်းရင်းကိုလည်း စုံစမ်းနေဆဲပါ။
ကနဦး အချက်အလက်တွေအရ တာယာ ကွဲထွက်သွားရာကနေ အနီးမှာရှိတဲ့ လမ်းအတားအဆီး တစ်ခုကို ဝင်တိုက်ပြီး ကျောင်းကားမှာ မီးစလောင်ခဲ့တာလို့ ယုံကြည်ရတယ်လို့လည်း သိရပါတယ်။
ကိုးကား – Thaiger
