ပုလောမြို့နယ်တွင် စစ်ကောင်စီတပ်က တောင်ယာကမ်းရွာခံများ နှင်ထုတ်ပြီး ပစ္စည်းများခိုယူနေဟု ဒေသခံများပြော

ကျော်ဇော/People’s Spring

တနင်္သာရီတိုင်း၊ ပုလောမြို့နယ်၊ တောင်ယာကမ်းကျေးရွာမှ ဒေသခံပြည်သူများအား စစ်ကောင်စီတပ်က ရွာမှနှင်ထုတ်ပြီး ပစ္စည်းများအား ယာဥ်ကြီး၊ယာဥ်ငယ်များဖြင့် ခိုးယူသယ်ဆောင်နေကြောင်း ဒေသခံများက People’s Spring သို့ ပြောသည်။

ပုလောအခြေစိုက် စစ်ကောင်စီ၏ ခလရ (၂၈၅)တပ်မှ စစ်ကောင်စီတပ်သားများသည် အောက်တိုဘာ ၄ ရက်က အဖွဲ့သုံးဖွဲ့ကာ တောင်ယာကမ်းကျေးရွာသို့ ဝင်ရောက်လာပြီး ကနဦးတွင် ကျေးရွာအတွင်းရှိနေသော သက်ကြီးရွယ်အိုနှင့် ကလေးများပါမကျန် ဒေသခံအများအပြားကို ဖမ်းဆီးချုပ်နှောင်ထားခဲ့ကြောင်း ဒေသခံများက ပြော သည်။

Public Service Announcement

“ရွာထဲက အိမ်တွေထဲမှာပဲ ဖမ်းထားတာ။ ခုတော့(အောက်တိုဘာလ ၅ ရက်ယနေ့) အားလုံးပြန်လွှတ်ပေးပြီး ရွာပြင်ကိုနှင်ထုတ်ထားတယ်”ဟု ပုလောဒေသခံတစ်ဦးက ပြောသည်။

အဆိုပါ စစ်ကောင်စီတပ်သားများသည် ပြည်သူများ၏နေအိမ်များအား ဖောက်ထွင်း၍ ရွှေ၊ ငွေ၊ လက်ဝတ်လက်စားနှင့် ဆိုင်ကယ်များခိုးယူရာတွင် ၎င်းတို့၏ဇနီးများကိုပါ ခေါ်ဆောင်လာကာ ပါဝင်ကူညီစေကြောင်း အထက်ပါဒေသခံက ဆက်ပြောသည်။

“ဆိုင်ကယ်တွေ ကားနဲ့နှစ်ခေါက်သယ်တယ်။ နောက်က ခဝေးမိန်းမတွေတောင် ပါလာတယ်။ အဝတ်တွေပါယူတယ်။ လက်ထဲကရွှေတွေ၊ ပိုက်ဆံတွေပါ လုတယ်။ ရှိသမျှ အိမ်အားလုံး ရိုက်ဖျက်ယူတယ်”ဟု ပုလောမြို့မှ ဒေသခံနောက်တစ်ဦးက ပြောသည်။

အထက်ပါ တောင်ယာကမ်းကျေးရွာသည် အိမ်ခြေ ၁၀၀ခန့်ရှိပြီး စစ်ကောင်စီတပ်သားများ၏ ဖောက်ထွင်းခိုးယူမှုများကြောင့် ဆိုင်ကယ်အစီး ၃၀ ကျော်ပါသွားပြီး ရွှေ၊ ငွေနှင့် အခြားတန်ဖိုးရှိပစ္စည်းမည်မျှပါသွားသည်ကို မသိနိုင်သေးဟု ၎င်းဒေသခံက ရှင်းပြသည်။

လက်ရှိတွင် စစ်ကောင်စီတပ်သားများ တောင်ယာကမ်းကျေးရွာအတွင်း ဆက်ရှိနေပြီး ကျေးရွာဒေသခံများအား မမြင်ချင်ဘူးဟုဆိုကာ ခြိမ်းခြောက်ထားသောကြောင့် ဒေသခံများမှာ ဘေးလွတ်ရာ ရှောင်တိမ်းနေကြရကြောင်း စုံစမ်းသိရသည်။

ပုလောအခြေစိုက် ခလရ(၂၈၅)တပ်မှ စစ်ကောင်စီတပ်သားများသည် တောင်ယာကမ်းကျေးရွာအနီးသို့ လွန်ခဲ့သော တစ်ပတ်ခန့်ကတည်းက ရောက်ရှိနေခြင်းဖြစ်ကာ ၎င်းတို့အချင်းချင်းပြန်လည်ပစ်ခတ်မိ၍ တစ်ဦးသေဆုံးခဲ့ကြောင်း ဒေသခံများက ပြောသည်။